ნამცხვარი ალუბლის ჟელეთი - 12 უგემრიელესი ულუფა

ეს ნამცხვარი ზაფხულის ცხელ დღეებში განსაკუთრებით სასიამოვნო საჭმელია. შეგვიძლია ალუბლის ნაცვლად გამოვიყენოთ ჟოლო, მაყვალი ან მოცხარი.



საჭირო მასალა

ცომი
150 გრ კარაქი ან მარგარინი
150 გრ ფქვილი + ცოტა ფქვილი საფანელად
150 გრ 5-9%-იანი ხაჭო
180 გრ შაქარი

ჟელე
500 გრ უკურკო ალუბალი
3 ს.კ. ჟელატინი
50 მლ წყალი
შაქარი – გემოვნებით

მომზადება

კარაქი დავჭრათ და ცომის სხვა ინგრედიენტებთან ერთად დანით ავკეპოთ. შემდეგ ხელით მოვზილოთ.

ცომი გავახვიოთ ცელოფანში და 1 საათით მაცივარში შევდოთ.

შემდეგ ცომი გავაბრტყელოთ, მოვათავსოთ 26 სმ დიამეტრის ფორმაში, ჩანგლით დავჩხვლიტოთ და 180 გრადუსზე გახურებულ ღუმელში დაახლოებით 20 წუთის განმავლობაში ვაცხოთ.

ჟელატინი 40 წუთის განმავლობაში დავალბოთ წყალში.

ალუბალს დავაყაროთ სასურველი რაოდენობის შაქარი და დავაყოვნოთ, რომ წვენი გაუშვას. შემდეგ დავდგათ ცეცხლზე.

ალუბლის წვენი 1-2 წუთი ვადუღოთ. შემდეგ ცოტა შევაგრილოთ, დავდგათ დაბალ ცეცხლზე, დავუმატოთ ჟელატინი და ვურიოთ, რომ გაიხსნას (არ უნდა ადუღდეს).

ალუბლის მასა შევდგათ მაცივარში, რომ შესქელდეს. ჟელე ბოლომდე არ უნდა შეიკრას. ნამცხვრის ფენაზე მოვათავსოთ ნახევრად გამაგრებული ჟელე და შევდგათ მაცივარში, სანამ ბოლომდე არ გამაგრდება.ალუბლის ჟელეს შეგვიძლია დავუმატოთ ცოტა მიხაკ-დარიჩინი.