ახალბედა მომღერლის პირადი ცხოვრება

სოფო ნინოშვილი პროექტის - "ახალი ხმა"მონაწილე გახლავთ. მან ჟიური პირველსავე ტურში მოხიბლა - სიმღერის დაწყებიდან რამდენიმე წამში ჟიურის სამი წევრი მისკენ შეტრიალდა, ბოლოს კი დათო ფორჩხიძემაც დააჭირა თითი ღილაკს. სოფო მაცდური არჩევნის წინაშე დადგა, მაგრამ მომღერალმა სტეფანესა და მაიას გუნდში ყოფნა ამჯობინა...
ცნობისათვის, სოფომ "რინგის ტურში"ეკა ამყოლაძეს მოუგო, "ლაივ ტურს"კი სამწუხაროდ, გამოეთიშა.

- სიმღერა ადრეული ასაკიდან დავიწყე. დედა ვოკალის პედაგოგია და გორში საკუთარი სტუდია აქვს. ჩემზე, რა თქმა უნდა, იმანაც იქონია დიდი ზეგავლენა, რომ პატარაობიდანვე სცენაზე ვიდექი, სხვადასხვა კონკურსში ვმონაწილეობდი, ვთამაშობდი სპექტაკლებში. გამიმართლა, რომ "ახალ ხმაშიც"მოვხვდი... სხვათა შორის, ძალიან მინდა, ჩემი მომავალი პროფესია სცენას დაუკავშირდეს - თეატრალურ უნივერსიტეტში ვაპირებ სწავლის გაგრძელებას. წესით, წელს უნდა ჩამებარებინა, მაგრამ ამ პროექტის გამო სწავლის გაგრძელებაც გადავდე... ვხვდები, რომ ჯერ ბევრი რამ მაქვს სასწავლი. დედას გარდა, სხვა ვოკალის პედაგოგთან არასდროს მივლია. მშობელი მასწავლიდა ცეკვასაც და სიმღერასაც. მას უნდა, რომ წარმატებული ვიყო, ყველაფერში ხელს მიწყობს და ამიტომ მისი მადლობელი ვარ.

- როგორც აღნიშნე, პატარაობიდანვე მღერი. აქამდე რომელიმე სხვა მუსიკალურ პროექტში მონაწილეობის სურვილი არ გაგჩენია?
- მშობლები, მეგობრები, ახლობლები სულ იმას მეუბნებოდნენ, რომ "ჯეოსტარში"ან "ვარსკვლავების აკადემიაში"მიმეღო მონაწილეობა. თუმცა, რატომღაც, ამის სურვილი თავად არ მქონდა. ალბათ, ამ პროექტების ფორმატი არ მომწონდა. მაგრამ "ახალი ხმის"შესახებ რომ შევიტყვე, გადავწყვიტე, ბედი აუცილებლად მეცადა.

- ჟიურის წევრები შენმა ნამღერმა პირველსავე წამებში აღაფრთოვანა: ჯერ სამი მათგანი შემოტრიალდა, ბოლოს კი დათო ფორჩხიძეც მოიხიბლა შენი ხმით...
- სიმღერა პროექტის პროდიუსერებთან შეთანხმებით შევასრულე. მაქსიმალურად ვეცადე, მასში ყველაფერი ჩამედო. ჩემი გამოსვლა ორი წუთი გრძელდებოდა. ვიცოდი, ამ დროში შესაძლებელი იყო ჩემი ცხოვრების შეცვლა... როდესაც დავინახე, რომ მწვრთნელები შემოტრიალდნენ, საოცარი ემოცია დამეუფლა. მერწმუნეთ, ის წუთები არასოდეს დამავიწყდება.

- რატომ აირჩიე მაინცდამაინც მაიასა და სტეფანეს გუნდი?
- იცით, სცენაზე გასვლის წინ იმედი მქონდა, რომ რომელიმე მწვრთნელი შემოტრიალდებოდა, მაგრამ ოთხივე თუ დააჭერდა თითს ღილაკს, ნამდვილად არ მეგონა. თავიდან, როდესაც ტელევიზიით პრომო გავიდა და იქ მაია და სტეფანე ვნახე, მაშინვე ვთქვი, რომ მინდოდა, მათ გუნდში ვყოფილიყავი. რატომ? - იმიტომ, რომ მეც იმ სტილის მუსიკას ვასრულებ, რასაც სტეფანე და მაია. მერწმუნეთ, მთავარი მიზეზი ეს იყო და ახლა ამ არჩევნით კმაყოფილი ვარ.

- "რინგზე"შენ გაიმარჯვე. როგორ ფიქრობ, რამდენად ღირსეულად გადახვედი მომდევნო ტურში?
- ძალიან ძლიერ კონკურენტთან - ეკო ამყოლაძესთან ერთად შევასრულე დუეტი. ის კარგი მომღერალი და ადამიანია. თუმცა, ვფიქრობ, ჩემი გადასვლა შემდგომ ეტაპზე სამართლიანი იყო. მოგეხსენებათ, "ახალი ხმა"ერთგვარი შოუა და ალბათ, ჟიურის წევრებმა ჩემში უფრო მეტად დაინახეს ის, რაც კონკრეტულად ამ პროექტს სჭირდება.

- "ლაივ შოუმდე"მიხვედი, შემდგომ კი პროექტს გამოეთიშე...
- სიმღერა, რომელიც "ლაივ შოუზე"უნდა მემღერა, მწვრთნელებთან ერთად შევარჩიე და მაქსიმალურად მქონდა მორგებული, გათავისებული. ვფიქრობ, ეს ჩემს ნამღერსაც ეტყობოდა. ვცდილობდი, შემდეგ ტურში გადასასვლელად ყველაფერი გამეკეთებინა. თუმცა, ინტუიცია მკარნახობდა, რომ "ლაივ შოუზე"პროექტის დატოვება მომიხდებოდა. რა თქმა უნდა, ამის გამო გული დამწყდა, თუმცა, არც ისე, რომ დეპრესიაში ჩავვარდნილიყავი. მთავარი ის არის, რომ ჩემი გასაკეთებელი კარგად გავაკეთე!

- საინტერესოა, რა ხდებოდა კულისებს მიღმა?
- გუნდის წევრები ერთი ოჯახივით ვიყავით. ყოველდღე რეპეტიციები გვქონდა, მაია და სტეფანე კი შეძლებისდაგვარად, მხარში გვედგნენ. ისინი ძალიან მაგარი ადამიანები არიან. პროექტის თითოეულ მონაწილესთან მეგობრული დამოკიდებულება ჰქონდათ და ცდილობდნენ, ჩვენი მონაცემების მაქსიმალურად გამომჟღავნებაში დაგვხმარებოდნენ.

- შენს ოჯახზე მიამბე. და-ძმები თუ გყავს?
- დედას ჰქონდა ანსამბლი - "ცისარტყელა", სადაც ცეკვასა და სიმღერას ასწავლიდა. გაგიკვირდებათ და, დიზაინერის პროფესიასაც ითავსებდა. მახსოვს, ხალხს უკვირდა, - ამდენ რამეს როგორ ასწრებსო? მას იმდენად უყვარს თავისი საქმე, რომ როგორც ამბობს, დაღლას საერთოდ ვერ გრძნობდა. შიდა კონკურსებზე ჩვენს ანსამბლს ბევრი ჯილდო, გრან-პრი აქვს მიღებული და შეიძლება ითქვას, რომ სახლში ამ ჯილდოებისა და დიპლომების "კედელი"გვაქვს...

მყავს ორი უმცროსი ძმა. მიუხედავად იმისა, რომ ოჯახში ყველანი ვმღერით, ჩემს ერთ-ერთ ძმას - ლევანს არასდროს ჰქონია სიმღერის სურვილი, უფრო მეტიც - მისი წაღიღინებაც კი არ მახსოვს. სამაგიეროდ, ფეხბურთი უყვარს ძალიან. რაც შეეხება მეორე ძმას, ის სკოლაში სწავლობს, სიმღერის ნიჭი აქვს და მომავალში სცენაზე გასვლის სურვილი თუ გაუჩნდება, ეს ამბავი ძალიან გამახარებს. რაც შეეხება მამას: მასთან ახლო ურთიერთობა მაქვს. ის მხარში მიდგას და ხელს მიწყობს, რომ წარმატებული კარიერა მქონდეს. მის ამაგს ძალიან ვაფასებ.

- პირად ცხოვრებაზე რას მეტყვი? როგორც ვიცი, შეყვარებული ხარ...
- (იცინის) შეყვარებული ნამდვილად მყავს. შეიძლება ითქვას, რომ ძალიან, ძალიან ვარ შეყვარებული. ზოგი ამბობს, - სიყვარული ადამიანს წარმატების მიღწევაში ხელს უშლისო. ვფიქრობ, ჩემს შემთხვევაში პირიქით არის - შეყვარებული ყველანაირად მეხმარება, რომ რაც შეიძლება მეტს მივაღწიო; უნდა, ყველა ოცნება ავისრულო... ის ჯერჯერობით, სწავლობს და ამიტომაც, დაოჯახებაზე ლაპარაკი ნაადრევია. გვინდა, ჯერ კარიერა ავიწყოთ, ოჯახის შექმნას კი მერეც მოვასწრებთ.

ჟანა გოგინაშვილი

ჟურნალი ”გზა”