ნინი ბადურაშვილი: "როცა გავთხოვდი, მერე გავაცნობიერე სირთულეები"

მომღერალ ნინი ბადურაშვილისათვის 2012 წელი ცხოვრებაში უმნიშვნელოვანესი მოვლენით – გათხოვებით აღინიშნა. ნინის დაოჯახების თემა ბოლო წლებში განსაკუთრებულ ინტერესს იწვევდა და მისმა გრანდიოზულმა, თუმცა დახურულმა ქორწილმა ყველა კითხვას ბოლოს და ბოლოს წერტილი დაუსვა. ამიტომაც მას თამამად შეგვიძლია ქართულ რეალობაში წლის პატარძლის ტიტული მივანიჭოთ.
ქორწილის შემდეგ ნინი და მისი მოსკოველი ქმარი ირაკლი კუტალაძე თბილისიდან გაემგზავრნენ. ახალშერთულ ცოლს ირაკლიმ რუსეთის დედაქალაქში, საკუთარ კლუბში, წვეულება მოუწყო და სამეგობრო წრეს ამგვარად წარუდგინა. ორთვიანი მოსკოვური ცხოვრების შემდეგ ნინი მშობლიურ თბილისში ქმრის გარეშე ჩამოვიდა, დიდია ალბათობა, რომ ახალ წელსაც უმისოდ შეხვდეს. ირაკლის სამუშაო გრაფიკი უფლებას არ აძლევს, რომ ცოლის თბილისურ არდადეგებს შემოუერთდეს. იანვარში ნინი მოსკოვში დაბრუნდება და იქაურ შოუბიზნესში საკუთარი ადგილის პოვნას ეცდება. ამაში მას ქმარი ძალიან ეხმარება. დანარჩენზე "წლის პატარძალი" ჩვენს ჟურნალს თავად უამბობს.
– ნინი, როგორია თქვენი ახალი მდგომარეობა – ქმართან ერთად მოსკოვში ცხოვრება?
– წინასწარ ბევრი არ მიფიქრია, როგორ შევძლებდი ქორწილის შემდეგ მოსკოვში ცხოვრებას. როცა იქ აღმოვჩნდი, მერე გავაცნობიერე სირთულეები. მოსკოვში სულ სხვა ცხოვრების რიტმია, 24 საათიანი გიჟური ტემპი. საქმე თუ არ გაქვს, იქ შეიძლება გაგიჟდე, რადგან ყველა მუშაობს და ყოველი წუთი აქვთ გათვლილი. თბილისში რომ ვართ მიჩვეული, მეგობრებთან ერთად დღის გაყვანას, ეს მოსკოვში წარმოუდგენელია. ძალიან ბევრ რამესთან შეგუება გამიჭირდა, საცობებიდან დაწყებული ურთიერთობებით დამთავრებული. ძალიან მენატრებოდა თბილისური გარემო.
ისიც ძნელია, როდესაც თბილისში პოპულარული ხარ და ამხელა ქალაქში კი არავინ გიცნობს. ძალიან დამეხმარა ის ფაქტიც, რომ მოსკოვში ბევრი ქართველია. გავიჩინე ახალი მეგობრები, მაგალითად, გამოვყოფდი პიანისტ ნიკა ნიყვაშვილს.
– თბილისში ოჯახთან ალბათ ყოველდღიური კონტაქტი გქონდათ.
– კი, ყოველდღე ვრეკავდი თბილისში ოჯახთან და მეგობრებთან, სულ მინდოდა, გამეგო, რა ხდებოდა აქ. მოსკოვში ყველა ქართველი "სკაიპზე" არის დამოკიდებული, რათა თბილისურ სითბოს არ მოშორდნენ.
– ახალი ცხოვრების დაწყებაში ქმარი როგორ დაგეხმარათ?
– ყველანაირად ცდილობს, თავი მარტო არ ვიგრძნო, ყველგან დავყავარ. თავის კლუბში ერთი ლამაზი საღამოც მომიწყო, სამეგობრო წრეში წარმადგინა, როგორც ცოლი და როგორც მომღერალი. კიდევ ერთი საღამო მქონდა, ამჯერად უკვე რუს მომღერლებთან ერთად.
– რეალურად დაინახეთ შანსები, რომ შეიძლება რუსულ სცენაზე დადგეთ?
– კი, ვხედავ ჩემს მომავალს იქაურ შოუბიზნესში, მაგრამ ეს პროცესი უფრო რთული აღმოჩნდა, ვიდრე მეგონა. მოსკოვში შოუბიზნესში კლანური სისტემაა. თუ ისეთ გავლენიან ადამიანებთან, როგორებიც არიან პუგაჩოვა, კრუტოი და სხვები, არ ხარ კარგად, ვერაფერს მოახერხებ. სხვა შემთხვევაში უნდა დასჯერდე კლუბების პატარა სცენას.
ვცდილობ, უსაქმოდ არ ვიყო, დავიწყე მანანა თოდაძესთან ვოკალზე სიარული. ორ თვეში ვერანაირად მოახერხებ გაბრწყინებას, მაგრამ იმედი მაქვს, რომ ჩემი სიმღერით მოვახერხებ, მოსკოვს თავი გავაცნო.
– გვიამბეთ, როგორ სახლში ცხოვრობთ თქვენ და ირაკლი.
– მოსკოვის ცენტრში, ლენინგრადის პროსპექტზე ვცხოვრობ. ირაკლიმ ჩემთვის სახლი მთლიანად განაახლა. მანამდე მარტო ცხოვრობდა და ახლა ბევრი რამის ყიდვა მოუწია, ჭურჭლის სარეცხი მანქანიდან დაწყებული ბევრი ნიუანსით დამთავრებული.
– თქვენი და ირაკლის ცხოვრებაში რომანტიკა და სიურპრიზები გრძელდება?
– კი, გრძელდება, მაგრამ ალბათ ისე არა, როგორც თავიდან იყო. განსაკუთრებული სიურპრიზები არ მახსენდება. ირაკლის ძალიან ბევრი საქმე აქვს და იმდენი დრო არ აქვს, რამდენიც თუნდაც თბილისში ჰქონდა.
– ახალი მანქანა არ დაგახვედრათ?
– ჯერ ჩემთვის მანქანა აუცილებლობას არ წარმოადგენს, რადგან არ ვიცი გზები. ჩემი ქმრის მანქანაზეც არ ვჯდები, რადგან ეზოდან რომ გავიდე, შეიძლება დავიკარგო. თვითონ მოსკოველები დადიან ნავიგატორებით.
– როგორი ტიპის ქმარია ირაკლი, რა თვისებები აღმოაჩინეთ მასში ამ ორი თვის განმავლობაში?
– ბუნებრივია, ოჯახური ცხოვრებისას ადამიანები ცოტა სხვანაირ თვისებებს ამჟღავნებენ, მაგრამ არ ვამბობ, რომ – ცუდს. პირად ურთიერთობებზე საუბარი არ მინდა.
– ყოველთვის არის ალბათობა, რომ ფინანსურად ძლიერმა მამაკაცმა, რომელიც ოჯახს სრულად უზრუნველყოფს, ცოლი ოქროს გალიაში გამოკეტოს. ეს პერსპექტივა თქვენს შემთხვევაში არ არსებობს?
– ეს იმ ქალების პრობლემაა, რომლებიც ოქროს გალიაში გამოიკეტებიან ხოლმე. როგორ შეიძლება, ქმარმა გამომკეტოს და არ ვიყო აქტიური ჩემს პროფესიაში?! ირაკლი – პირიქით, ყველანაირად მეხმარება, რომ ვიყო წარმატებული.
– აქამდე თქვენს ოჯახში განებივრებული იყავით, ახლა მარტოს გიწევთ ქმარზე ზრუნვა, დიასახლისობა. საქმეებს ადვილად ართმევთ თავს?
– ირაკლი არ ითხოვს განსაკუთრებულ სადილებს ჩემგან. საუზმეს კი სიამოვნებით ვამზადებ. აქამდე არც კი დავფიქრებულვარ, რა რთულია, იყო მთავარი დიასახლისი. ყველა დიასახლისს ჩემგან დიდი კომპლიმენტი! ახლა უკეთ დავაფასე ბებიაჩემი, რომელიც ყველაფერს ახერხებდა – მუშაობდა, გემრიელ საჭმელებსაც გვიკეთებდა და ოჯახშიც ფუსფუსებდა.
– თბილისში რაიმე კონკრეტული მიზეზით ჩამოხვედით თუ უბრალოდ მოგენატრათ აქაურობა?
– ვიზა დამიმთავრდა და გასაგრძელებელი მაქვს. აქაურობაც მომენატრა და სიამოვნებით წამოვედი.
ავთო ჩიტიძე