ანრი ჯოხაძე: "დედაჩემი იტალიაში დავტოვე პოლიტიკურ დევნილად"

მომღერალ ანრი ჯოხაძისთვის 2012 წელი შემოქმედებითად დატვირთული კი იყო, მაგრამ ზედიზედ ორჯერ იწვნია ფიასკო. ჯერ "ევროვიზიაზე" დამარცხდა, მერე კი პროექტიდან "ცეკვავენ ვარსკვლავები" პირველი გამოვარდა. ეს ყველაფერი არ ანაღვლებს, იღებს კლიპებს, ხმამაღლა ლაპარაკობს იმაზე, რასაც ფიქრობს, არ ერიდება სკანდალებს, მოკლედ, ისევ თავის "ნავში" ზის. ჩვენი ინტერვიუც ანრისთვის დამახასიათებელ სტილში წარიმართა.
– ანრი, მსმენელი თქვენგან მუდმივად ახლის, სკანდალურის მოლოდინშია. ახლა რას უმზადებთ მათ?
– ჩვენი ქვეყანაა მუდმივად ექსტრემალურ სიტუაციაში და მეც არ ჩამოვრჩები. სამი კლიპის პროექტი მაქვს, აქედან ორი ჩემს სიმღერაზე უნდა გადავიღო, ერთს ვერიკო ტურაშვილს გავუკეთებ. მისი კლიპი იქნება ძალიან ნაცნობ სიმღერაზე – "რაც ამქვეყნად სიყვარული მეფობს". გადაღებაც მალე დაიწყება. სენტიმენტალური კლიპი გამოვა, რომელიც გულგრილს არავის დატოვებს. რაც შეეხება ჩემს პროექტს, როცა დამთავრდება "ცეკვავენ ვარსკვლავები", ინოლა გურგულიას სიმღერაზე "ღიმილი მინდა" გადავიღებ კლიპს ტანგოს სტილში. მასში წლევანდელი სეზონის მონაწილეები მიიღებენ მონაწილეობას. ამ ყველაფრის ნახვას მაყურებელი ახალი წლის მერე შეძლებს.
– ალბათ უკვე შეაჯამეთ 2012 წელი. შედეგით კმაყოფილი ხართ?
– ძალიან საინტერესო წელი მქონდა, იყო აღმასვლაც და დაღმასვლაც. ამ ყველაფრით ძალიან გავერთე. ზოგიერთები მთელი თავიანთი კარიერის განმავლობაში ერთი კლიპის გადაღებასაც ვერ ახერხებენ, მე კი მარტო ამ წელს სამის გადაღება მოვასწარი და ფაქტობრივად სამივე წარმატებული აღმოჩნდა.
– ვერ ითმენთ, რომ თქვენს კოლეგებს არ წაკბინოთ ხოლმე.
– ვის წავკბინე?
– "ზოგიერთებს", რომლებიც კლიპების გადაღებას ვერ ახერხებენ.
– არ აკეთებენ! ეს არ არის კბენა, ეს არ მითქვამს წაკბენის მიზნით. "ვერ" ამ შემთხვევაში არ არის სწორი. არ აკეთებენ, რადგან თავიანთი პროფესია არ უყვართ .
– თავისი არგუმენტი აქვთ – კლიპი რატომ გადავიღოთ, მუსიკალური არხი არ არსებობს, სად გავუშვათო.
– რა შუაშია მუსიკალური არხი?! ჩემი კლიპი ინტერნეტში 200.000–ზე მეტმა ადამიანმა ნახა.
– წეღან დაღმასვლა რომ ახსენეთ, "ევროვიზია" იგულისხმეთ?
– ალბათ – "ევროვიზია". კი, ეს დაღმასვლა იყო.

– ეს დამარცხება შავი ლაქაა თქვენს შემოქმედებაში?
– არავითარ შემთხვევაში! შავი ლაქა არის სირცხვილის, სასირცხვილო კი იქ არაფერი გამიკეთებია.
– ამის შემდეგ კიდევ ერთ მარცხი განიცადეთ – ცეკვებში არ გაგიმართლათ.
– არც ეს იყო მარცხი. თავიდანვე ვიცოდი, რომ პირველი ვიქნებოდი, ვინც გავარდებოდა. სამჯერ ვთქვი უარი, არ მინდოდა მონაწილეობა.
– როგორ დაგითანხმეს?
– პირველად ვამბობ ამას: სახლში მეძინა, დედამ გამაღვიძა, თვალი გავახილე და ალინა არველაძე დავინახე.
– სახლში, საწოლ ოთახში?
– დიახ და ძალით წამიყვანა "პრომოების" გადაღებაზე. ეს პროექტი ძალიან საინტერესო იყო ჩემთვის. ანრი ჯოხაძე თუნდაც იმაში გამოადგათ, რომ პირველი ვიყავი, ვინც დარტყმა საკუთარ თავზე მიიღო და პროექტი დატოვა. ჩემ გარდა, არავის უნდოდა, რომ პირველი გავარდნილიყო. გაგდებას ოლიმპიური სიმშვიდით შევხვდი. ეს არ იყო ჩემი საქმე. არ მიყვარს ცეკვა!
– მომღერალი სცენაზე კარგად უნდა მოძრაობდეს.
– სცენაზე ძალიან კარგად ვმოძრაობ, მაგრამ ჯექსონობაზე ამბიცია არ მაქვს. მსოფლიო მომღერლების 80 პროცენტი სცენაზე არ ცეკვავს, მღერიან! თანაც ეს არის სამეჯლისო ცეკვების განსხვავებული მიმართულება, რაც არის ურთულესი. რასაც ჩვენ ყოველ ორშაბათს ვუყურებთ, დამიჯერეთ, იმ ნომრებში სისხლია ჩანთხეული. ყველაზე ენერგიულმა ადამიანმაც კი ვერ გავუძელი ამას.
– ახლა გულშემატკივრობთ რომელიმე მათგანს?
– სალომე ჭაჭუას "ევროვიზიის" შემდეგ დავუმეგობრდი და მას ვგულშემატკივრობ. რუსკა მაყაშვილის დედა, თამრო, ჩემი უახლოესი ადამიანია. რუსკასთანაც ვახლობლობ. ძალიან ვაფასებ რატი წითელაძის გამოსვლებს, ამ ადამიანმა ფანტასტიკური შედეგი აჩვენა. ისიც უნდა გავითვალისწინოთ, რომ სპორტსმენია და ყველაზე მაგარ ფორმაშია. მოკლედ, ყველას ვგულშემატკივრობ, მაგრამ პროგნოზი ერთმნიშვნელოვნად ასეთია – ფინალში დარჩებიან რუსკა მაყაშვილი და გიორგი ვარდოსანიძე!

– როგორ ემზადებით ახალი წლის შესახვედრად?
– ახალი წელი ყოველთვის ფეხებზე მეკიდა და ახლაც ასეა. ჯერ ისევ ყმაწილი ვარ და ჩემთვის ყოველი დღე ახალი წელია. არასოდეს მჯეროდა "სნეგუროჩკების" და ყოველთვის მეგოიმებოდა ნაძვის ხის აწყობა. არანაირ სამზადისში არ ვმონაწილეობ, უბრალოდ ყოველ წელს დედაჩემი ძალით მართმევდა ფულს. ძუნწი კი არ ვარ, უბრალოდ ვთვლი, რომ ეს არ არის მნიშვნელოვანი. საახალწლო მზადება საქართველოში მახინჯ ტრადიციად იქცა. ქართველს შეუძლია მთელი წელი საცივზე ოცნებაში გაატაროს და ახალი წლის ღამისთვის შემოინახოს ნიგოზი. როდესაც სახლში სუნელები და ნიგოზი გაქვს და არ იყენებ, შვილებს საცივს ანატრებ და მარტო იმიტომ, რომ ახალ წელს ვიღაც შემოეთრიოს შენს სახლში მეკვლედ და ის გააძღო, ეს არის მარაზმი! ყველას კი ვულოცავ ახალ წელს და ვიხდი ჩემს მოქალაქეობრივ ვალს, მაგრამ მეკვლედ არავისთან დავდივარ, მიუხედავად იმისა, რომ ხშირად მეპატიჟებიან. არც მე ვიცი, ვინ არის ხოლმე ჩემი ოჯახის მეკვლე.
– იმიტომ მაინც უნდა გიყვარდეთ ეს დღესასწაული, რომ მომღერლებისთვის შემოსავლის წყაროა, კონცერტებს მართავთ.
– გეთანხმებით, მაგრამ, სამწუხაროდ, წელს ყველა მომღერალს მოგვაკლდება ეს სიამოვნება – საახალწლო კონცერტები. ერთს კი გეტყვით, რომ საქართველოში იმ მომღერალთა სამეულში შევდივარ, ვინც თავისი სიმღერით ირჩენს თავს.
– რატომ მოგაკლდებათ, საახალწლო კონცერტი არ გაიმართება?
– როგორც მითხრეს, ღონისძიებები არ ტარდება და ეს არც არის პრობლემა. რა ვიცი, მე არ ვკვდები მშიერი. ახალ წელს ბაქოში შევხვდები, არაჩვეულებრივი შემოთავაზება მაქვს. აქაც შემომთავაზეს პრივატსაღამოებში მონაწილეობა წინასაახალწლოდ, მაგრამ არ მიღირს.
– ისევ თქვენი კოლეგების ხსენება მომიწევს...
– რა, წუწუნებენ? რა აწუწუნებთ?!
– საარჩევნოდ სოციალურ ქსელებში დიდი გარჩევები იყო, ზოგიერთი თქვენი კოლეგა ქვეყნიდან მიდიოდა, ზოგი კიდევ...
– ნინას (წკრიალაშვილი) ეს ტექსტი ნუ დაიხვიეთ ხელზე! მერე რა, ეს სიტყვის მასალად რომ თქვა, ამას ახსნაც არ უნდა. ჟურნალისტები ხართ თმით სათრევი!
– რატომ?!
– არ გითქვამთ რაღაცაზე, ეს რომ არ გამომივიდეს, თავს მოვიკლავო?
– არა, სიცოცხლეზე ტკბილი არაფერი მგონია.
– რა, ესე იგი თქვენ დაიჯერეთ, რომ ნინა წკრიალაშვილი თავს მოიკლავდა ნაციონალების გამო?! მას ძალიან უყვარს თავისი თავი.
– არა, ეს არ მითქვამს, მით უმეტეს, ნინამ "სარკესთან" ამაზე ვრცლად ისაუბრა და ახსნა, რა და როგორ იყო. თქვენ რა დაგაკლდათ ან მოგემატათ მთავრობის შეცვლის შემდეგ?
– ჩემთვის არაფერი იცვლება. დასაკარგავი იმ ადამიანებს აქვთ, რომლებიც მთავრობისგან რაღაცეებით სარგებლობდნენ. სახელების და გვარების ჩამოთვლა არ მომთხოვოთ! მე ეს ყოველთვის ფეხებზე მეკიდა. ჩემთან არც ერთი მთავრობა დაიჭერს საქმეს, რადგან ზოგადად არასანდო პიროვნება ვარ. ვერასოდეს ვიქნები რომელიმე პარტიასთან ჩახუტებული. უმრავლესობაშიც მყავდნენ მეგობრები და ოპოზიციაშიც და ახლაც ასეა. დიდი სამეგობრო წრე მყავს, მაგრამ ამით არასოდეს მისარგებლია. ყველაფერი დამაბრალეთ, ამის გარდა!

– არასანდო პიროვნება რატომ ხართ?
– არასტაბილური, ცვალებადი ხასიათი მაქვს. თუ რამე არ მომეწონება, აუცილებლად გავვარდები და საშინელ კლიპს გადავიღებ. მირჩევნია, ვიყო ავტონომიური "რესპუბლიკა" ქართულ შოუბიზნესში.

– როგორც მეგობარი, როგორი ხართ? არასანდო?
– არა, მეგობრობაში ძალიან ერთგული და სტაბილური ვარ.

– პირად ცხოვრებაზე რას გვეტყვით? ზაფხულში თქვენს გულისსწორს, ევა რივასს უმასპინძლეთ? ჩამოვიდა საქართველოში?
– ეს არის ჩემი პირადი ცხოვრება და რატომ უნდა მოგიყვეთ? იყო ჩამოსული და დამთავრდა!

– როგორი დახვედრა მოუწყვეთ?
– თქვენ ის მოყევით, მე როგორი დახვედრა მოგიწყვეთ, ყავა რომ მოგიმზადეთ და მიირთვით. ჩემს პირად ცხოვრებაზე ლაპარაკს კი შეეშვით! მგონი, ჩემს პირადზე თქვენ უფრო მეტი იცით, ვიდრე მე.

– იტალიიდან ამ რამდენიმე დღის წინ დაბრუნდით. არც ამაზე გკითხოთ?
– აი, ეს თემა არის პოზიტიური. მე და დედა ჩემს ძმასთან ჩავედით იტალიაში. დედა სამი თვით დავტოვე. ვუთხარი, პოლიტიკური დევნილი ხარ საქართველოდან და ჩამოსული არ დაგინახო–მეთქი. ჩემს ძმასთან ცხოვრობს მისი სიდედრიც. ჩემი ძმისშვილი 2 წლისაა. ბავშვი გაოცდა. ერთი ბებო რომ ჰყავდა, იცოდა, მეორე ბებო რომ ჩავიდა, ამასაც მიხვდა, მაგრამ მე ვინ ვიყავი, ვეღარ "გადახარშა". რატომღაც მეც ბებოს მეძახდა.
– თქვენი ძმა რას საქმიანობს?
– დაკავებულია შვილების კეთებით, მეორე შვილსაც ელოდება. ხო, იმასაც უყვარს ეს პროცესი.
ლანა კიკნაძე