საუდის არაბეთში საქმიანი ქალბატონებისათვის ახალი ქალაქი აშენდება
საუდის არაბეთის ხელისუფლების გადაწყვეტილებით ქვეყნის სამხრეთში ახალი ქალაქი აშენდება, სპეციალურად საქმიანი ქალბატონებისათვის.
"Arabian Business"-ს ცნობით, ასეთი ქალაქის აშენების იდეა უკვე მოიწონა ქვეყნის მუნიციპალიტეტებისა და სოფლის მეურნეობის მინისტრმა პრინცმა მანსურ ბინ აბდულაზიზმა.
ახლად აშენებულ ქალაქში განლაგდება წარმოებები, რომელთაც ფლობენ ქალები, ასევე ფაბრიკები, რომლებიც ქალებისათვის აწარმოებენ პროდუქციას.
საუდის არაბეთში ქალთა უფლებები ძლიერ დაკნინებულია შარიათის პრინციპეპზე დაფუძნებული კანონმდებლობის გამო. კერძოდ, ქალებს აკრძალული აქვთ ავტომობილის მართვა, მოგზაურობა თანმხლები მამაკაცის გარეშე. ოლიმპიურ თამაშებზეც ამ ქვეყნის წარმომადგენელი ქალბატონები მხოლოდ 2012 წელს დაუშვეს.
სავარაუდოდ, ქალებისათვის განკუთვნილ ქალაქში ხსენებული აკრძალვები მოხსნილი იქნება.
