ეშლი გრინი: "არასოდეს ვიწყებ რომანს ბიჭთან, რომელთანაც მომავალს ვერ ვხედავ"

ისეთი მომხიბვლელი ვამპირი, როგორიც ელის კალენია ფილმში "ბინდი", კინემატოგრაფიაში ძნელად თუ მოიძებნება. უკვდავმა ვამპირებმა ისე გაიტაცა კინომანები, რომ ყველას ეგონა, ეს ისტორია არასოდეს დამთავრდებოდა, მაგრამ ყველაფერს აქვს თავისი დასასრული და, მათ შორის, საგასაც. ამ ისტორიის თითოეული მსახიობი კი ჰოლივუდში თავის ბრწყინვალე კარიერას აგრძელებს. გამონაკლისს არც ეშლი გრინი წარმოადგენს.
დაბადების ადგილი: 1987 წლის 21 თებერვალი, ფლორიდას შტატი, ქალაქი ჯექსონ ვილი.
ოჯახი: მამა – ჯო გრინი, ყოფილი სამხედრო მეზღვაური, ამჟამად ბიზნესმენი. დედა – მიშელ ტატუმი, სადაზღვევო ბროკერი. ჰყავს უფროსი ძმა ჯო.
იმიჯი: მოხულიგნო–სექსუალურ–ქალური და ამასთანავე, ბავშვური, ამიტომაც ის მრავალფეროვანია თავისი კინოროლებით.
ბავშვობა: ეშლი ნაზი და ჰაეროვანი გოგონა არასოდეს ყოფილა. ბიჭებთან ყოველთვის ჩხუბობდა და ტაიკვანდოში რამდენიმე პრიზიც აქვს მიღებული. მწვრთნელები მას ბიჭებთან აჩხუბებდნენ და არა – გოგონებთან. როდესაც ერთ მშვენიერ დღეს ტუჩი და ცხვირი გაიხეთქა, მიხვდა, რომ ეს მისი საქმე არ იყო. დღეს მსახიობი თვლის, რომ ბავშვობაში აბსოლუტურად სხვანაირი იყო და ბედნიერია, რომ მის ცხოვრებაში ახტაჯანა გოგონას ეპოქა დასრულდა. თინეიჯერობის პერიოდში ეშლიმ გადაწყვიტა, რომ თანატოლებთან ურთიერთობა აღარ უნდოდა, მისთვის უფროსი ადამიანები უფრო საინტერესონი აღმოჩნდნენ. მას ჰქონდა ამბიციები, რომ თანატოლებისგან ახალს ვერაფერს ისწავლიდა და ამიტომ ზრდასრულებთან არჩევდა კონტაქტს.
განათლება: სამწუხაროდ, მას სიმაღლემ – 165 სანტიმეტრმა, არ მისცა უფლება, პოდიუმზე აეწყო კარიერა. როდესაც სამოდელო სააგენტოში დაიწუნეს, გადაწყვიტა, სხვა სფეროში წასულიყო, იურისტობა ან ფსიქოლოგობა უნდოდა. უმაღლესში ამ განხრით ჩასაბარებლადაც ემზადებოდა, მაგრამ ბოლოს მაინც შოუბიზნესმა გაიტაცა. სამსახიობო კურსებზე შევიდა და მიხვდა, რომ ეს ის საქმე იყო, რომელსაც მთელი ცხოვრება გააკეთებდა. 17 წლის ასაკში მან დაჩქარებული პროგრამით დაამთავრა სკოლა და ლოს ანჯელესში გაემგზავრა.
კარიერის დასაწყისი: სანამ მისი ვარსკვლავური დრო დადგებოდა, 3 წლის განმავლობაში მცირე როლებით კმაყოფილდებოდა სერიალებში. უარს არც რეკლამებზე ამბობდა. "საცოდავ სიტუაციაში ვიყავი. უამრავ უაზრო რეკლამაში ვმონაწილეობდი, რათა საცხოვრებელი ხარჯები დამეფარა. თავდაპირველად ორ სრულიად უცნობ ადამიანთან ერთად ვიქირავე სახლი, რომ უფრო ნაკლები გადამეხადა", – იხსენებს ეშლი.
"ბინდი": 2008 წელს გოგონა სტეფანი მაიერის რომანის ეკრანიზაციის კინოსინჯებზე წავიდა. ეშლის სურდა, ბელას როლი ეთამაშა. "ეს იყო ძალიან ხანგრძლივი და რთული პროცესი. მე არ წამიკითხავს წიგნი. მენეჯერმა კი მითხრა, თუ გინდა, სინჯებზე წარმატებას მიაღწიო, ზეპირად უნდა იცოდე მთელი წიგნიო. ძალიან სწრაფად წავიკითხე პირველი წიგნი. პირველივე სინჯების შემდეგ დამირეკეს, არა, შენ ბელა ნამდვილად არ ხარო. შემდეგ კი მეორედ დამირეკეს და ელის კალენის როლზე მომსინჯეს. ძალიან დიდხანს მომიწია ლოდინი, რომ პასუხი მიმეღო. შობის დღესასწაული მოდიოდა და სახლში წავედი. როცა იმედი გადამეწურა, მაშინ დამირეკეს და მითხრეს, შენ ვამპირი გოგონა ხარო", – იხსენებს გრინი.
ელის კალენის პოპულარობა, რა თქმა უნდა, ჩამორჩება ბელასა და ედვარდისას, მიუხედავად ამისა, ეშლი სწორედ ამ როლის გამო ოთხჯერ დააჯილდოვეს "თენ ჩოის ევერდზე".
"ბინდის" შემდეგ: "ამ ფილმის შემდეგ მთელი ჩემი ცხოვრების პერსპექტივა შეიცვალა. ადრე კინოსინჯებზე მეგონა, რომ სადღაც, კინოსტუდიების სათავეებში იდგნენ ბოროტი ადამიანები, რომელთაც ერთი სული ჰქონდათ, როდის ჩავფლავდებოდი. მას შემდეგ კი მეკითხებიან, დროს ხომ გამონახავთ, რომ ჩვენს სცენარს გაეცნოთ და როლი გაითავისოთო. ყოველთვის მეგონა, რომ ცხოვრება ერთი ფილმით არასოდეს იცვლებოდა, მაგრამ ახლა ამაში დარწმუნებული ვარ", – აღიარებს ეშლი გრინი.
სხვა კინო: ვამპირული საგის პარალელურად ეშლი ყოველთვის ცდილობდა, საკუთარი თავი სხვა როლებშიც ეპოვა. 2009 წელს მან კევინ სპეისთან ერთად ითამაშა ფილმში "ფსიქოანალიტიკოსი", ერთი წლის შემდეგ კი ფილმში – "სკეიტლენდი", რომელიც სანდესის კინოფესტივალის ტრიუმფატორი გახდა. 2012 წელს მან ორ წარმატებულ ფილმში ითამაშა – "ზაფხული, თანაკლასელები, სიყვარული" და "მოვლენა".
სამოდელო კარიერა: ეშლიმ შიშველი ფოტოსესია გადაიღო "სპორტ ილუსთრეითედის" სარეკლამო კამპანიისათვის. მან მოახერხა, რამდენიმე კოსმეტიკური ხაზის სარეკლამო სახე გამხდარიყო. შესულია 55 მომავლის სახისა და მსოფლიოს 100 ყველაზე სექსუალური ქალის სიაში.
მეგობრები: "ხშირად ვპოულობ დროს იმისათვის, რომ მეგობრები მოვინახულო. მხოლოდ მათთან ურთიერთობაში ვგრძნობ ცხოვრების მშვიდ ტემპს. როცა მინდა, ნორმალური ცხოვრება შევიგრძნო, მაშინვე მეგობრებთან მივდივარ", – ამბობს ეშლი.
მეგობრობს "ბინდის" კოლეგებთან, განსაკუთრებით კელან ლატსონთან, რომელმაც ფილმში ემეტ კალენი განასახიერა და ჯეკსონ რეტბოუნთან, რომელმაც ფილმში ჯასპერის როლი ითამაშა.
სპორტი: გრინს ძალიან უყვარს ამერიკული ფეხბურთი და "ფლორიდა გატორსის" გულშემატკივარია. ყოველდღიურად ვარჯიშობს იმისათვის, რომ იდეალური სხეული შეინარჩუნოს. მას წონის კონტროლის თავისი მეთოდი აქვს. "ქალისათვის ადვილია, იყო ფორმაში და არ მოიმატო. ამისათვის საჭიროა, კალორიები დახარჯო ლაპარაკში, შოპინგსა და სექსში", – ნახევრად ხუმრობით აღნიშნავს ეშლი.
კერპი: ოდრი ჰეპბერნი. "საუზმე ტიფანისთან" მისი საყვარელი ფილმია.
პაპარაცები: "დედაჩემს აღარ უწევს რეკვა და იმის გაგება, თუ რას ვაკეთებ. ინტერნეტისა და ჟურნალ–გაზეთების საშუალებით შეუძლია, ყველაფერი გაიგოს ჩემი ყოველდღიური ცხოვრების შესახებ. საკმარისია, ვინმესთან ერთად ვივახშმო, რომ აუცილებლად ახალ რომანზე წერენ. ამ ყველაფერს მე ადვილად ვიტან, მაგრამ მამაკაცებს უჭირთ. ჩემი პოპულარობა ყველაზე მეტად მაინც საქმეში მეხმარება".
ურთიერთობები: "ჩემთვის არსებობს ასეთი კრედო – არ უნდა დაიწყო რომანტიკული ურთიერთობა, თუ მას აზრი არ აქვს. ყოველთვის ვიცი, ურთიერთობაში რას მივიღებ. არ მაქვს ილუზიები. არასოდეს ვიწყებ რომანს ისეთ ბიჭთან, რომელთანაც მომავალს ვერ ვხედავ". ამჟამად ეშლის რომანი აქვს მსახიობ რივ კარნისთან.