ბედნიერი ქორწინების 11 რეცეპტი

რა თქმა უნდა, ყველა ჩვენთაგანს სურს, რომ იდეალური ცოლი იყოს - ერთგული თანამგზავრი საყვარელი ქმრისთვის.

მაგრამ როგორ მოვიქცეთ, რომ ერთის მხრივ, ქმრის მოლოდინი გავამართლოთ, მეორეს მხრივ კი - მის სურვილებში მთლიანად არ დავიხარჯოთ. მაშ ასე, რამდენიმე რჩევა მათთვის, ვისაც უნდა, რომ იდეალური მეუღლე იყოს.

1. ნებისმიერ დროს საუკეთესოდ უნდა გამოიყურებოდეთ.

ალბათ მე-19 საუკუნის ქალბატონთათვის, რომლებიც ლიმონის წვენს საწოლში მიირთმევდნენ და შუადღემდე ნებივრობდნენ, ეს რთული შესასრულებელი არ იქნებოდა, მაგრამ დღევანდელ დროს, როცა დღეღამეში 20 საათს ვმუშაობთ, დავდივართ მომაბეზრებელ მივლინებებში და ვესწრებით გაუთავებელ თათბირებს, კოსმეტოლოგთან ვიზიტიც კი რთულად ჯდება ჩვენს გრაფიკში.

ოქროს შუალედი: დატვირთული დღის რეჟიმი და მოუცლელობა არ უნდა გახდეს მიზეზი იმისა, რომ ქმარმა მოუწესრიგებელი გნახოთ. არ გეუბნებით, რომ სახლშიც მაღალქუსლებზე შემომდგარმა და საღამოს მაკიაჟით მორთულმა იაროთ, მაგრამ სახლის სამოსშიც გამოიყურებოდეთ სექსუალურად და არ ენახოთ ქმარს ტალახის ნიღაბსა და ბიგუდებში, ნამდვილად შეგიძლიათ.

2. ყოველთვის მზად იყავით ცეცხლოვანი სიყვარულისთვის

გვესმის ძნელია დაღლილს, მთელი დღის სტრესის ქვეშ მყოფს გელაპარაკოთ ცეცხლოვან სექსზე, მაგრამ რა ვქნათ, როცა კაცებს უკვე დიდი ხანია აღარ სჯერათ ზღაპრის მოულოდნელად ატკიებულ თავზე?

ოქროს შუალედი: სექსი მშვენიერია მხოლოდ სიყვარულით და არა ვალდებულებით, თუნდაც ეს ვალდებულება ცოლქმრული აუცილებლობა იყოს. შეეცადეთ ხშირად გამოიჩინოთ ინიციატივა: პირველ რიგში ეს ძალიან აღაგზნებს კაცს, მეორეც ის ამ ინიციატივას თქვენ დაგიტოვებთ და აღარ დაგჭირდებათ მიზეზად თავის ატკიება.

3. იყავით კარგი კულინარი

თუ ქურასთან დროისტარება თქვენთვის ყველაზე მძიმე სასჯელია და ამავე დროს სინდისი გქენჯნით, რომ არასრულფასოვანი ცოლი ხართ, ნუ იდარდებთ და ნუ შექმნით ამისგან პრობლემას. ჯერ კიდევ ძველ დასავლეთში სამზარეულო ექსკლუზიურად ძლიერი სქესის პრეროგატივა იყო.

ახლაც ძვირფას რესტორნებში შეფმზარეულები ძირითადად მამაკაცები არიან. ამიტომაც, რატომ არ
უნდა მოირგონ ქმრებმა წინსაფრები და დადგნენ ქურასთან, იმის მაგივრად, რომ იძახონ, ქალის ადგილი სამზარეულოშიაო.

ოქროს შუალედი: თუ თქვენი ქმარი წამდაუწუმ იმას გსაყვედურობთ, რომ სახლში მრავალფეროვანი მენიუს ნაკელბობაა, წყნარად აუხსენით, რომ მისი მხრიდან არ არის კარგი აკრიტიკოს თქვენი კულინარიული "შედევრები".

მამაკაცები ასეთ საყვედურს უფრო მიიღებენ, ვიდრე სკანდალებს. გარდა ამისა, მოაწყეთ პერიოდული კულინარიული სიურპრიზები: შეუკვეთეთ პიცა სახლში ან გადით მეუღლესთან ერთად ახლომახლო რესტორანში. ასე თქვენც დაისვენებთ და ქმარსაც უკარნახებთ, სად უნდა წავიდეს, როცა მრავალფეროვანი სადილი მოუნდება.

4. ნუ იქნებით ეჭვიანი

გიყვართ ქმრის ზურგსუკან დგომა, როცა ის თავის ელექტრონულ ფოსტას ამოწმებს? კითხულობთ მის სმს-ებს? უსმენთ მის სატელეფონო საუბრებს? წამდაუწუმ ეკითხებით, სად იყო გვიანობამდე და რატომ ასდის ქალის სუნამოს ტკბილი არომატი? თუ ყველა ამ კითხვაზე დადებითად უპასუხეთ, ეჭვიანი ცოლების სიაში ხართ. მამაკაცთა ურავლესობა კი თვლის, რომ მათი მსუბუქი გართობა ქალმა არ უნდა შეიმჩნიოს.

ოქროს შუალედი: ნუ დაარღვევთ მის პირად სამყაროს - ნუ დაეცემით იქამდე, რომ ამოწმოთ მისი ტელეფონი და ჯიბეები. გახდით გამომგონებელი: შეგიძლიათ რამენაირად აღნიშნოთ, რომ თქვენც გყავთ თაყვანისმცემლები და დრო სულაც არ გაქვთ იმისთვის, რომ ქმარზე იაჭვიანოთ და მოუწყოთ სკანდალები. ეს მეთოდი ძალიან ეფექტურად მოქმედებს, თუმცა არა დიდი დოზით. წინააღმდეგ შემთხვევაში ქმრის უარყოფითი ემოციების ქარიშხალს გამოიწვევთ.

5. სისტემატიურად გაახარეთ მეუღლე

ძველ დროში იმისათვის, რომ ქმარი ხასიათზე მოეყვანა, საკმარისი იყო ცოლს სცოდნოდა ფრანგული, როიალზე დაკვრა ან სიურპრიზების ამოქარგვა. დღეს ეს ჩამონათვალი აშკარად სახეცვლილია - ქმრის გასართობად შეგიძლიათ გამოიყენოთ პუნქტები პროფესიონალური სტრიპტიზით დაწყებული, დამთავრებული ლოგინში დილის საუზმით.

ოქროს შუალედი: შეეცადეთ მოძებნოთ ისეთი გასართობი, რომელიც ორივეს გსიამოვნებთ. თუ მხოლოდ იმაზე იზრუნებთ, რა ესიამოვნება ქმარს და თავად ამისგან მხოლოდ დაიღლებით, არაფერი გამოვა. მიიღეთ სიამოვნება ორივემ. აბა, დაფიქრდით, იქნებ ორივეს მოგწონთ ლათინოამერიკული ცეკვები? თუ ბოულინგის თამაში გირჩევნიათ?

6. ნუ გააკეთებთ თქვენი ნიჭის დემონსტრირებას

დასამალი მხოლოდ ზედმეტი კილოგრამებია თეძოს არეში, თორემ წითელი დიპლომი და დისერტაცია ფილოსოფიის დარგში ოჯახში ყველაზე გამოსაჩენ ადგილას უნდა იდოს. ნამდვილი მამაკაცი ხომ არასოდეს ირჩევს სულელ ქალს პარტნიორად.

ოქროს შუალედი:

რა თქმა უნდა, ჭკვიანი ქალი მამაკაცს ყოველთვის აგრძნობინებს, რომ ის წამყვანია, თუმცა ამას გააკეთებს ფრთხილად, ზედმეტი ხმაურის გარეშე. ჰკითხეთ რჩევა ქმარს, გაითვალისწინეთ მისი აზრი. ესაუბრეთ მას იმ თემებზე, რომლებშიც ის უფრო კომპეტენტურია: თქვენ ბევრ ახალ საინტერესოსაც გაიგებთ და მასაც გაუხარდება, როცა ცოლის თვალებში ინტერესს ამოიკითხავს.

7. იყავით პრაქტიკული და მეოჯახე

შემოსავლის და გასავლის ზედმიწევნით დათვლა, კრედიტის დებიტის გამოთვლა და ცხრილების შედგენა - ყველაფერი ეს კარგი ბუღალტრის საქმეა და არა იდეალური მეოჯახე ქალის. რა თქმა უნდა, ჯობს ოჯახის ბიუჯეტი მამაკაცმა განკარგოს, მით უმეტეს, რომ მათი უმრავლესობა თვლის, ქალს არაფერი გაეგება ფინანსებში და მის დათვლაში.

ოქროს შუალედი: თუ თქვენთვის გირჩევნიათ ოჯახს მიხედოთ და არა ფინანსებს, მოელაპარაკეთ თქვენს ქმარს: ბიუჯეტი - მას, დალაგება და სახლის მოვლა - თქვენ; ან პირიქით, გააჩნია, რომლის გაკეთება უფრო ძალგიძთ და გსიამოვნებთ.

გაითვალისწინეთ, რომ დღეს სახლის მოვლა ძალზედ გამარტივებულია უახლესი საყოფაცხოვრებო ტექნიკის საშუალებით. ოჯახურ შეკრებაზე გადაწყვიტეთ, რა საოჯახო ტექნიკა გაკლიათ და უახლოეს ხარჯებში გაითვალისწინეთ.

8. დაუთმეთ ქმარს მთელი თქვენი თავისუფალი დრო

რაც უნდა ბევრი ილაპარაკონ, მოგვწონს, როცა ცოლი ჩრდილივით სულ თან დაგვყვება, სინამდვილეში ეს მამაკაცებს სულაც არ სიამოვნებთ. ირგვლივ ხომ უამრავი საინტერესო რამ ხდება, რითაც შეიძლება გაერთოთ და თავი შეიქციოთ: ქსოვით დაწყებული, ქალის კრივით ან თიხით ძერწვით დამთავრებული.

რჩეულთან მუდმივად ყოფნით, ჩვენ ხშირად საკუთარ თავს ბევრ ჩვეულ თუ უჩვეულო გასართობს ვაკლებთ, ვივიწყებთ რა, რომ ოდესღაც მან თქვენ ამის გამოც აგირჩიათ.

ოქროს შუალედი: იდეალური ცოლი ის არის, ვინც ქორწინების შემდეგაც საინტერესო რჩება მეუღლისთვის. ამისათვის კი არ უნდა გადააჭარბოთ და თავი მოაბეზროთ საყვარელ მამაკაცს, არამედ თავად განვითარდეთ, როგორც პიროვნება. გაატარეთ დრო დაქალებთან ერთად, ჩაეწერეთ სასწავლო კურსებზე, იარეთ თეატრებში, გამოფენებზე. თქვენი მეუღლე სულ აღფრთოვანებული იქნება თქვენით, აღმოაჩენს რა თქვენში ახალ-ახალ ტალანტებს და ინტერესებეს.

9, ქმარზე ნაკლები შემოსავალი

საშუალო სტატისტიკურად მამაკაცები თვლიან, რომ არასწორია და მეტიც, შეურაცხმყოფელი, თუ ცოლი სულ ცოტათი, 100 ლარით მეტსაც გამოიმუშავებს, ვიდრე ქმარი.

ოქროს შუალედი: არასოდეს აგრძნობინოთ ქმარს, რომ მას თქვენზე ნაკლები შემოსავალი აქვს, აუხსენით, რომ ეს მხოლოდ თქვენი პროფესიების სპეციფიკაა: სამუშაო ბაზარზე ყველა სპეციალობა სხვადასხვაგვარად ანაზღაურდება, რომ ეს არც თქვენი და არც მისი ფულია, არამედ საერთო, ოჯახური ბიუჯეტი, რომელიც ორივეს თანაბარი შრომით არის გამომუშავებული. და რა მნიშვნელობა აქვს, რომელი შეიტანს იქ მეტს და რომელი ნაკლებს?!

10. აღფრთოვანდით მეუღლით
"ცოლმა უნდა მაქოს, რაც და როგორც არ უნდა გავაკეთო. მაშინაც კი, როცა არაფერს ვაკეთებ" - ეს არის არაფერზე დაფუძნებული მამაკაცური ოცნება. თუმცა ყოველ წუთს იმის თქმა: "როგორ ეფექტურად ასხივოსნებს ნოუთბუქის ეკრანი მის ბრწყინვალე პროფილს" - ყველაზე ნარცის მამაკაცსაც კი მობეზრდება.

ოქროს შუალედი: შეეცადეთ ქმარს კომპლიმენტები მაშინ უთხრათ, როცა ის ამას მართლაც იმსახურებს. ნუ ემლიქვნელებით - ფარსს ის ადვილად მიხვდება. მაგრამ ნურც უყურადღებოდ დატოვებთ იმას, რაც ქმარს მართლაც კარგად გამოსდის. იყავით ყურადღებიანი წვრილმანებშიც კი, წარმატებული ოჯახი ხომ სწორედ წვრილმანებისგან შედგება.

11. იყავით მომთმენი:

რა თქმა უნდა, მოთმინება და თავშეკავებულობა ადამიანის საუკეთესო თვისებაა. კარგია, როცა მომთმენია საბავშვო ბაღის აღმზრდელი ან ისეთი რთული მეცნიერების პედაგოგი, როგორიც არის მხაზველობითი გეომეტრია... მაგრამ ოჯახში გადამეტებული მოთმინება იქამდე მიგიყვანთ, რომ თქვენი მეორე ნახევარი დარწმუნებული იქნება, მისთვის ყველაფერი შეიძლება - მისი მეუღლე ხომ არაფერს აპროტესტებს?

ოქროს შუალედი: ნუ გეშინიათ აჩვენოთ ქმარს, რომ თქვენს მოთმინებასაც აქვს საზღვარი. თუმცა, შეეცადეთ, არ გააკეთოთ ეს მოულოდნელად, მით უმეტეს, ისტერიკებით და ყვირილით. ფრთხილად და დიპლომატიურად აუხსენით ქმარს, რომ მისი საქციელი არ მოგწონთ.

ჟურნალი "და ქალი"