რას მოგვითხრობს ფინჯანი... მისი მფლობელის ხასიათზე

როგორი ჭიქიდან მიირთმევთ ყავას ან ჩაის? თურმე, ფინჯნის ფორმას და გარეგნულ მხარეს ბევრი რამის თქმა შეუძლია ადამიანზე...

ყავის პატარა ჭიქა - მოწესრიგებული

თქვენ უპირატესობას მაგარ ესპრესოს ანიჭებთ, თანაც, უშაქროდ და ნაღების გარეშე - გიყვართ ყველაფრის წინასწარ დაგეგმვა. ყოველდღიური ხმაურისა და ფუსფუსის მიუხედავად, ინარჩუნებთ სრულ სიმშვიდეს და ცდილობთ, ყველაფერში წესებით იხელმძღვანელოთ. თუ ყავის დალევა თეთრი ფინჯნიდან გიყვართ, ესე იგი, ოპტიმისტი ბრძანდებით.

ჭიქა ფოტოგამოსახულებით - შინ ყოფნას არაფერი გიჯობთ

თუ გატაცებული ხართ ფოტოებიანი ჭიქებით, იმას ნიშნავს, რომ არ გიყვართ ნაჩქარევი გადაწყვეტილებების მიღება და ძალიან გჭირდებათ ახლობელი ადამიანების მხარდაჭერა. ოჯახის გამო მზად ხართ, უარი თქვათ საკუთარ ინტერესებზე. გაკმაყოფილებთ ის, რაც გაქვთ და არ მიილტვით ახალი მწვერვალების დაპყრობისკენ.

ჭიქა, რომელზეც გამოსახულია გულები - ფაქიზი ნატურა

სხვადასხვა ზომის გულებით, სტრაზებით (ანუ ხელოვნური ქვებით) გაფორმებული ჭიქების სიყვარული იმას ნიშნავს, რომ თქვენთვის გულის ტკენა ადვილია და საკმაოდ ფაქიზი ადამიანი ხართ. თქვენ ხშირად თავადვე უწევთ საკუთარ თავს კომპანიონობას და გიყვართ მოვლენების დრამატიზება.

ფაიფურის სახურავიანი ფინჯანი - პერფექციონისტი

ამ დახვეწილი ფინჯნის მფლობელი საკუთარ თავში დარწმუნებულია და უნდა, ხაზი გაუსვას თავის სტატუსს. მისთვის სულ ერთი არ არის, რომელი ჭიქით დალევს საყვარელ სასმელს - ის ყველაფერში სრულყოფილებისკენ მიისწრაფვის. ის წვრილმანებსაც არ ტოვებს უყურადღებოდ და ზოგჯერ ზედმეტად მომთხოვნიცაა ირგვლივ მყოფების მიმართ.

მინის გამჭვირვალე ფინჯანი - პირდაპირი ადამიანი

თქვენი წონასწორობიდან გამოყვანა ძალიან ძნელია. სიძლიერე და თავდაჯერებულობა საშუალებას გაძლევთ, პირდაპირ უთხრათ ადამიანს, რასაც მასზე ფიქრობთ. თქვენი ხასიათის ძირითადი თვისება - პირდაპირობაა. იქნებ ღირდეს, ზოგჯერ მაინც უფრო ლმობიერი იყოთ ადამიანების მიმართ?

სასაცილო ნახატები - კომუნიკაბელური

თუ გიყვართ ჩაის ან ყავის დალევა მსგავსი ჭიქებიდან, ესე იგი, არაჩვეულებრივი იუმორის გრძნობა გაქვთ, თქვენ არასდროს ხართ მარტო და ყველას თქვენკენ მოუწევს გული. თუმცა არაჩვეულებრივი ხასიათისა და ღიმილის მიღმა ხშირად მალავთ შინაგან დისკომფორტს.

ფინჯანი ლამბაქით - მეოცნებე

ულამაზესია ლამაზად მოხატული, თხელი ფაიფურის, ლამბაქზე შედგმული ფინჯანი, რომელიც უდავოდ რომანტიკოსი და მეოცნებე ადამიანის საყვარელი ჭურჭელი შეიძლება იყოს. ამ საოცარი ქმნილების მფლობელნი კეკლუცები არიან, უყვართ სხვებზე სასიამოვნო შთაბეჭდილების მოხდენა.

თათია ბეჟიტაშვილი