"ღამის შოუს სტუდია" საკუთარ არხს ხსნის

"ღამის შოუს სტუდიის" პროექტები, ისევე როგორც სხვა გადაცემები, არჩევნებისშემდგომ პერიოდში "იმედის" ეკრანიდან "ჩახსნეს", თუმცა მას დრო ფუჭად არ დაუკარგავს. ახლახან სტუდიის პროდუქცია იმავე ადგილას ისევ გამოჩნდა და შემოქმედებითი გუნდი უფრო დიდი სამუშაოსთვისაც ემზადება – საკუთარ გასართობ არხს ხსნიან. დეტალებზე "სარკეს" "ღამის შოუს სტუდიის" გენერალური პროდიუსერი ირაკლი კაკაბაძე ესაუბრა:
– "იმედის" ხელმძღვანელობასთან შევთანხმდით, რომ ჩვენი ორი პროდუქტი, "შუა ქალაქში" და "ღამის შოუ ოთარ ტატიშვილთან ერთად", იანვრამდე ეთერში გავა. მერე კი ახალ პროექტებზეც ვისაუბრებთ. როგორ გაგრძელდება ჩვენი თანამშრომლობა, ეს ბევრ რამეზეა დამოკიდებული – ფინანსებზე, იმაზე, თუ რას გეგმავს არხი და როგორი მიმართულება ექნებათ. "იმედმა" ასევე გვთხოვა, "კაცების შოუ" იანვრამდე სხვა არხზე არ გადაგვეტანა. შესაბამისად, ველოდებით იანვარს. "კაცების შოუს" მიხედვით, გადავიღეთ მხატვრული ფილმი, რომელსაც ეწოდება "კაცების ფილმი", სადაც მთავარ როლში ჩვენ ოთხნი ვართ. ასევე მონაწილეობს ჩვენი სტუდიის აბსოლუტურად ყველა თანამშრომელი და სტუმრების 90 პროცენტი, ვინც კი შოუში გვყოლია.
მნიშვნელოვანი სიახლეც გვაქვს. "იმედთან" უკვე მოვილაპარაკეთ, რომ ჩვენს არხს გავაკეთებთ. ჯერ ჩამოყალიბებულები არ ვართ. ამაზე აქტიურად მუშაობას იანვრიდან დავიწყებთ და ალბათ თებერვლის ბოლოს ეთერში გავალთ.
მანანა ნოდია