ანჯელინა ჯოლი კლეოპატრას როლს შეასრულებს

რეჟისორმა ენგ ლი სტეისი შიფის კლეოპატრაზე დაწერილი წიგნის ეკრანიზაციას აპირებს. ფილმში მთავარ როლს მსახიობი ანჯელინა ჯოლი შეასრულებს.

"ამ ფილმის გადაღების იდეა, ყველა იმ ფილმის შემდეგ, რომლებიც მე გადავიღე, საკმაოდ მნიშვნელოვნად მეჩვენება. რა აქვს ამ სურათს საერთო ჩემს სხვა პროექტებთან? ყველანი სრულიად განსხვავებულნი არიან! სწორედ ამიტომ მაინტერესებს "კლეოპატრა",- განაცხადა რეჟისორმა.

ლის თქმით, იგი მთავარ როლში ანჯელინა ჯოლის გადაღებას აპირებს. ამ ფილმის ეკრანიზაციის შესახებ ჯერ კიდევ 2010 წელს გახდა ცნობილი. მაშინ იგეგმებოდა, რომ ახალი ფილმი 2013 წელს გამოვიდოდა, "კლეოპატრას" 50 წლის იუბილესთან

დაკავშირებით, რომელშიც ელიზაბეტ ტეილორი მონაწილეობდა.

2011 წლის მაისში ანჯელინა ჯოლიმ განაცხადა, რომ ფილმის ავტორები ეგვიპტის დედოფლის სრულიად ახალი იმიჯის შექმნას აპირებენ, რომელიც მსოფლიო ლიტერატურაში ცნობილია როგორც საბედისწერო, მომხიბვლელი ლამაზმანი. მსახიობის აზრით, კლეოპატრა, პირველ რიგში, ჭკუით და განათლებით და არა საყვარლების რაოდენობით გამოირჩეოდა. ჯოლის თქმით, ახალი ფილმის შემქმნელებს განზრახული აქვთ, ეგვიპტის დედოფალს სექს-სიმბოლოს სტიგმა ჩამოაცილონ.