ანა იმედაშვილმა მექალთანე ქმარი მოარჯულა

მუსიკალურ პროექტ "ახალი ხმის" სახე, ანა იმედაშვილი, ამავე პროექტის პროდიუსერის, რეჟისორ დათო იმედაშვილის მესამე ცოლია. დათოს მაღალი ქალები ყოველთვის მოსწონდა და ანაც მათ რიცხვში აღმოჩნდა. 6 წელია სახლშიც და სამსახურშიც ერთად არიან, თუმცა დათოს ურჩევნია, ცოლი შინ იჯდეს და გემრიელ ვახშამს ახვედრებდეს.
ანამ მექალთანე ქმარს ყველა "საეჭვო" გოგო ჩამოაშორა, ახლა კი ისღა დარჩენია, მხოლოდ ტექნიკაზე იეჭვიანოს, რომელთანაც დათო დიდ დროს ატარებს.
– ვინც თქვენს წყვილს იცნობს, ყველამ იცის, რომ სადაც დათოა, იქ ყოველთვის ანაცაა. ერთად მუშაობა მოგწონთ?
ანა: მე და დათო სულ ერთად ვმუშაობთ. მის კომპანია "დის ფიქჩერსში" მეც მაქვს ჩემი სამუშაო. თუ აქამდე ეკრანზე არ ვჩანდი, ეს იმის გამო, რომ ბევრ საქმეს ვაკეთებდი კადრმიღმა. ფილმ "ოცნების ქალაქში" და პროექტ "ახალ ხმაში" შემთხვევით მოვხვდი. დათო კი თვლის, რომ ჩვენი ერთად მუშაობა საშინელებაა, მაგრამ მე მომწონს. მისგან შენიშვნებსაც ვიღებ და ვითვალისწინებ.
დათო: ანასთან მუშაობა სასიამოვნოა, თუმცა მაინც ვთვლი, რომ ცოლ–ქმრის ერთად მუშაობა კარგი არ არის. როცა ცოლთან ერთად ხარ სახლშიც და სამსახურშიც, მგონია, რომ ეს რაღაცეებს აუფერულებს.
– ალბათ სახლშიც მუდმივად პროექტებზე საუბრობთ.
ანა: მე – არა, დათო კი 24 სათიან რეჟიმში მუშაობს. მგონი, ძილშიც საქმეებზე ფიქრობს. დასასვენებლადაც რომ მივდივართ, ორ დღეში იწყებს ლაპარაკს, რომ ბევრი საქმე აქვს და ჯობია, დაუბრუნდეს სამუშაოს.
დათო: ოჯახის წევრებისგან მუდმივად ვისმენ საყვედურებს, რომ მათთან ურთიერთობის დროს მაინც გამოვეთიშო საქმეს, მაგრამ მე არ შემიძლია და არც მიცდია. როცა საკუთარი კომპანია გაქვს, მაშინ ვერ შეძლებ, რომ მასზე დღეში მხოლოდ 12 საათი იფიქრო. საკუთარი საქმე 24 საათიან ფიქრს მოითხოვს. მირჩევნია, ასეთ რეჟიმში ვიცხოვრო, ვიდრე ვიმუშაო ვინმეს კომპანიაში.
– დათო, თქვენს პროექტ "ახალ ხმაში" საკუთარი ცოლის გამოჩენა რატომ გადაწყვიტეთ?
დათო: ანა რომ ტელეწამყვანი გამხდარიყო, ამის ინიციატორი არ ვყოფილვარ, მაგრამ, რა თქმა უნდა, იმ ფაქტმა, რომ ჩემი ცოლია, გარკვეული როლი ითამაშა. თან ბევრი რამე დაემთხვა ერთმანეთს. თავიდან ანა გადაცემის რეპორტიორი უნდა ყოფილიყო, წამყვანი – მხოლოდ დუტა. ისე მოხდა, რომ დუტა იმ პერიოდში მინსკში იყო ფილმის გადაღებებზე და ამიტომ რამდენიმე ეპიზოდი ისე ჩავწერეთ, რომ ანა იყო წამყვანი.
ანა: ყოველთვის მქონდა სურვილი, რომ ეკრანზე ვყოფილიყავი, მაგრამ დათოს ეს არასდროს მოსწონდა.
– რატომ?
დათო: მე ჩემი მიდგომა და ხედვა მაქვს. ჩემი ცოლი წარმომიდგენია ჩემს სამყაროში, სადაც ტელევიზია არ ფიგურირებს, თუმცა მაინც სასიამოვნოა, როდესაც შენს ცოლს ეკრანზე უყურებ.
ანა: 20 წლის ვიყავი, როცა დათო გავიცანი და მაშინ ვფიქრობდი, იქნებ სამსახიობოზე ჩავაბარო–მეთქი, მაგრამ, როცა ეს აზრი დათოს გავანდე, აშკარად არ მოეწონა. მივხვდი, რომ მსახიობი ცოლი არ უნდოდა და მეც გადავიფიქრე.
– თუმცა ერთი შეხედვითვე ჩანს, რომ ანა არ მიეკუთვნება იმ ქალების კატეგორიას, ვისაც სახლში ადვილად გამოკეტავ.
დათო: თუ მოვინდომე, ახლაც შემიძლია სახლში დავსვა და გამოვკეტო. უბრალოდ ვგრძნობ, რომ ანას ძალიან მოსწონს, რასაც ვაკეთებ და სურვილი აქვს, რომ ამაში მუდმივად იყოს ჩართული.
ანა: დათოს ყველგან თან დავყავდი და ძალაუნებურად შემაყვარა ის საქმე, რასაც აკეთებს. ახლა კი ნანობს.
– დათო, ანას მიმართ როცა კრიტიკას ისმენთ, როგორ რეაგირებთ?
დათო: ანას მისამართით ნებისმიერ კრიტიკას ჯანსაღად აღვიქვამ. აქ ყველა ხვდება, რომ მის მიმართ მოთხოვნები ორ–სამჯერ მაქვს გაზრდილი, ვიდრე სხვების მიმართ.
ანა: მგონია, რომ დათოს ამ მიდგომით უფრო მეტად ვიჩაგრები. დათოსგან არასდროს მომისმენია ქება, თუ რა კარგად ვმუშაობ ეკრანზე.
დათო: მიუხედავად ჩემი სკეპტიკური განწყობისა, უნდა ვაღიარო, რომ ანას ტელეწამყვანობის ნიჭი აღმოაჩნდა. ეკრანზე თავისუფლად და მარტივად მუშაობს. რაც მთავარია, ფიზიკური მონაცემებიც ხელს უწყობს, რომ იყოს ეფექტური.
ანა: დიდი მადლობა "სარკეს", რომ დათოს ეს სიტყვები ათქმევინეთ!
დათო: მაგრამ მალე დავასრულებ ანას სატელევიზიო კარიერას, რადგან მეზარება. ჩემი ცოლი რომ არ იყოს, კი, ბატონო, იყოს ტელეწამყვანი და მსახიობი. წარმოიდგინეთ, ანა აქ რომ არ მუშაობდეს, რამდენ ახალ გოგოს გავიცნობდი, "წავეფლირტავებოდი".
ანა: მიჩვეული ვარ დათოს ამგვარ ხასიათს. 7 წელი სამეჯლისო ცეკვებს ვცეკვავდი. ახლა, როდესაც ეს ცეკვები აქტუალური გახდა, დათოს ვეუბნებოდი, კარგი იქნებოდა, ეს საქმე გამეგრძელებინა–მეთქი. მან კი პირდაპირ მითხრა, გააგრძელებდი ცეკვას და ჩემი ცოლი არ იქნებოდიო. მოცეკვავე ანა მოეწონებოდა, მაგრამ ცოლად არ მოუნდებოდა. უცნაური მიდგომა აქვს.
დათო: როცა მაწყობს, ტიპური ქართველი ვარ, თუ არა და – თავისუფალი ევროპელი.
ანა: მიუხედავად ყველაფრისა, ძალიან კომფორტული ადამიანია. ვიცი, ბევრი მამაკაცი როგორ ზღუდავს თავის ცოლს. დათო კი სრულ თავისუფლებას მაძლევს, ჩაცმაში მეტ სითამამეს მთხოვს. ერთადერთი ალბათ ის უნდა, რომ სახლში მისვლისას ცოლი ხვდებოდეს და ვახშამს უმზადებდეს. დათოს ცოლად რომ გავყევი, მომთხოვა, სახლშიც მაღალქუსლიანი ფეხსაცმელებით მევლო. მანამდე კედებიანი გოგო ვიყავი. ერთხელაც ქუსლებზე შემდგარი სარეცხს ვფენდი და აივნიდან კინაღამ გადავვარდი.
– როგორი იყო თქვენი რომანის დასაწყისი?
ანა: ერთმანეთი მაშინ გავიცანით, როდესაც დათოსთან რადიოში მივედი სამუშაოდ. ძალიან სწრაფად მოხდა ყველაფერი. გაცნობიდან ორ თვეში უკვე ერთად ვცხოვრობდით. ყოველთვის მეცინებოდა, როდესაც ადამიანები ამას ამბობდნენ, მაგრამ ახლა მეც იგივე უნდა გავიმეორო – ეს იყო ის ადამიანი, ვინც მჭირდებოდა.
– ანა, დათოს რომ მექალთანის იმიჯი ჰქონდა, თანაც ორ ცოლს იყო გაშორებული, ეს თქვენთვის ბარიერი არ იყო?
ანა: დათო მართლაც საოცარი მექალთანე იყო. ყოველ ჯერზე სხვადასხვა გოგონებთან ერთად მოდიოდა კლუბში და წვეულებაზე. როცა ურთიერთობა დავიწყეთ, უნდა გენახათ, რამდენი გოგო ხვდებოდა მას კლუბში მისვლისას, შოკირებულიც კი ვიყავი, მაგრამ მერე მივეჩვიე და უკვე ვხალისობდი. უნდა გენახათ მათი სახეები, როცა ეტყოდა, ეს ჩემი ცოლიაო. ასე თავისთავად გაიფანტა ყველა გოგო მის გარშემო. რეალურად დათო ძალიან ერთგული ადამიანია.
– დათო, როცა უკან ორი ქორწინება გქონდათ მოტოვებული, მესამე ალბათ უკვე ძალაიან ადვილად გადაწყვიტეთ.
დათო: როცა ანასთან დავიწყე ურთიერთობა, არ ვფიქრობდი, ის ჩემი ცოლი გახდებოდა თუ არა, მაგრამ ურთიერთობამ თავად შეიძინა მასშტაბები. ყველაზე მეტად ის მომწონს, რომ ანას ჩემ გვერდით არც ერთ ცუდ პერიოდში უკან არ დაუხევია. როცა ვამბობ, რომ ამ საქმეში ყველაფერს ვდებ, ანას მხრიდან სრული მხარდაჭერა მაქვს.
– დათო, ოჯახი ორჯერ რატომ დაგენგრათ, რა შეცდომები დაუშვით?
დათო: ძნელი სათქმელია. პირველი ცოლი რომ მოვიყვანე, 17 წლის ვიყავი და 18 წლისა უკვე მამა გავხდი. არც ერთი ოჯახის დანგრევა ყოფილა რთული და დრამატული. უბრალოდ სინქრონში ცხოვრება ვერ შევძელით და სულ ეს იყო. დღემდე არაჩვეულებრივი ურთიერთობა მაქვს ჩემს ყოფილ ცოლებთან და მათ დიდ პატივს ვცემ. თითოეულ მათგანთან თითო შვილი მყავს. ცხოვრების ბოლომდე მათ გვერდით ვიქნები. ჩემი შვილების ცხოვრებაში აქტიურად ვარ ჩართული და ისინი – ჩემს ცხოვრებაში.
– ანა, თქვენ როგორი ურთიერთობა გაქვთ დათოს ყოფილ ცოლებთან?
ანა: ძალიან ნორმალური. შეიძლება დაქალები არ ვართ და საიდუმლოებებს არ ვუყვებით ერთმანეთს, მაგრამ შესანიშნავი ურთიერთობა გვაქვს. რა თქმა უნდა, შეხების წერტილი ბავშვები არიან. დათოს შვილებთან კარგი ურთიერთობა მაქვს. ბავშვების დაბადების დღეებზე ყველა ერთად ვიკრიბებით. შეიძლება დათოს დედასთან წავიდე და უცებ იქ მოვიდეს დათოს პირველი ცოლი.
არ მესმის, როდესაც ქალებს უჭირთ ქმრის ყოფილ ცოლებთან ურთიერთობა. ამ დროს უნდა გააცნობიერო, რომ თუ შენს ქმარს უნდოდა იმ ადამიანთან ცხოვრება, ჰქონდა ამის შანსი, მაგრამ თუ ახლა შენ ხარ მის გვერდით, ეს ნიშნავს, რომ ის ურთიერთობა დამთავრდა, წარსულში დარჩა.
დათო: ადამიანთან ურთიერთობას მაშინ ვამთავრებ, როდესაც ის ვეღარ მომყვება და ცდილობს, დამამუხრუჭოს. ანა დღემდე ჩემს ფერხულშია ჩაბმული. არ უცდია, ჩემს აკვიატებებს ხელი შეუშალოს. საკმარისია, ეს მოხდეს, ჩვენი ურთიერთობა მაშინვე გაფუჭდება. არანაირ ფასად არ ვთმობ ჩემს აკვიატებებს!
– ისეთი შთაბეჭდილება რჩება, რომ ანა მუდმივად შემართული უნდა იყოს თქვენ გვერდით.
ანა: ამ ინტერვიუთი ასე გამოჩნდა, რომ მე ვზრუნავ დათოზე, მაგრამ რეალურად ის უფრო მეტად ზრუნავს ჩემზე. მისი დამსახურებით მაქვს სიმშვიდე, ფინანსურად უზრუნველყოფილი ვარ. ცხოვრებაში არაფრის მეშინია, დათოს გვერდით თავს მაქსიმალურად დაცულად ვგრძნობ. 6 წელია ერთად ვართ და მრავალფეროვანი ცხოვრება გვაქვს. ზოგჯერ შეიძლება 20 წელი იცხოვრო ადამიანთან, მაგრამ ასეთი საინტერესო არ იყოს. მსიამოვნებს დათოზე ზრუნვა. ყველა კერძი, რომელიც კი რესტორანში მოსწონებია, მისწავლია და სახლში გამიკეთებია. სუშისაც კი ვაკეთებ.
– დათო ალბათ საჩუქრებსაც ხშირად გჩუქნით.
ანა: ამ მხრივ ძალიან განებივრებული ვარ. მანქანაც კი მაჩუქა, თანაც ისე მოულოდნელად, რომ შოკში ჩავვარდი. თუ მოგწონს ეს მანქანა, შენიაო, მითხრა. ხშირად კაბებსაც ყიდულობს ჩემთვის. ამერიკაში რომ იყო, იმ ქუჩაზე, სადაც ჯულია რობერტსი ფილმში "ლამაზმანი" შოპინგობს, გაიარა და აურება კაბა იყიდა ჩემთვის. იქიდან ორი ჩემოდნით ჩამომიტანა და ყველა ზუსტად იყო ჩემს ტანზე მორგებული.
– თქვენი ურთიერთობა ეჭვიანობისაგან სრულიად თავისუფალია?
ანა: მე ვარ ეჭვიანი, დათო – არა. ამ ბოლო დროს ტექნიკაზე ვეჭვიანობ, რადგან დათოს შეუძლია 24 საათი მასთან იყოს – კომპიუტერი, ტელეფონი... სულ მინდა, ეს ტექნიკა გადავმალო.
– ანუ მექალთანე დათო მოარჯულეთ?
ანა: ზოგადად დათო აღმერთებს სილამაზეს და ლამაზ ქალებსაც. თან ზოდიაქოთი კუროა და ესეც ხელს უწყობს.
– დათო, ანა ძვირი შესანახი ცოლია თავისი ქალური მოთხოვნებით?
დათო: საერთოდ კარგი ქალი ყოველთვის ძვირი შესანახია, მაგრამ ანას პრეტენზიული მოთხოვნები არ აქვს. არ მახსოვს, ჩემთვის ეთქვას, ნახე, ჩასაცმელი არაფერი მაქვსო.
ანა: ერთადერთი, დათოს ნევრებს ვუშლი კითხვით: "რაზე ფიქრობ?". სულ ჩაფიქრებულია და მაინტერესებს, რა ხდება მის თავში.
ავთო ჩიტიძე