სალომე გოგიაშვილი: "სწორედ ბიძინა ივანიშვილმა დაიხსნა ჩემი სახლი ბანკიდან"

ტელე და რადიოწამყვანი სალომე გოგიაშვილი ტელეკომპანია "იმედში" დაბრუნდა და მალე მაყურებელს დილის გადაცემიდან მიესალმება. მანამდე კი "სარკესთან" იმ მიზეზებზე ილაპარაკა, რის გამოც თავის დროზე ეს ტელეარხი დატოვა, უფრო სწორად, დაატოვებინეს. სალომე ამბობს, რომ არხის მაშინდელმა გენდირექტორმა გიორგი არველაძემ ის პოლიტიკური მოსაზრებების და ბიძინა ივანიშვილის მიმართ სიმპათიების გამო დასაჯა და დაითხოვა. არხის ხელმძღვანელობასთან დაპირისპირებამ კი ასევე პოპულარულ ტელესახე თიკო სადუნიშვილთან მისი მეგობრობაც შეიწირა.
– სალომე, იქნებ ახლა მაინც ისაუბროთ იმ კონკრეტულ მიზეზებზე, რის გამოც თავის დროზე "იმედიდან" წამოხვედით, მით უმეტეს, რომ ამ ტელეკომპანიაში უკვე დაბრუნდით.
– "იმედში" მესამედ ვბრუნდები. ამ ტელეკომპანიიდან ბოლოს რომ წამოვედი, ვთქვი, სანამ ეს სტაფი (შემადგენლობა. ავტ.) არ წავა, აქ არ დავბრუნდები–მეთქი. ჩემი და არხის ხელმძღვანელ გიორგი არველაძის მოსაზრებები რადიკალურად განსხვავდებოდა. ამის გამო ყველა გადაცემიდან დამითხოვეს. არჩევნებამდე, როცა სოციალურ ქსელში ჩემი აზრი დავაფიქსირე და პატიმრებს თანაგრძნობა გამოვუცხადე, ტელევიზიის ყოფილი თანამშრომლებისგან ჩემ მიმართ დიდი აგრესია წამოვიდა. ალინა არველაძემ და მისმა თანამოაზრეებმა "ფეისბუქში" მლანძღეს და მაგინეს. სოციალურ ქსელში დავწერე, რომ "იმედში" არასოდეს დავბრუნდებოდი, სანამ იქ იმუშავებდნენ თიკო სადუნიშვილი, ალინა არველაძე და სხვები, რომლებსაც არ ჩამოვთვლი. იმ პერიოდში ბევრმა ჩემმა კოლეგამ არჩია, ჩუმად ყოფილიყო და სამსახური შეენარჩუნებინა. მე ჩემი მოსაზრების ხმამაღლა დაფიქსირება ვამჯობინე და ფსიქოლოგიურად მზად ვიყავი, რომ ყველგან დამბლოკავდნენ.

– პირდაპირ გითხრეს, რომ ტელეკომპანიაში განსხვავებული პოლიტიკური შეხედულებების გამო ვერ იმუშავებდით?
– სანამ ციხის სკანდალის ცნობილი კადრები გავრცელდებოდა, რამდენიმე ხნით ადრე "იმედის" დილის გადაცემის კასტინგზე დამიძახეს. პირველი საცდელი გადაცემაც ჩავწერეთ, მაგრამ გაურკვეველი მიზეზის გამო უარით გამომისტუმრეს. მერე ალინა არველაძემ ასეთი რაღაც მითხრა, ძალიან გვინდა, მონაწილეობა მიიღო პროექტში "ცეკვავენ ვარსკვლავები", მაგრამ, რადგან ბიძინა ივანიშვილის ახლობელი ხარ, ჩვენს არხზე არ გაჭაჭანდებიო... მიხარია, რომ ასეთი ადამიანები არამარტო ტელევიზიიდან ჩამოგვშორდებიან, ხშირად აღარსად მოვკრავთ თვალს. ჩემთვის ესენი სამარცხვინოები არიან!
– თიკო სადუნიშვილთან წლების განმავლობაში მეგობრობდით. პოლიტიკური მოსაზრებების გამო დაკარგეთ ერთმანეთი?
– ტანსაცმლიდან ამოვარდა, ოღონდ ისინი დაეცვა. პრინციპში, გასაგები იყო მისი პოზიცია, რომ არა ალინა, თიკო სადუნიშვილი არავის ახსოვდა. ვანო ჯავახიშვილი ხომ ხუმრობს, რომ არის წინა მთავრობის ჯამბაზი, თიკო სადუნიშვილი კი ალინა და გიორგი არველაძეების ჯამბაზია! ალინა რომ "იმედიდან" წავა, ძალიან საინტერესო იქნება სადუნიშვილის ბედ–იღბალი. ალბათ სატელევიზიო სივრცეში მის მიმართ დაინტერესება ნულის ტოლი იქნება. ეკრანზე "იაზვობის" და "სტერვობის" გარდა არაფერს ტოვებს.
თიკოსთან მუდამ კარგი ურთიერთობა მქონდა, მაგრამ, როდესაც დავინახე, რომ გონზე არ იყო და პროვოკაციაზე წავიდა სამსახურის შესანარჩუნებლად, ასეთ რამეს თიკოს კი არა, ბავშვობის მეგობარსაც კი არ დავუთმობდი.
– დღეს რა ხდება "იმედში", ვისთან ერთად იმუშავებთ ეთერში?
– არაჩვეულებრივი განწყობაა. შენობაში რომ შეხვალ, აღარავინ არის ისეთი, ვისი დანახვაც შეიძლება არ გაგიხარდეს. დიდი ხნის წინ დავწერე "ფეისბუქზე", კარგი იქნება, თუ არხი რეალურ მფლობელს დაუბრუნდება–მეთქი. ბადრი პატარკაციშვილმა, სკამიდან დაწყებული აპარატურით დამთავრებული, ყველაფერი თავად იყიდა. მის ქონებას კი ვიღაც არაამქვეყნიური ობიექტები განაგებდნენ. ახლა ახალი სტაფია, კარგი გეგმები და იდეები აქვთ. გამიხარდა, რომ მათ მოუნდათ ჩემთან თანამშრომლობა. დამირეკეს და დილის გადაცემის წამყვანობა შემომთავაზეს. "გავწირავ" თავს და დილის 5 საათზე ავდგები, რადგან ამ ტელევიზიაში იმდენად კარგი გარემო და ურთიერთობებია, ამად ნამდვილად ღირს.
– გადაცემის ფორმატი შეცვლილია?
– თავისთავად. წამყვანების რაოდენობა შეიცვალა. ჩემი მეწყვილეა დათო ქაცარავა, დამატებულია ახალი რუბრიკები, შეიცვალა სტუდიის დიზაინი. დარწმუნებული ვარ, ნებისმიერი მაყურებელი იგრძნობს ჩვენს საოცრად ამაღლებულ განწყობას.
– დათო ქაცარავასთან ალბათ უკვე ჩაწერეთ საცდელი გადაცემები. როგორი მეწყვილეა ის?
– არაჩვეულებრივი ადამიანია, დინჯი, განათლებული, ნამდვილი ჯენტლმენი. ერთმანეთს კარგად შევეწყვეთ.
– ე.წ. სამთავრობო კონცერტები თქვენც ხშირად მიგყავდათ. ახლა კი ამბობთ, რომ ნაციონალების ხელისუფლება გულზე არ გეხატებოდათ.
– მერია აფინანსებდა "არტ ფორუმს", ეს ორგანიზაცია იწვევდა წამყვანებს და ერთ–ერთი ვიყავი მეც. მიმყავდა თბილისობის, ახალი წლის კონცერტები და სხვა წვრილ–წვრილი ღონისძიებები, რომლებიც მერიის დაკვეთით ტარდებოდა. საარჩევნო კონცერტებიც მიმყავდა, თუმცა ეს არ ნიშნავს, რომ მათი მომხრე ვიყავი. ასე რომ ყოფილიყო, არ წავიყვანდი კახი კალაძის შვილის ნათლობას, არ წავიყვანდი რუსი ბიზნესმენების კორპორატიულ საღამოებს. მე რომ ერთი ადამიანის თაყვანისმცემელი ვყოფილიყავი, ვიქნებოდი მარტო მიშას კონცერტების წამყვანი, მაგრამ მე მიმყავდა და წავიყვან ყველა იმ საღამოს, რომელსაც დამიკვეთავენ. ყოველთვის ასე ხდებოდა: საღამოს ორგანიზატორი მირეკავდა და ვთანხმდებოდით პირობებზე. ეს არის ჩემი საქმე. წლებია ტელევიზიაში ვმუშაობ, პროფესიით ჟურნალისტი ვარ, მაგრამ საინფორმაციო გამოშვებაში არასოდეს მიმუშავია. პოლიტიკისგან ყოველთვის შორს ვიდექი.
– ახლა უკვე ცნობილია, რომ, როცა ყოფილმა ქმარმა თქვენი ქონება გაყიდა, დააგირავა, ბიძინა ივანიშვილი იყო ის, ვინც თქვენი სახლი დაიხსნა ბანკიდან. რა გაკავშირებთ ამ ადამიანთან?
– იმ პერიოდში, როცა თქვენ ჩემთან ჩაწერეთ ინტერვიუ, რამდენჯერმე გამიმეორეთ ეს კითხვა სხვადასხვა კუთხით, რომ მიგეღოთ პასუხი, მაგრამ არაფერი გამოგივიდათ. ასე იმიტომ მოვიქეცი, რომ თავად ბატონ ბიძინას არ სურდა ამის გახმაურება. ამ ადამიანს არ უყვარს სიკეთით სპეკულირება. მე არ ვარ პირველი, რომელიც მან ასეთი სიტუაციიდან იხსნა. მამაჩემის წყალობით, ძალიან ბევრი წელია ჩვენი ოჯახები მეგობრობენ. ჩემმა სანაცნობო წრემ იცის, რომ სწორედ ბიძინა იყო ის ადამინი, ვინც იმ გაჭირვების დროს გვერდში დაგვიდგა. მისი გულისთვის ტანკსაც კი შევუვარდები და არა იმიტომ, რომ სახლი დამიხსნა, ის უაღრესად კეთილი და კარგი პიროვნებაა. ნამდვილად ღირსია საქართველო, რომ ოდესმე ასეთი ადამიანი ჰყავდეს ხელისუფლების სათავეში.
– დღეს თქვენს ოჯახებს როგორი ურთიერთობა აქვთ ერთმანეთთან?
– დღეს უკვე მისვლა–მოსვლა არ გვაქვს, რადგან არ სცალია, გაცილებით მნიშვნელოვანი საქმეები აქვს.
– ბერა ივანიშვილთანაც გქონდათ ურთიერთობა, ერთი პერიოდი მისი პიარმენეჯერიც იყავით. ახლაც თანამშრომლობთ ერთმანეთთან?
– არა, ეს დროებითი იყო. ერთ–ერთი პროექტის დროს გავუწიე დახმარება და ამით დასრულდა ყველაფერი. მრავალწლიანი კონტრაქტი არ გვქონია გაფორმებული. როცა რამეში დასჭირდება ბერას ჩემი დახმარება, აუცილებლად დავუდგები გვერდით.
– თქვენი ქმარი, ვახო ნიკოლაიშვილი, ტელევიზიაში თქვენს დაბრუნებას როგორ შეხვდა?
– ვახომ მთხოვა, ოღონდ არ იმუშაო და ყოველი თვის ბოლოს ხელფასს მე გადაგიხდიო, მაგრამ ჩემს საყვარელ საქმეზე უარი მაინც ვერ ვთქვი. როცა სამსახური ჩემი პრინციპულობის გამო დავკარგე, გადაწყვეტილი მქონდა, სამოდელო ბიზნესში ჩავრთულიყავი. ახლა კი ჩემი გეგმები ისევ ტელევიზიას უკავშირდება.
– როგორც ვიცი, ახლახან იტალიიდან დაბრუნდით. იქ რას აკეთებდით?
– ჩემი მეუღლე საქმიანი ვიზიტით იმყოფებოდა იქ და მეც თან წამიყვანა. დავათვალიერეთ ვენეცია, რომი, ფლორენცია, ვიყავით ვერონაში, რომეოს და ჯულიეტას ქანდაკებები ვნახე. ვიშოპინგეთ, დავაგემოვნეთ იტალიური სამზარეულო და ერთი კვირის შემდეგ დავბრუნდით სამშობლოში.
– ოჯახში როგორ შეხვდით ახალ წელს?
– საუცხოო განწყობით და დიდი მოლოდინით. გამრავლებაზეც ვფიქრობთ. ძალიან გვინდა, რომ შვილი გვყავდეს.
გილოცავთ 2013 წელს. ეს წელი ბედნიერი ყოფილიყოს სრულიად საქართველოსთვის!
ლანა კიკნაძე