ნანუკა ჟორჟოლიანი: "მიხარია, რომ ირაკლი შვილებისთვის მოიცლის"

ნანუკა ჟორჟოლიანის შოუ იანვრიდან "რუსთავი 2"–ზე გავა. როგორც გადაცემის წამყვანი ამბობს, ამჟამად თავს მშობლიურ სახლში გრძნობს. "სახლში" მას მთავარი კონკურენტი, მაია ასათიანი დახვდა, რომელმაც, ნანუკა ჟორჟოლიანის თქმით, ღირსეული მასპინძლობა გაუწია. ინტერვიუს პროცესში ტელეწამყვანმა ქმრისგან, ერეკლე კოდუასგან უზარმაზარი თაიგული მიიღო ბარათით, სადაც ცოლს სამსახურის დაწყებას ულოცავდა. ინტერვიუც ამაზე საუბრით დავიწყეთ.
– ნანუკა, რა შეგრძნებაა, როცა მეუღლისგან ამგვარ რომანტიკულ საჩუქარს იღებთ?
– ჩემთვის ძალიან მნიშვნელოვანია ეს სიტყვები: "შენთან ერთად, უსასრულოდ!". მან ზუსტად იცის, რომ ახლა ძალიან ბედნიერი ვარ. როცა ამბობდნენ, რომ ჩვენ გავშორდით, სულ ვფიქრობდი, ადამიანებს თუ როგორ არ უხარიათ სხვისი ბედნიერება. ვცდილობ, ჩემი სურათები "ფეისბუქს" მოვარიდო, რადგან ვხვდები, როცა ზოგ–ზოგიერთები ჩემს ბედნიერებას ხედავენ, ღიზიანდებიან. ვფიქრობ, ჩემი ცხოვრება თუნდაც მარტო იმად ღირდა, რომ ირაკლი კოდუას შევხვედროდი. ეს არის კაცი, რომელსაც, არც ერთი სტატუსის მიუხედავად, ღირსება არ დაუკარგავს. შეიძლება ვინმე განაწყენებული იყოს მისი სამსახურიდან გამომდინარე, რადგან მას უწევდა ნარკომანებთან, ნარკორეალიზატორებთან, კრიმინალთან ბრძოლა და ეს მესმის, მაგრამ ირაკლი არის ადამიანი, რომელზეც ყველა იტყვის, რომ კაცური კაცია.
– იმ პერიოდში, როცა დაიხურა თქვენი გადაცემა, რომელზეც ამბობდით, რომ შვილივით გიყვარდათ, ქმარი რას გეუბნებოდათ?
– ძალიან მგულშემატკივრობდა. მეუბნებოდა, რომ ახალი სამსახური უნდა დამეწყო, რადგან იცის, ეს რას ნიშნავს ჩემთვის. ძალიან მოსწონდა ის ტოქ შოუ, რომელსაც ვაკეთებდი და ყველაზე ჰუმანურ გადაცემას უწოდებდა... მართლა მიხარია, რომ ის დაისვენებს, შვილებისთვის მოიცლის და ბევრ რამეს ჩამოშორდება, რადგან ხალხი მარტო ცუდი კუთხით უყურებდა ყველაფერს. ეს არის კაცი, რომელზეც ყველა ყოფილი თანამშრომელი გეტყვის კარგს. ირაკლი ძალიან ღირსეული კაცია.
– თქვენი გადაცემა როგორ აღმოჩნდა "რუსთავი 2"–ზე?
– ჩვენ გვქონდა მოლაპარაკებები ბევრ სხვა არხთან და მათ შორის – "რუსთავი 2"–თან, სადაც 7 წელი ვიმუშავე და ჟურნალისტიკა აქ ვისწავლე, მიუხედავად იმისა, რომ კარიერა "პირველ არხზე" "ალიონიდან" დავიწყე. ჩემს ჟურნალისტურ საქმიანობაში ორი მთავარი პერიოდია: "რუსთავი 2"–ზე მუშაობა და "ნანუკას შოუ". ახლა მაქვს შეგრძნება, რომ სახლში დავბრუნდი. ამიტომ აქ მუშაობის გადაწყვეტილებაზე ბევრი არ მიფიქრია. ხშირად მისვამენ კითხვას ჩემსა და მაია ასათიანს შორის შიდა კონკურენციასთან დაკავშირებით. ასეთ დროს მიყვარს მაგალითად დასავლეთის მოდელის მოყვანა, სადაც გვიანი საღამოს შოუები და ღამის შოუები ერთ არხზე ერთად კეთდება. მესმის, რომ იქ დიდი მასშტაბებიც არის, მაგრამ ვფიქრობ, რომ ეს საქართველოშიც შესაძლებელია.
მე და მაია ასათიანს კონკურენტებად აღგვიქვამენ, მაგრამ მაინც მგონია, რომ სხვადასხვა ტიპის გადაცემები გვაქვს. არხის სრული ეკლექტივისთვის ამგვარი კონკურენცია კარგი და საინტერესოა. თანაც შიდა კონკურენცია მაინც სხვა ფარგლებში ჯდება, გარე კონკურენცია კი სხვაა. საერთოდ, ბედი არ მაქვს, იმიტომ, რომ "იმედზე" "რუსთავი 2"–ელს მიწოდებდნენ. აქ გადმოვედი და ვიღაცისთვის იმედელი ვარ. მაგრამ ფაქტი ერთია, აქ ყველა კითხულობს: "ნანუკა დაბრუნდა?". კითხვის ეს ფორმა კი ძალიან მომწონს.
– შევახსენოთ მკითხველს, თავის დროზე "რუსთავი 2"–დან რატომ წახვედით "იმედში"?
– "იმედში" არ გადავსულვარ. "რუსთავი 2"–დან ნიკა ტაბატაძის გუნდს გავყვეი. სხვებმა სამსახურები იშოვეს, მე კი ლონდონში წავედი სასწავლებლად. შემდეგ დავბრუნდი და წინასაარჩევნოდ მქონდა გადაცემა, რომელიც დიდხანს არ გაგრძელებულა. ომის პერიოდში, 2008 წელს, ალბათ ახსოვს მაყურებელს ჩემი ჟურნალისტური საქმიანობა. იმ დროს ორსულად ვიყავი და მალევე გავაჩინე საბა კოდუა. შემდეგ რადიო "იმედში" ვიყავი და იქიდან მოვხვდი ტელეკომპანია "იმედში". გიორგი ისაკაძემ შემომთავაზა სატელევიზიო ფორმატი. სამი წელი ვიმუშავე "იმედზე". იმ წრის გარდა, რომელიც ჩემს გადაცემაზე მუშაობდა, ტელეკომპანიის სხვა თანამშრომლებს არ ვიცნობდი. შევდიოდი, ჩემს საქმეს ვაკეთებდი და გამოვდიოდი. "რუსთავი 2"–ში რომ მოვდივარ, სახეზე ყველას ვიცნობ. მაპატიოს ყველა სხვა არხის წარმომადგენელმა, მაგრამ "რუსთავი 2" სხვა თემაა სატელევიზიო სივრცეში. ამას ვერ გაიგებ, თუ "რუსთავი 2"–ელი არ ხარ. ამას გამიგებს თუნდაც ნათია ლაზაშვილი, ნათია ზამბახიძე, დავით ნიკურაძე, ნიკა ტაბატაძე. ანუ აქ ვისაც უმუშავია, მიხვდებიან, რას ვგულისხმობ.
მე რომ "რუსთავი 2"–ში ვმუშაობდი, მაშინ იყო მხოლოდ ორი სართული, ანუ ძალიან პატარა სივრცე. დღეს უკვე ძლიერი ტელეკომპანიაა, რომელსაც აქვს დასავლური ტიპის პავილიონები, სამონტაჟოები და ა.შ. მიუხედავად იმისა, რომ ამ ახალ შენობაში მანამდე არ მიმუშავია, მაინც ისე მიცემს გული, თითქოს სახლში ვარ.
– მაყურებლის გარკვეული ნაწილი თქვენს შოუს და მაია ასათიანის გადაცემას ერთმანეთთან აიგივებს. მსგავსი ფორმატის გადაცემების ერთ არხზე გასვლა რამდენად მომგებიანი იქნება?
– ჩვენს გადაცემებს მსგავსი ფორმატი არ აქვს. მაყურებელი მათ ერთმანეთთან მხოლოდ ორი მარტივი მიზეზის გამო აიგივებს: ორივე გადაცემა აპოლიტიკურია და ეს შოუები იყო ცენტრალური არხების ერთ–ერთი გამწევი გადაცემები. ეს არის ჩვენი კონკურენტობის მთავარი განმსაზღვრელი. სწორედ ეს ვთქვი: ამ ორი კონკურენტი გადაცემის შიდა მობილიზაცია გაცილებით საინტერესო იქნება. ბაზარზე უკონკურენტოდ ყოფნა უინტერესოა. ეს იწვევს რეგრესს და დაობებას. კარგია რეიტინგებზე ყურება. მე და ნანა ლეჟავაც კონკურენტები ვიყავით, როცა "რუსთავი 2"–ში ვმუშაობდი. უფრო მეტიც, ჩვენ ყოველდღიურად ვიყავით კონკურენტები, ოღონდ კარგი გაგებით, ყოველდღიურად უნდა მოგვეძიებინა კრიმინალურ საკითხზე გადაცემის პირველი ნაწილის თემა. ჟურნალისტისთვის კონკურენცია საჭიროა. დარწმუნებული ვარ, მაია ასათიანისთვისაც ცუდი იქნება, თუ არ იქნება "ნანუკა ჟორჟოლიანის შოუ", ისევე როგორც ჩემთვის, თუ არ იარსებებს "პროფილი". კონკურენცია მოდუნების საშუალებას არ გაძლევს. და ახლა უფრო გამოჩნდება, რომ ჩემსა და მაია ასათიანის გადაცემებს შორის თემატური კონკურენცია ნაკლებია. კიდევ ერთხელ ვამბობ – ის არის ძალიან ძლიერი კონკურენტი.
– როგორ შეგხვდათ მაია ასათიანი, როცა "რუსთავი 2"–ზე დაბრუნდით?
– მაია ახლახან ვნახე. მე თვითონ მივედი და მისი თანამშრომლები გავიცანი. მაიამ ძალიან ღირსეული პოზიცია დაიკავა, ღირსეულად დამხვდა. მას აინტერესებს ჩვენი ერთად მუშაობის ახალი ჭრილი. ამბობდა, ქვეყანაში როგორი ამბები ხდება და ამ დროს ყველა კითხულობს, ნანუკა და მაია ერთმანეთს როგორ შეხვდებიანო. ამაზე ორივე გულწრფელად ვიცინოდით. ვფიქრობ, რომ ეს ჩვენი ურთიერთობის ახალი ფურცლიდან დაწყებაა. შიდა კონკურენცია მაინც მეგობრულია. სხვა არხზე მუშაობისას თუ გაქვს მიზანმიმართული სურვილი, სტუმარი მასთან კი არა, შენთან მოვიდეს, შიდა კონკურეციის დროს არხის ინტერესებს ითვალისწინებ. მე გუნდურ "რუსთავი 2"–ში გავიზარდე. "ერთი ყველასათვის, ყველა ერთისათვის" – ამ პრინციპით მუშაობა შემიძლია. ეს განწყობა "იმედზეც" გამყვა და ახლა ისევ "რუსთავი 2"–ს დავუბრუნე. გადაწყვეტილებებს ყოველთვის არხის ინტერესებიდან გამომდინარე ვიღებ. გამორიცხულია, ერთი ნანუკა იყოს კარგი, ან ერთი მაია, ან ერთი ვანო ჯავახიშვილი და ა.შ. ყველანი მაგრები უნდა ვიყოთ, რომ არხი საუკეთესო ფორმაში იყოს. შესაბამისად, მეც ამ თამაშის წესებით უნდა ვითამაშო.
– გადაცემის დაფინანსება ხომ არ შეიცვალა? მაგალითად, "ნანუკას შოუში" მაყურებელი ისევ იხილავს სიუჟეტებს საზღვარგარეთიდან?
– კი, სიუჟეტების გასაკეთებლად ისევ წავალ საზღვარგარეთ. ამ ქვეყანაში ხომ საერთოდ მითები იქმნება. რთულია ცხოვრება მაშინ, როცა ამ მითებს გიქმნიან და დინების საწინააღმდეგოდ გიწევს ცურვა. ცხოვრებაში ხშირად მქონია შემთხვევა, როცა ჩემს თავზე რაღაცას მიმტკიცებდნენ. იყო ჭორები, რომ ოჯახი დამენგრა ან რაღაც მითები მესმოდა ჩემს ქმარზე. თავიდან ყველას ყველაფერს ვუმტკიცებდი, მერე კი მივხვდი, რომ ამას აზრი არ აქვს. ეს არის დინება, რომელსაც უნდა გაუძლო და ამ ტალღამ არ უნდა წაგაქციოს.
ბევრჯერ დავრწმუნდი, რომ ცხოვრებაში ყოველთვის დგება ეტაპი, როცა ამ კითხვებზე პასუხს კარგად სცემ. ახლა დადგა ეს დრო, როცა შემიძლია პასუხი გავცე იმ კითხვას, მეუღლე აფინანსებდა თუ არა ჩემს საზღვარგარეთულ სიუჟეტებს. არამარტო ნანუკა ჟორჟოლიანი, ტელეკომპანია "იმედის" ახალი მფლობელებიც კი იმავეს იტყვიან, რომ ჩემი შოუ საზღვარგარეთ გასვლებით ტელეკომპანიაში თანხის შემომტანი იყო და არა – პირიქით, როგორც ამბობდნენ. ვიცოდი, რომ ამის ჩემს მეუღლესთან დაკავშირება პოლიტიკური მოტივით სჭირდებოდათ. ახლა მაინც ყველა მიხვდება, რომ "ნანუკას შოუ" მომგებიანი, კომერციული პროექტი იყო, რომელსაც უამრავი სარეკლამო პარტნიორი ჰყავდა და იმ კომპანიებისთვისაც, რომლებიც საზღვარგარეთ ფრენას ახორციელებდნენ, ჩვენთან თანამშრომლობა მომგებიანი იყო. მათ ხშირად უთქვამთ, სადაც გადაცემა გააკეთე, იქ ყველაზე მოთხოვნადი გახდა გამგზავრებაო. ამას განსაზღვრავს არა ჩემი სახელი და გვარი, არამედ გადაცემის რეიტინგი. იმავეს იზამდა მაია ასათიანის გადაცემაც, უბრალოდ მას არ აქვს ასეთი ფორმატი. ეს ჩვეულებრივი, აპრობირებული ფორმაა, რომელიც საიდან გადმოვიღე? "ელენის შოუდან". მე რეგიონებში ხშირად დავდივარ და იქ ჩემ მიმართ რა სიყვარულსაც ვგრძნობ, მაძლევს საშუალებას, ვიფიქრო, რომ "ნანუკას შოუმ" ყველაზე მთავარი – ხალხის სიყვარული მომცა.

– რა სიახლეები იქნება თქვენს გადაცემაში?
– ნანუკა ისევ ისეთი იქნება. ჩემს თავზე საუბარი არ მიყვარს, მაგრამ ამას ხაზი მინდა გავუსვა – "ნანუკა ჟორჟოლიანის შოუმ" სამი წლის განმავლობაში შეძლო ის, რომ პოლიტიკურად რადიკალური შეხედულებების მქონე ადამიანებიც ჰყავდა სტუმრად და მათ ძალიან კარგი პიარი უკეთდებოდათ. იქ მათ არავინ ლანძღავდა და არავინ უკირკიტებდა. გარკვეულწილად ეს გადაცემა შუა რგოლი იყო თავისი ნეიტრალიტეტით. მადლობა მინდა ვუთხრა ლიზა ბაგრატიონს, რომელმაც ერთ–ერთ რადიოში თქვა, რომ ეს იყო შოუ, რომელმაც ჩვენთვის არ დახურა კარიო. ძალიან ემოციური იყო ჩემთვის ამის მოსმენა. შესაბამისად, ამ ფორმატს შევინარჩუნებთ. ეს გადაცემა იქნება ყველასთვის. გვექნება 8 რუბრიკა: ჩემი შვილის, მარიამის რუბრიკა თინეიჯერებზე, ბლიცი, სახლებში სტუმრად სიარული, ქველმოქმედება, ექსკლუზივები და სხვა საინტერესო რუბრიკები. იქნება იგივე სტუდია, როსტო (ლევან როსტოშვილი) და ბუბუ. რაც მთავარია, ეს გადაცემა ქმნის ისტორიებს. როგორ არ გავიხსენო, რომ ჭაბუა ამირეჯიბზე მქონდა გადაცემა, გიზო ნიშნიანიძე და ზინაიდა კვერენჩხილძე ბოლოს ჩემთან ნახეს და ა.შ. ეს ოქროს არქივია.
– იმ პოლიტიკური ძვრების მერე, რაც საქართველოში მოხდა, ბუნებრივია, ჩნდება კითხვა და მეც უნდა დაგისვათ: როგორ ფიქრობთ, გადაცემის რეიტინგზე არ იმოქმედებს ის, რომ შეიძლება თქვენი, როგორც ერეკლე კოდუას მეუღლის, გამოჩენა ეკრანზე გამაღიზიანებელი იყოს?
– პარტია "ქართული ოცნების" წევრები თუ მხარდამჭერები ირაკლი კოდუას მეუღლის გადაცემაში მანამდეც დადიოდნენ სტუმრად და თან მაშინ ჩემი ქმარი ჯერ კიდევ მაღალჩინოსანი იყო. 11 წელია ჟურნალისტი ვარ და ამას ჩემი რესპონდენტებისათვის დაბრკოლება არასოდეს შეუქმნია. მათ ჩემი პოლიტიკური სიმპათია ან ანტიპათია არასდროს უგრძვნიათ და ახლაც ასევე იქნება. "ნანუკა ჟორჟოლიანის შოუ", კიდევ ერთხელ ვიტყვი, რომ არის ნეიტრალური. სხვათა შორის, ნათია ფანჯიკიძემ (ირაკლი ალასანიას მეუღლე) ჩემს გადაცემაში მაგარი სიტყვები მითხრა, რომელიც ეთერში გავიდა: "არ ვეთანხმები იმ მოსაზრებებს, რომ ქმრის ან ცოლის სტატუსი რამეს განსაზღვრავს ცხოვრებაში. ადამიანი ან შედგება ან – არა". ვეთანხმები.
– პროექტს "ცეკვავენ ვარსკვლავები" შევეხოთ, რომლის ჟიურის წევრიც იყავით. ალბათ გული დაგწყდათ, ამ პროექტს რომ გამოეთიშეთ.
– არ მიყვარს ჟურნალისტები, რომლებიც სადაც ჭამენ, იქ ისაქმებენ. სადაც თუნდაც ერთი დღე გაგიტარებია, პატივი უნდა სცე. მინდა, გულით ვუთხრა მადლობა "იმედს" იმ სამწლიანი ურთიერთობისთვის, რომელიც ჩემი ცხოვრებიდან არ ამოიშლება. მათ და შესაბამისად ამ ტელეკომპანიის ყველა პროექტს წარმატება მინდა ვუსურვო. მე რომ ახლა "რუსთავი 2"–ზე არ ვმუშაობდე, ამ კითხვაზე ობიექტურად გიპასუხებდით, მაგრამ კონკურენტ არხზე ყოფნა არ მაძლევს საშუალებას, ვიყო გულწრფელი, ამიტომ ამ კითხვაზე კომენტარს არ გავაკეთებ.
– მაგრამ მაინც გკითხავთ თქვენი სტატუსის შესახებ, რომელიც "ფეისბუქზე" დაწერეთ, სადაც აღნიშნეთ, რომ გოჩა ჩერტკოევის მაგივრადაც მარინა ბერიძე ზის ჟიურიში. ამაზე ქალბატონმა მარინამ მოგწერათ პასუხად, რომ ვერ მიხვდა, რატომ გაქვთ მის მიმართ ღვარძლი. რატომ დაწერეთ ეს?
– ეს სტატუსი ხუმრობით დავწერე. ამ პროექტის მთავარი "კოზირი" გოჩა ჩერტკოევი იყო ჩემთვის. მარინა ბერიძემ აიღო ინიციატივა, რომ გოჩას ნიშა დაეკავებინა... ხუმრობით დაწერილ სტატუსს მარინას მწვავე რეაქცია მოჰყვა. მინდა, წარმატებები ვუსურვო მარინა ბერიძეს, იმიტომ, რომ ვიცი, მისი მთავარი სურვილი ყოველთვის ჟიურიში ჯდომა იყო და ნამდვილად კარგად ახერხებდა ამას. მინდა, დიდხანს შეძლოს "იმედმა" ამ პროექტის შენარჩუნება და, თავის მხრივ, პროექტმა – სახეების.
მანანა ნოდია