მაგდა ვასაძე: ”ჩემი ოჯახის დანგრევა ჩემი ბრალი არ არის”

26 წლის მაგდა ვასაძე ქობულეთიდან თბილისში იმის დასამტკიცებლად ჩამოვიდა, რომ ზოგადად ქალებს და პირადად მას ბევრი რამის გაკეთება შეუძლია. მიზანს მიაღწია – პროექტ "ახალ ხმაში" ზედიზედ ორჯერ გახდა ესემესლიდერი.
კონკურსამდე მაგდა ქობულეთში ცხოვრობდა და ერთ–ერთ რესტორანში მღეროდა. ქმართან გაყრილია. ჰყავს 6 წლის შვილი – ლუკა ბოლქვაძე.
– მაგდა, უკვე საკმაოდ დიდ წარმატებას მიაღწიეთ, მაყურებელთა დიდმა მასამ გაგიცნოთ. როცა ქობულეთიდან თბილისში მოდიოდით, ასეთ შედეგზე ფიქრობდით?
– ყოველთვის ვიცოდი, რომ რაღაცას მივაღწევდი და ამის დრო მოვიდოდა. საკუთარი თავის მჯეროდა, თუმცა იყო პერიოდი, როცა აღარ მეგონა, რამე თუ შემეძლო... ბრმა კასტინგზე მწვრთნელების შემობრუნებას თან ველოდი და თან – არა. ამ პროექტში დედის დაჟინებული თხოვნით მივიღე მონაწილეობა.
– კონკურსში მისულმა თავიდანვე განაცხადეთ, რომ სტეფანეს და მაიას გუნდში გინდოდთ ყოფნა. რატომ? მათ ხომ არ იცნობდით?
– მათ არ ვიცნობდი, მაგრამ რატომღაც ყველასგან გამოვარჩიე ეს წყვილი. თითქოს თავიდანვე მივხვდი, რომ სტეფანეს და მაიას გუნდი "ადამსების ოჯახი" იქნებოდა და არ შევცდი. ნიჭიერები არიან. მაიას სიმღერას რომ ვისმენდი, თითქოს ჩემი იყო. ამიტომ ჩავთვალე, რომ მას შეეძლო, ბევრი რამ ესწავლებინა ჩემთვის. პროექტში სწორედ ამიტომ მივედი – უფრო რომ დავიხვეწო. პოპულარობა მხოლოდ შედეგია, რომელიც ამას მოჰყვება. მიხარია, რომ მწვრთნელების არჩევაში არ შევცდი. ჩვენ ნამდვილად ვართ "ადამსების ოჯახი".
– თქვენი გარეგნობის მკვეთრი ცვლილება ვისი იდეაა? თავიდან ქერა თმით მიხვედით კონკურსში.
– ყოველთვის შავი თმა მქონდა, მაგრამ ერთხელ გადავწყვიტე, ქერა გავმხდარიყავი. კონკურსში მონაწილეობის მერე ყველა ახლობელი მირეკავდა და მთხოვდა, შავი თმა დამებრუნებინა. იმიჯი საკუთარი სურვილით შევიცვალე. პროექტში ვარცხნილობაც შემიცვალეს, თმა უკან გადამიწიეს.
– სტეფანე და მაია თქვენთან დაკავშირებით ხშირად ამბობენ, რომ ადამიანური ხართ. რა თვისებას გამოარჩევდით საკუთარ თავში, რის გამოც ამგვარ შეფასებას იმსახურებთ?
– ხანდახან ვფიქრობ, ჩემი მინუსიც კი არის ის, რომ ძალიან მიმნდობი ვარ. ყველას ადვილად ვენდობი, ყველასთან თბილი ვარ, არ მიყვარს კონფლიქტი და ა.შ. სტეფანე და მაია ალბათ ამას გულისხმობენ.
– ქობულეთში სახლში ვინ გელოდებათ?
– მყავს დედა, ირმა სურმანიძე, მამა – ჯიმშერ ვასაძე, ორი და, 27 წლის ხათუნა და 24 წლის მარიტა და შვილი, 6 წლის ლუკა. დედა და მამა თავიდანვე ხვდებოდნენ, რომ კარგი სმენა მქონდა. ცდილობდნენ, ყველგან მემღერა, სადაც შეიძლებოდა. ხშირად უკან ვიხევდი, მაგრამ მშობლები მეუბნებოდნენ, რომ სჯეროდათ ჩემი. რატომღაც იცოდნენ, რომ წარმატებას მივაღწევდი. ცნობილია, რომ მშობლის ინტუიცია ყოველთვის ამართლებს.
ოჯახის წევრებს ერთმანეთთან ძალიან თბილი ურთიერთობა გვაქვს. ზაფხულობით ზღვაზე სიარული გვიყვარს. ზღვაში ოთხი თავი თუ ჩანს, ამბობენ, ვასაძეები არიან შესულიო – სამი და და მამა.
– გადაცემის თქვენთვის მიძღვნილ ნაწილში, ე.წ. პროფაილში, ახსენეთ, რომ ვასაძეები ცეკვით და სიმღერით არიან ცნობილნი. თქვენი ოჯახის წევრებიც ხელოვანები არიან?
– ჩემი ბაბუის ძმები, ომარ და თემურ ვასაძეები, პროექტ "ნიჭიერშიც" იყვნენ საცეკვაო ნომრით გასული. აჭარაში ცნობილი მოცეკვავეები არიან, მოსწავლეებიც ჰყავთ. ეს გვარი უფრო ცეკვით არის განთქმული, მაგრამ მომღერლებიც გვყავს, ოღონდ ამ მხრივ აქამდე ცნობილი არ ვიყავით. ეს ნიჭი მე გამოვიტანე ასპარეზზე და ძალიან მიხარია.
– პროფაილში ასევე თქვით, ცდილობთ, დაამტკიცოთ, რომ ძლიერი ქალი ხართ. ვის უმტკიცებთ ამას?
– ბევრი იმედგაცრუების შემდეგ მინდოდა, ცხოვრება გამეხალისებინა, არა – სხვისთვის, არამედ საკუთარი თავისთვის დამემტკიცებინა, რომ მეტის გაკეთება შემიძლია. სანამ ქმართან ერთად ვცხოვრობდი, მანამდეც მიცდია სხვადასხვა კონკურსში მონაწილეობის მიღება, უბრალოდ არ გამიმართლა. "ახალი ხმა" კი ის შემთხვევა იყო, როცა ძალიან მოვინდომე.
– რომელ კონკურსებში მიიღეთ მონაწილეობა?
– "ჯეოსტარში" ორჯერ ვიყავი და არ მიმიღეს. მიზეზიც არ უთქვამთ.
– ქმართან ერთად ცხოვრება რატომ ვერ ააწყვეთ?
– მე 19 წლის ვიყავი, ჩემი მეუღლე 20 წლის იყო. გავიპარეთ. 6 წელი ვიცხოვრეთ ერთად. ეს იყო ძალიან დიდი სიყვარული, რომელზეც ჩვენთან ლეგენდები დადიოდა. მშობლების მხრიდან წინააღმდეგობა შეგვხვდა, რომ პატარები ვიყავით და ოჯახის შექმნის დრო არ იყო, მაგრამ არ დავუჯერეთ. გაგვიჩნდა შვილი, ლუკა ბოლქვაძე, რომელიც ახლა 6 წლისაა.
რა თქმა უნდა, დეტალებზე არ ვისაუბრებ, მაგრამ ვიტყვი, რომ, როცა მას გავყევი ცოლად, მე უფრო შევეგუე ოჯახურ კერას, ვიდრე ის. გოგოს ალბათ უფრო შეუძლია შეეგუოს ოჯახს მცირე ასაკშიც, მაგრამ 20 წლის ბიჭი დასაქორწინებლად ძალიან პატარაა. ასეთ დროს ოჯახში ფინანსური პრობლემებიც ჩნდება, მაგრამ ეს პრობლემა მე არ შემხებია, გათხოვებისთანავე, 19 წლის ასაკში მუშაობა დავიწყე, რესტორანში ვმღეროდი და ფინანსურად იქით ვეხმარებოდი ყველას.
– ამ სამუშაოს გამო მეუღლე ხომ არ ეჭვიანობდა? ქართველი კაცისთვის ცოტა საჩოთიროა რესტორანში მომღერალი ცოლი.
– სხვათა შორის, არ ეჭვიანობდა. პირიქით, როცა დამირეკეს და სამსახური შემომთავაზეს, ვუთხარი, რომ ჯერ ჩემი ქმრისთვის ეკითხათ, მან კი თანხმობა განუცხადა. როცა ვკითხე, რატომ დათანხმდა ასე ადვილად, მიპასუხა, რომ იცოდა, როგორ მიყვარს სიმღერა და არ უნდოდა ხელისშეშლა. ოჯახი რატომ დამენგრა, ამ დეტალებზე არ ვისაუბრებ, ერთს ვიტყვი, რომ ეს ჩემი ბრალი არ იყო.
– შერიგებაზე არ ფიქრობთ?
– ამაზე ლაპარაკიც ზედმეტია, რადგან წელიწადნახევარია ერთმანეთი არ გვინახავს. არ ვიტყვი, რომ ეს ადამიანი მძულს, რადგან საერთო შვილი გვყავს. არ მინდა, ჩემმა შვილმა დაინახოს, რომ მის მშობლებს ცუდი ურთიერთობა აქვთ. მას თავისი ცხოვრება აქვს, მე – ჩემი.
– როგორ ზრდით შვილს? მით უმეტეს, რომ ბიჭია და ალბათ მამა ძალიან სჭირდება.
– არ მინდა, შვილის ქება გამომივიდეს, მაგრამ ლუკა ძალიან ჭკვიანი ბიჭია. თავიდან მამაზე მელაპარაკებოდა, მაგრამ რაც დრო გადის, თვითონაც რომ ვკითხო მასზე რამე, სხვა თემაზე გადამიტანს ხოლმე საუბარს. ხვდება, რომ ეს თემა ჩემთვის სასიამოვნო არ არის. ან რა უნდა მითხრას? შვილთან ძალიან თბილი ურთიერთობა მაქვს. სახლში როცა ვარ, სულ კალთაში მიზის. ერთად ვმეცადინეობთ. მოვა და სახეს დამიკოცნის ხოლმე. ახლა ქობულეთშია, იქ დადის სკოლაში.
– კონკურსში გამოჩენის შემდეგ ყოფილი მეუღლე ან მისი საახლობლო არ გამოგეხმაურათ?
– ყოფილი მეუღლე – არა, მისი ნათესავები თუ მეგობრები კი მუდმივად მეხმაურებიან, მგულშემატკივრობენ. ყველას ძალიან უხარია, რასაც მივაღწიე და გული შესტკივათ იმის გამო, რომ ჩვენი ოჯახი დაინგრა. იმედი აქვთ, რომ შევრიგდებით, მაგრამ მე არ ვაპირებ. ადამიანი ერთხელ რომ დაუშვებს შეცდომას, მერე გაიმეორებს.
– ადვილი არ იქნებოდა ამ ტრავმის გადატანა.
– ძალიან განვიცდიდი. იყო შემთხვევა, როცა სცენაზე ვიდექი და ტირილით ვმღეროდი, მაგრამ ეს ტკივილი გადავლახე.
– ძალიან ადრეა ახალ ურთიერთობებზე საუბარი, მაგრამ მაინც გკითხავთ – პირველმა წარუმატებელმა ოჯახურმა თანაცხოვრებამ მეორედ გათხოვების შიში ხომ არ გაგიჩინათ?
– შიში არ გამჩენია, მაგრამ ძალიან ფრთხილი გავხდი. დღეს არავინ მაინტერესებს, რადგან, რაც გამოვიარე, ამან მასწავლა, თუ რა ხდება ოჯახური თანაცხოვრების დროს. შეიძლება უკეთესიც მოხდეს, მაგრამ უარესს ნამდვილად ვერ გადავიტან. ჯერჯერობით არ მინდა, პირადი ცხოვრება მქონდეს – შვილი მყავს და კარიერაზე ვზრუნავ.
– ქალებს მოუწოდებთ, რომ მხარი დაგიჭირონ, რათა ერთად დაამტკიცოთ საკუთარი სიძლიერე. ცოტა ფემინისტური განცხადებაა. რატომ გადაწყვიტეთ, ასე მიგემართათ გულშემატკივრებისთვის?
– იმიტომ, რომ ძალიან ბევრია ჩემნაირი, ვისაც ოჯახი დაენგრა. უნდა გამაგრდნენ და დეპრესიაში არ ჩავარდნენ. მჯერა, რომ ქალებს ბევრი რამ გამოგვდის კარგად. უფრო ამბიციურები ვართ და მეტის მიღწევა შეგვიძლია, ვიდრე მამაკაცებს.
– ამ პროექტში მონაწილეობით საკუთარ თავს დაუმტკიცეთ, რომ ძლიერი ხართ?
– კი, საკუთარ თავს დავუმტკიცე, რომ ძლიერი ვარ და მინდა, ასე გავაგრძელო.
მანანა ნოდია