გიორგი პავლიაშვილი: "ჩემი შეყვარებული შტერი ბავშვი აღმოჩნდა და დავშორდი"

რეპერ მასტერს, ანუ გიორგი პავლიაშვილს, როცა შეყვარებულია, მუზები აკითხავენ. ისიც წერს და წერს ლექსებს და სიმღერებს. ნამდვილი სიყვარულით ერთხელ უყვარდა, მაგრამ ლამაზი გრძნობა მოულოდნელად დასრულდა და გულში დიდი ტკივილი დაუტოვა. ახლა მის ცხოვრებაში ქერა ქალია, რომელმაც გული გაუთბო, მაგრამ ამ ურთიერთობას ჯერ სიყვარულს ვერ არქმევს. ეძებს ისეთ გოგონას, რომელიც მთელი ცხოვრება მის გვერდით იქნება და განშორება არასოდეს მოუწევს.
მეამბოხე მუსიკის მიმდევარი მასტერი შინაგანად ძალიან ტრადიციულია, ოჯახურ და ქრისტიანულ ფასეულობებს დიდ პატივს სცემს და ქალისგანაც იმავეს ითხოვს.
– გიორგი, როგორ ფიქრობთ, სასურველი სასიძო ხართ?
– სიმართლე გითხრათ, ამაზე არც მიფიქრია, თუმცა... ალბათ ვარ. თავი როგორ შევიქო, მაგრამ უნდა გითხრათ, რომ კარგად აღზრდილი და კარგი ოჯახის შვილი ვარ! გოგონებთან მიმართებაში კი ჯენტლმენი ვარ. ნებისმიერი სტატუსის მქონე ქალს ვცემ პატივს და, რაც მთავარია, ტყუილი არ მიყვარს. ქალთან ურთიერთობაში ყოველთვის ზედმეტად მართალი ვარ, რაც მშვენიერ სქესსაც მოსწონს.
– ამართლებს ქალთან ასეთი ურთიერთობა?
– ხშირ შემთხვევაში არ ამართლებს. მეგობრები ყოველთვის მეუბნებიან, არის რაღაცეები, რაც ქალთან არ უნდა თქვაო, მაგრამ, როცა ვიტყუები, თავს ცუდად ვგრძნობ. ტყუილის თქმას მირჩევნია, ამა თუ იმ თემაზე საერთოდ არ ვილაპარაკო. თუ შემეკითხებიან, ვინც უნდა იყოს, ყველა ვარიანტში სიმართლეს ვეტყვი.
– როგორი გოგონები მოგწონთ?
– მაქვს რაღაც კრიტერიუმები, რითაც ქალს ვაფასებ. "ფეისბუქის" გვერდზეც ჩამოვწერე და 20–მდე ავედი, მაგრამ ეს იმას არ ნიშნავს, რომ ძალიან პრეტენზიული ვარ. ვაფასებ გოგოს, რომელიც თავის მშობლებს დიდ პატივს სცემს. თუ შევატყობ, რომ დედას ან მამას ტელეფონით უხეშად ელაპარაკება, არამარტო მასზე, მთელ მის ოჯახზე წამიხდება შთაბეჭდილება. ვფიქრობ, რომ ოჯახში ყველას თავისი სტატუსი უნდა ჰქონდეს, შვილს მშობლების რიდი გააჩნდეს. 23 წლის ვარ და ამ ხნის განმავლობაში ჩემი მშობლებისთვის ხმამაღალი სიტყვა არ მითქვამს. მამასთან ხმას არც და ვერც ავუწევ, რადგან მისი ძალიან მერიდება. მშობლებთან ვმეგობრობ.
– დედ–მამა თქვენს პირად ცხოვრებაში ერევიან?
– დედასთან იმდენად მეგობრული ურთიერთობა მაქვს, რომ იცის, როგორი რძალიც ეყოლება. ჩემს გემოვნებას ბოლომდე ენდობა. ჯერჯერობით დაოჯახებას არ ვგეგმავ. მამაჩემი კი სულ მეუბნება, სასწრაფოდ მოიყვანე ცოლიო. შვილიშვილი უნდა. მამა, ძალიან დიდი ბოდიში, მაგრამ ცოლს ჯერ ვერ მოვიყვან! ამ საკითხს ძალიან სერიოზულად ვუყურებ. ჩემი მშობლები გაშორებულები არიან. მე კი მინდა, რომ ერთხელ დავქორწინდე და მყარი ოჯახი მქონდეს!
– როგორი გოგოები არ მოგწონთ?
– ათეისტი არამარტო გოგო, საერთოდ ადამიანი არ მიყვარს. ბოლო დროს ათეისტი გოგონები მომრავლდნენ და მათთან ურთიერთობა დისკომფორტს მიქმნის. ისინი უფალზე ქილიკობენ, რაც ჩემთვის გამაღიზიანებელია. ჩემი აზრით, ეს ყველაფერი გლობალიზაციის ბრალია. ამერიკაშიც მიცხოვრია და იქაც ასე იყო, რელიგია ბოლო პლანზე ჰქონდათ გადაწეული. ერთ კვირას ბაპტისტები იყვნენ და მეორე კვირას სხვა რელიგიის მიმდევრები ხდებოდნენ. შევამჩნიე, რომ ამას ჩვენი გოგოები თანამედროვეობად მიიჩნევენ. მე თვითონ ზომიერად მორწმუნე ვარ. ჩემი მოძღვარი სვეტიცხოველში მსახურებს.
– ამერიკელ გოგონებთან გქონდათ ხანგრძლივი ურთიერთობები?
– 4–5 თვიანი ურთიერთობა მქონია და ეს არ იყო სერიოზული. სხვათა შორის, ქართველი გოგონები მათ ბევრ რამეში სჯობნიან.
– მაგალითად, რა უპირატესობა აქვთ?
– მაგალითად, თუ ქართველმა შეყვარებულმა შემთხვევით გაიგო, რომ ვიღაც გოგოსთან ერთჯერადი ურთიერთობა მქონდა, უბრალოდ გავიარე, ამ ფაქტს ნორმალურად აღიქვამენ, გაგებით ეკიდებიან. ამერიკაში კი ასე არასოდეს მოხდება. ქალი ასეთ დროს კი არ გაბრაზდება, გაგიჟდება! საერთოდ იქაური ქალები ძალიან თავისუფლები არიან და ვერ გეტყვით, რომ ეს მომწონს.
– თქვენი თაობის გოგონებში რა პლუს–მინუსებს ხედავთ?
– კარგი იქნებოდა, უფრო ზრდილობიანები ყოფილიყვნენ. არ მიყვარს, როცა გოგო იგინება ან ბიჭის მოპოვებას აგრესიული მეთოდებით ცდილობს. ქალი ზომიერად აქტიური უნდა იყოს. ზედმეტად მშვიდი გოგოც არ მიზიდავს. რაც შეეხება ჩაცმას, ჩემი აზრით, გოგოს ძალიან სპორტულად არ უნდა ეცვას. მიყვარს, როცა ქალი თავის მოდას თვითონ ქმნის. ბიჭები დიდ ყურადღებას ვაქცევთ, რომ გოგო უმაკიაჟოდაც კარგი იყოს. მას დილით უნდა შეხედო და მიხვდები, მართლა ლამაზია თუ არა. ბიჭებს კარგ რჩევას მივცემ: თუ გინდათ, გაიგოთ, სინამდვილეში გოგო რამდენად ლამაზია, დილით მის კორპუსთან მიდით, დაურეკეთ და სასწრაფოდ რაღაცის გამოტანა სთხოვეთ. რაც უნდა გაითხაპნოს, ძალიან გალამაზების შანსი არ ექნება. მოკლედ რომ ვთქვა, გოგომ რომ მომხიბლოს, პირველ რიგში, საინტერესო უნდა იყოს.
– საინტერესოში რას გულისხმობთ?
– რაღაც უნდა უყვარდეს. მქონია შემთხვევა, გოგოსთვის სამომავლო გეგმები მიკითხავს და ვერაფერი უპასუხია. ადამიანს შეიძლება დაგეგმილი არაფერი გქონდეს, მაგრამ ოცნება? რაღაცაზე ხომ მაინც უნდა ოცნებობდეს?! ყველას ბევრი ფულის შოვნა უნდა, მაგრამ რომ ჰკითხო, გაფულიანებას როგორ აპირებენ, ვერაფერს გეტყვიან. გოგოს რომ შევეკითხები, ცხოვრებაში რა გსურს–მეთქი, უნდა მიპასუხოს. გოგოებო, დასაძინებლად რომ დაწვებით, რაღაცაზე მაინც არ უნდა იოცნებოთ?! ცხოვრებაში მიზანი უნდა გქონდეთ, რაღაც საქმე უნდა გიყვარდეთ!
– ყოფილხართ შეყვარებული?
– მხოლოდ ერთხელ მიყვარდა. ვაღიარებ, რომ ეს ადამიანი ვერ ამოვიცანი. ეს ისტორია რომ მოვყვე, საზოგადოებაში ერთი ამბავი ატყდება და მთელ თბილისში სკანდალს გამოიწვევს! ამიტომ არაფერს ვიტყვი, ვერც მის ვინაობას გავამხელ. უბრალოდ გეტყვით, რომ ის ადამიანი ძალიან მიყვარდა, მაგრამ ჩვენი ურთიერთობა ვერ აეწყო. ამ ისტორიაზე სიმღერასაც ვწერ, მაგრამ სევდიანი ნამდვილად არ იქნება.
– ანუ ამ სიყვარულმა გული არ დაგწყვიტათ?
– კი, როგორ არა, მაგრამ იმ ადამიანმა ჩვენი ურთიერთობა იმდენად ირონიულად დაამთავრა, რომ გამეცინა. ისეთი ნაბიჯი გადადგა, გული კი არ დამწყდა, გამიხარდა, ჩემგან მალე რომ წავიდა! უბრალოდ გულდასაწყვეტია, როცა ცხოვრებაში ერთხელ შეგიყვარდება და ყველაფერი ისე დასრულდება, როგორც ფილმებში ხდება. მივხვდი, რომ, როცა ყველაფერი კარგადაა, ერთ მშვენიერ დღეს შეიძლება ეს ყველაფერი უმიზეზოდაც დასრულდეს! ჩვენი ურთიერთობაც ძალიან უმიზეზოდ დამთავრდა. ის ადამიანი უბრალოდ შტერი ბავშვი იყო. მის საქციელს ახსნა არ აქვს.
– ამჟამად არავინ გესიმპათიურებათ მაინც?
– ერთ ძალიან კარგ ადამიანთან მაქვს ურთიერთობა და ჯერჯერობით ყველაფერი კარგად არის. ქერა ქალს ვერ ვენდობოდი, სულ მეგონა, მომატყუებდა, მაგრამ ამ ადამიანმა აზრი შემაცვლევინა.
– ქერა ქალზე ასეთი წარმოდგენა რატომ გაქვთ?
– არ ვიცი, რატომღაც ასე ვფიქრობდი.
– რითი დაიმსახურა მან თქვენი ყურადღება?
– ასეთი რამ მხოლოდ ფილმებში ხდება: ვიღაცამ ისე დამირეკა, ვინაობა არ გამიმხილა. ორი კვირა ასე ვლაპარაკობდით, მაგრამ ურთიერთობა ძალიან საინტერესოდ აეწყო. ბოლოს ვუთხარი, რომ შეხვედრის დრო იყო. ძმაკაცებმა ისიც კი მითხრეს, ეგ გოგო ვიღაც შენი ფანი იქნებაო. ერთმანეთს ორჯერ ისე შევხვდით, მისი არც სახელი ვიცოდი, არც გვარი და არც ასაკი. სხვათა შორის, ეჭვები გამიჩნდა. მეგონა, გათხოვილი იყო, მაგრამ ასე არ აღმოჩნდა. ყველანაირად მაგარი გოგოა. ასეთს არც ველოდი. მერე ჩემი ცხოვრებიდან რაღაც პერიოდი ისე გაქრა, მეგობრები მეუბნებოდნენ, ფოტორობოტი შევადგინოთ და ვიპოვოთო. ბოლოს სრულიად შემთხვევით მივაგენი, ისე, რომ არც კი მიძებნია. ან როგორ უნდა მომეძებნა, მასზე არაფერი ვიცოდი. მესამე შეხვედრაზე კი მისი ვინაობაც გავიგე. შეყვარებული ჯერ არ ვარ, მაგრამ მასზე უკვე ვფიქრობ.
– ცნობილი ქართველი ქალებიდან ყველაზე მეტად ვინ მოგწონთ?
– საქართველოში ყველაზე მაგარი ქალი შორენა ბეგაშვილია. ჩემს ერთ–ერთ სიმღერაში ვახსენებ კიდეც, თუმცა ვერ გეტყვით, რომ ქალს მხოლოდ ფიზიკური მონაცემებით ვაფასებ. მართალია, პირველ შთაბეჭდილებას გარეგნული ეფექტი ახდენს, მაგრამ მიმაჩნია, რომ ქალის მშვენიერებას სულის სილამაზე განსაზღვრავს. ჩემს ახალ სიმღერაში ასეთი ტექსტი მაქვს: "მნიშვნელობა არ აქვს, შავგვრემანია თუ ქერა, თუ ჩემმა გულმა მასზე ყურადღება შეაჩერა". რად მინდა ლამაზი ქალი, თუ გული არ ენდობა?! ძალიან ლამაზი გოგო შეიძლება შინაგანად ისეთი ცარიელი იყოს, რომ მისი სილამაზე საერთოდ ვეღარ შეამჩნიო. ასეთ გოგოზე დანანებით მითქვამს, რა კარგი გოგოა და ხომ შეიძლებოდა, საინტერესო ადამიანიც ყოფილიყო–მეთქი.
– ბევრი ფანი გოგო გყავთ?
– ბევრი რამდენია? "ფეისბუქზეც" დავწერე, მაგრამ ვერავინ მიპასუხა! ჩემი "ფეისბუქის" გვერდს 12.000 ლაიქი აქვს. ვერ გეტყვით, რომ გოგონები ტელეფონს მიფეთქებენ და გარეთ მხვდებიან, მაგრამ გარკვეულწილად ალბათ პოპულარული ვარ.
– გოგოსთან ურთიერთობაში ყურადღებიანი ხართ?
– არა და ამით არ ვამაყობ. კომპლიმენტების თქმა მიყვარს, მაგრამ იმ სიხშირით – არა, რომ სიტყვები გახუნდეს. ერთხელ, გამთენიისას, გადაღებიდან ვბრუნდებოდი. ბენზინგასამართი სადგურის მარკეტში შევედი და ისეთი ლამაზი კონსულტანტი დამხვდა, გავგიჟდი! იმ წუთში ვერაფერი ვუთხარი და სამი დღის მერე ისევ მივედი. მის წინ დავდექი, თვალებშიც ვერ ვუყურებდი, საფულეში ვიქექებოდი. ვუთხარი, ისეთი ლამაზი ხარ, არ შემეძლო, არ მოვსულიყავი და ეს შენთვის არ მეთქვა–მეთქი. მე კი შენი სიმღერები მომწონსო, მიპასუხა. გამიხარდა, რომ მიცნო. მასთან დღემდე ვმეგობრობ. გოგოსთან თბილი საუბარი და მისთვის საჩუქრების მიძღვნა მიყვარს.
– სიყვარული სიმღერების წერაში გეხმარებათ?
– როცა მიყვარდება, მუზა მაშინვე მოდის. სიმღერასაც ვწერ და ლექსებსაც. შეიძლება არ მინდა, რომ რომანტიკული ვიყო, მაგრამ ასეა! ჩემს ლექსს წაგიკითხავთ:
"კოცნები – არა და მუზები უხვად მაჩუქა ერთმა,
ბევრი ვწერე თუ ცოტა, ეგ გადაწყვიტოს ღმერთმა!..
ბევრ ლექსს ვინახავ შენზე, თუმცა გიკითხავ ცოტას...
ჩემზე იტყვიან, "უყვარს", შენ კი დამცინებ: "ბოდავს!"
მე ყოველ დილით ლექსებს გიმზადებ, როგორც ჩაის...
ნოემბერს ნუ სთხოვ ვარდებს, ვარდები სთხოვე მაისს!
შე, ნოემბერო, ცივო, ეგ სიცივე ვერ მომკლავს...
მაქსიმუმ მომცეს სიცხე, მაქსიმუმ თქვან, რომ "ბოდავს!"
იცი? მგონი, შენ თამაშობ და ჩემს ოცნებას ბავშვივით არწევ,
მე კი, აჯობებს, წავიდე და შენზე ლექსებს არასდროს დავწერ!!!"
სოფიო ბოჭორიძე