ნამდვილი ამბავი. იუმორი.

სტუმრები გვყავდა დღეს და ერთმა სტუმარმა სიცილით გვითხრა: ვერ წარმოიდგენთ ორი დღის წინ რას შევესწარიო. რა ნახე ასეთიო რომ ვკითხეთ დაიწყო ამბის მოყოლა.

ნადირობის მოყვარული კაცია და მეორადი საქონლის მაღაზიაში შესულა, ძალიან კოხტა, დათბილული და სანადიროდ ძალზე საჭირო ჩექმა დაუნახია დახლზე. ჯერ ფასი უკითხავს: რა ღირსო?! გამყიდველ ქალბატონს უთქვამს 40 ლარიო.

აუღია და მოუზომია, მაგრამ სამწუხაროდ დიდი გამოდგაო. გულდაწყვეტილმა დავდე დახლზე და ამ დროს კარგა ზორბა კაცი შემოვიდაო. ჩექმისთვის ხელი მოუკიდია და რა ღირსო-გამყიდველს უთქვამს 40 ლარიო. ჩამომჯდარა სკამზე და ჩაუცვამს ცალი ჩექმა, მეორე არა გაქვთო? მიუციათ მეორეც. ჩაუცვამს ესეც და თუ შეიძლება ცელოფანი მომეცით ჩემი ტუფლებისთვის ბარემ ამით წავალო. მიუციათ ცელოფნის პარკი ჩაუდია ტუფლები და საფულე ამოუღია, დაიწყო დათვლა და დამაინტერესა, რადგან 40 ლარზე მეტი ჰქონდა უკვე დათვლილიო. დაუდია დახლზე ფული და გასულა. დაუთვლიათ გამყიდველებს ფული და 80 ლარი გამოდგაო. უყვირია გამყიდველს: მობრუნდით აქეთო, მობრუნებულა ის ზორბა ჩექმებიანი კაცი, შემოსულა მაღაზიაში და თქვენ ხომ მითხარით ცალ ჩექმაზე 40 ლარი ღირსო, მეც ორივეს საფასური 80 ლარი დავტოვე და რა გაჩხუბებთო?!

ამ ჩემს სტუმარს უკითხავს: კაცურად სადაური ხარო. სადაური ვარ და მესტიელიო, გამყიდველმა 40 ლარი უკანვე დაუბრუნა და რომ გავიდა ის სვანი სამივე ერთად ავხარხარდითო.

იტყუები რაღაცას მეთქი და არაკაცი ვიყო თუ ვტყუოდეო, დამაინტერესა და იმ ქალბატონებსაც ვკითხე დღეს-სიმართლე გამოდგა.

სახელი და გვარი რომ ვიცოდე, ვკითხავდი იმ კაცზე ჩემს ძმებს მესტიაში და სხვა ხოხმაც ბევრი ექნებოდა ჩადენილი, იმასაც ვკითხავდი და თქვენც მოგიყვებოდით.