სალომე ღვინიაშვილის ერთი დღე

უყვარს დილით ადრე ადგომა. მიაჩნია, რომ როდესაც ადამიანი ადრე იღვიძებს, მეტ საქმეს ასწრებს და დღესაც ნაყოფიერად ატარებს. სალომე ღვინიაშვილი ყოველ დილას 8 საათზე იღვიძებს, უყვარს შვრიის ფაფა (ჰერკულესი), ურომლისოდაც სახლიდან არასდროს გადის.

8:30 a.m

სახლიდან გავდივართ. ეს მისი ჩვეულებრივი დღის რეჟიმია. უბრალოდ, დღეს. ამ ყველაფერს "ბომონდთან" და ჩემთან ერთად აკეთებს.

მნიშვნელობა არ აქვს, თბილისშია თუ საზღვარგარეთ. ყოველ დილით სტუმრობს სპორტულ დარბაზს. ვარჯიშობს ტრენაჟორებზე, პილატესით და მიდის საცურაო აუზზე. ძალიან უყვარს იოგა, განტვირთვისა და რელაქსაციის საუკეთესო საშუალება. სპორტულ დარბაზს რომ მოივლის, აქვს მსუბუქი ლანჩი, თუმცა დღევანდელი დღე ცოტა განსხვავებულია.

11:15 a.m

სპორტული დარბაზის შემდეგ წავედით საბურთალოს "გუდვილში". სიამოვნებს, როცა ოჯახისთვის შენაძენს თავად აკეთებს.

11:45 a.m

"გუდვილის" სასიამოვნო საოჯახო შოპინგის შემდეგ, ცოტა ხნით შინ ვბრუნდებით.

12:30 p.m

- ლანჩი მეგობრებთან ერთად "კანაპეში". ყოველდღიურად ყველა ძალიან დაკავებული ვართ, ყველას ჩვენ-ჩვენი გრაფიკი გვაქვს, თუმცა ეს ის დროა, როცა ვცდილობთ, მოვიცალოთ. ყოველდღე, როცა თბილისში ვარ, ლანჩის დროს "კანაპეში" ვიკრიბებით, ვსაუბრობთ, ერთმანეთს ამბებს ვუყვებით. ეს ადგილი ძალიან მიყვარს, სასიამოვნო გარემოა და თან ლანჩის დროს ბევრ ნაცნობს ვნახულობ.

სალომეს საყვარელი ლანჩმენიუ - ქათმის ფილე გრილზე და ლატე.

2 p.m

სალომე შინ ბრუნდება და, რა თქმა უნდა, მასთან ერთად მეც... აღმოჩნდა, რომ გოგონებს (ნინუცა და ეკა) თავისუფალი დრო აქვთ და გვიერთდებიან. სალომეს ოჯახში სიახლეა - სულ ცოტა ხნის წინ ახალი ოჯახის წევრი შეემატათ, ძალინ საყვარელი ძაღლი "ჩაკი". ბავშვებს ოჯახის ახალი წევრი ძალიან უყვართ... "ბავშვები 5 საათამდე სახლში არ არიან და სალომე ცდილობს, ეს დრო მაქსიმალურად საქმეებისთვის გამოიყენოს. 5 საათის შემდეგ კი, დრო ბავშვებს დაუთმოს და მათთან ერთად გაატაროს.

3:15 p.m

მეგობრების წასვლის შემდეგ, სალომე სკაიპის მეშვეობით ზურას თურქეთში ელაპარაკა და მეილებს უპასუხა. ინტერნეტით თვითმფრინავის ბილეთები შეუკვეთა.

4 p.m

დონა კარანმა ერთხელ თქვა: "თუკი 20 წუთზე მეტს ანდომებს ადამიანი მოსამზადებლად, მას საკუთარ თავთან პრობლემები აქვს". დონა კარანის ეს სიტყვები იმიტომ მოვიყვანე მაგალითად, რადგან სალომეს სახლში უყვარს კომფორტულად, სპორტულებით სიარული და ყოველთვის, როცა სახლშია, მისი Look-ი სპორტულებით შემოიფარგლება. დრო მოვიდა, ახალი Look-ის არჩევის, ვინაიდან ბავშვებს, ტასუნას და ნიტას, სკოლაში უნდა მივაკითხოთ. უფროსი შვილი, დათუნა, შინ თავისით ბრუნდება. სალომემ ყოველთვის იცის, როდის რა უნდა მოირგოს. ამჯერად არჩევანი შეაჩერა Top Shop-ის ბორდო შარვალსა და მაისურზე, Twist-ის პულოვერზე J.Crew აქსესუარი, Celine - ჩანთასა UGG-ებზე.

4:30 p.m

ტასოს ბაღში, ნიტას კი სკოლაში ვაკითხავთ. ბავშვები ბრიტანულ ქართულ აკადემიაში სწავლობენ, უფროსი შვილი დათუნა კი, სკოლა "21-ე საუკუნეში".

5 p.m

ბავშვები საშინაო look-ებს ირგებენ, თან დედას უყვებიან, სკოლაში დღე როგორ გაატარეს.
შემდეგ ერთად მეცადინეობას იწყებენ, საღამოს სალომე ბავშვებს უთმობს.
11 p.m

გვიან საღამოს, სახლიდან გადასაღებ მოედანზე ვინაცვლებთ. დღევანდელ საღამოს პროფესიული სამუშაო დღეა - "ელიტ ელექტრონიქსის" წინასაახალწლო რეკლამაში მონაწილეობს. გადაღებები, სავარაუდოდ, მთელ ღამეს გაგრძელდება... დღევანდელი დღე, ნაწილობრივ ჩვეულებრივი და ნაწილობრივ განსხვავებული, ჩემთან ერთად საახალწლო განწყობით დასრულდა.

მერცია სულხანიშვილი
ყოველთვიური ჟურნალი "ბომონდი"