არჩილ სოლოღაშვილი - "ცოლს მეტჯერ აღარ შევირთავ"

მსახიობმა და ტელეწამყვანმა აჩიკო სოლოღაშვილმა "რუსთავი 2"-ის რეპორტიორი - ნუცა ქავთარაძე შეირთო ცოლად. თაფლობის თვის გატარებას წყვილი შარმ-ელ-შეიხში აპირებს: ეგვიპტეში 10-დღიანი საგზურით ახალდაქორწინებულები ტელეკომპანიამ დაასაჩუქრა. სავარაუდოდ, თებერვალში, "შუადღის" წამყვანებს მუშაობა აჩიკო სოლოღაშვილის გარეშე მოუწევთ. "იმედია, მაპატიებენ. ცოლს მეტჯერ აღარ შევირთავ", - ღიმილით აღნიშნა აჩიკომ. ყვარლის ტბაზე გატარებული საქორწინო უიკ-ენდის შემდეგ ახალშეუღლებული წყვილი ჯერჯერობით ისევ ჩვეულ სამუშაო რეჟიმს დაუბრუნდა...

აჩიკო სოლოღაშვილი:
- ჯვარი მამა დავითმა ლურჯ მონასტერში დაგვწერა. ჯვრისწერის მერე, ყვარლის ტბაზე გავემგზავრეთ, სადაც სამსახურის გამო, მხოლოდ 2 დღე გავატარეთ, მეტი - ვერა...

- ნუცას კაბა ჯვრისწერამდე ნახე?
- არა. უბრალოდ, კაბის ესკიზის შექმნას ვესწრებოდი. ქსოვილის ფერიც არ ვიცოდი. საბოლოო სახით, ნუცას კაბა ჯვრისწერის დღეს ვნახე...

- გარდა იმისა, რომ ნუცა "რუსთავი 2"-ის რეპორტიორია, მასზე კიდევ რისი თქმა შეგიძლია?
- ძალიან კარგი გოგონაა. ბედნიერი ვარ, რომ ჩემი მეუღლეა. გული მწყდება - ჩემს ცხოვრებაში აქამდე რომ არ გამოჩნდა. მიმაჩნია, რომ ამის გამო ბევრი დავკარგე... ნუცა ძალიან ჭკვიანი, ლამაზია... ერთადერთია!..

- რამდენი ხანია, რაც რომანი გაქვთ?
- დაახლოებით 6-7 თვე. ნუცას მანამდეც ვიცნობდი. ზაფხულმა კიდევ უფრო დაგვაახლოვა.

- ზაფხული ერთად გაატარეთ?
- ბათუმში "ქეთო და კოტეს" რეპეტიციები მქონდა. იმ პერიოდში ნუცა შვებულებაში იყო - ქობულეთში ისვენებდა. მის სანახავად ქობულეთში მივდიოდი ხოლმე. გამოდის, რომ ზაფხული მაინც ერთად გავატარეთ.

- როგორც ვიცი, ნუცა გოგი ქავთარაძის შვილიშვილია. ბატონმა გოგიმ სიძედ როგორ მიგიღო? თავის დროზე, შენი მასწავლებელიც ხომ არ იყო?
- არა, ბატონი გოგი ჩემი მასწავლებელი არ ყოფილა. ჩემი და ნუცას ურთიერთობის საწინააღმდეგო არავის არაფერი ჰქონია...

- ნუცასთან ურთიერთობისას "შუადღის" სამეგობრო როგორ გგულშემატკივრობდა?
- ეს არაჩვეულებრივი ადამიანები მთელი ცხოვრება გვერდით მეყოლებიან! ყველა თავისებურად მგულშემატკივრობდა. პროდიუსერები, წამყვანები, თანაწამყვანები... - ყველანი მხარში მედგნენ.

- შენი რომანის შესახებ პირველმა ვინ შეიტყო?
- ყველას ერთად გამოვუტყდი. ჩვენს
სამეგობროში "ცალ-ცალკე საიდუმლოებები" არ არსებობს. როცა გრძნობაში კარგად გავერკვიე, მეგობრებს გავუმხილე.

- აჩიკო, უკვე დაოჯახებული ხარ. მეუღლის ამპლუაში თავს როგორ გრძნობ?
- ვერ ვგრძნობ, რომ მეუღლე მყავს! უბრალოდ, ძალიან ბედნიერი ვარ! გვერდით ის ადამიანი მყავს, რომელთან ერთადაც მთელ ცხოვრებას სიამოვნებით გავატარებ!..

ეთო ყორღანაშვილი
ჟურნალი ”გზა”