"შეყვარებულის დაქალი შემიყვარდა"

"გადამგდები" ბიჭი არ ვარ. ყოველთვის ვცდილობ, სიტყვა შევასრულო. ტყუილს ვერასოდეს ვიტანდი და ახლა ამიტომაც ვარ ცუდ დღეში, რადგან ტყუილებში მიწევს ცხოვრება. ვატყუებ ადამიანს, რომელიც გულით მიყვარს.
შეყვარებული ვარ ერთ ძალიან კარგ გოგოზე. მასაც ვუყვარვარ. უკვე ერთი წელია, ერთად ვართ. მას დაქალი ჰყავს, ასევე კარგი გოგო. თუმცა მას, როგორც ქალს, არასოდეს ვუყურებდი. მასთან ვმეგობრობდი და სულ ეს იყო ჩვენი ურთიერთობა. ერთ დღეს კი ჩვენ შორის რაღაც მოხდა და სულ სხვა თვალით დავინახე.
ჩვენი საერთო ნაცნობის დაბადების დღეზე ვიყავით. ის საოცრად ლამაზი იყო. მარტო მე კი არა, სუფრასთან ვინც ვისხედით, ყველა მოგვხიბლა, ყველასგან გამორჩეული იყო. თან ძალიან ნაზი და საყვარელია. შემიყვარდა. ვგრძნობ, რომ ჩემ მიმართ არც ის არის გულგრილი, მაგრამ ჩვენთვის ძვირფას ადამიანს გული როგორ ვატკინოთ? შეყვარებულის მიმართ ვერ ვგრძნობ იმას, რასაც მისი დაქალის დანახვისას განვიცდი. სულ იმის ნატვრაში ვარ, რომ ვნახო, დაველაპარაკო.
ბოლო დროს ხშირად მივდივარ მის სახლთან და ველოდები, როდის გამოვა. სკოლამდე ვაცილებ. ორივე ჩუმად ვართ. არ ვუტყდები, მიყვარხარ–მეთქი, მაგრამ ვხვდები, რომ გრძნობს. მე ვიმიზეზებ, რომ იქით ჩემი ძმაკაცი ცხოვრობს და მის სანახავად დავდივარ. ამ დროს კი "შემთხვევით" მასაც ვხვდები. არადა ორივემ ვიცით, რომ ეს სიმართლე არ არის.
ვიცი, არაკაცურად ვიქცევი. რომ წარმოვიდგენ ხოლმე ჩემი შეყვარებულის სახეს, როცა ამ ამბავს გაიგებს, ძალიან ვნერვიულობ. არ მინდა, გული ვატკინო, მაგრამ მეტის მოთმენა აღარ შემიძლია. ამ ტყუილებით დავიღალე.
მკითხველი, 17 წლის