ზურა ხაჩიძე სცენაზე შვილთან ერთად ბრუნდება

მომღერალი ზურა ხაჩიძე პოლიტიკურ ასპარეზზე ორჯერ გამოჩნდა და ორივეჯერ მარცხი განიცადა, თუმცა თავის არჩევანს შეცდომად მაინც არ მიიჩნევს. პოლიტიკის გამო მომღერალს თავისი საქმის მიტოვება მოუწია, აპროტესტებდა მმართველი პარტიის იდეოლოგიას, "ნომენკლატურულ" შოუბიზნესს. საქართველოში ხელისუფლების შეცვლის შემდეგ კი თვლის, რომ მისი სიმღერის დრო ისევ მოვიდა და იმედი აქვს, კონცერტებზე გამომსვლელების სიიდან მის გვარს აღარავინ ამოშლის.
25 დეკემბერს ზურა 34 წლის გახდა. ოჯახმა მას დიდი ზეიმი მოუწყო. ჯგუფი "ქუჩის ბიჭები" და ზურას მთელი ოჯახი ახალი წლის მობრძანებას ერთად შეეგება, რაც დიდიხანია აღარ გაუკეთებიათ. ჯგუფისთვის 2013 წელი საკმაოდ ნაყოფიერად დაიწყო, რეგიონებში არაერთი კონცერტი გამართეს. "ნინი და ქუჩის ბიჭები" – ეს სიმღერა, რომელიც ალბათ ყველას ახსოვს, ამჯერად ზურამ შვილთან, 6 წლის ანასტასიასთან ერთად ჩაწერა. ბედნიერი მამა ირწმუნება, რომ ბავშვი მასზე უკეთ მღერის.
– ზურა, პოლიტიკურ ასპარეზზე მარცხი უკვე მეორედ განიცადეთ. არ ფიქრობთ, რომ პოლიტიკაში წასვლა შეცდომა იყო?
– შეცდომა – არა, წარუმატებელი ნაბიჯი იყო. არც უზნეობა ჩამიდენია. ყოველ მარცხზე ვიზრდები. ცხოვრება ასეთია. ისე, სიმღერა რომ დავიწყეთ, მაშინაც ბევრს ეგონა, არასწორი არჩევანი იყო. დღეს პირველ სამ სიმღერას რომ ვუსმენ, გული მერევა. მაგრამ, აბა, ნახეთ, ბოლო სიმღერები რა ხარისხისაა, შედარებაც კი არ შეიძლება. ეს არის პროგრესი. მაცადეთ, ბატონო, იქნება პოლიტიკაშიც გამიმართლოს... (იცინის).
– საერთოდ, რამ გადაგაწყვეტინათ პოლიტიკაში გარევა?
– ჯერ კიდევ 2008 წელს ბორჯომში გაერთიანებული ოპოზიციის სახელით მაჟორიტარ დეპუტატად ვიყრიდი კენჭს, ამ ბოლო არჩევნებზე კი – ქრისტიან–დემოკრატების სახელით დიდუბე–ჩუღურეთის რაიონში. თქვენ იცით, რომ 2007 წლიდან ვაპროტესტებდი წინა მთავრობის რეჟიმს, ფაქტობრივად, არც ერთი მიტინგი გამომიტოვებია. ვხედავდი, რომ ქვეყანაში იყო შერჩევითი სამართალი, ვხედავდი, როგორ გვეცლებოდა ხელიდან ახალგაზრდა თაობა. ეს კი შემაძრწუნებელი იყო. პოლიტიკა არასოდეს მაინტერესებდა, უბრალოდ მინდოდა, ამ ქვეყანაში სამართალი ყოფილიყო. რაც სცენაზე გამოვჩნდი, მას მერე ყოველთვის იყო შემოთავაზება სხვადასხვა პოლიტიკური გუნდიდან, მაგრამ ამის სურვილი არასოდეს გამომიხატავს. თუმცა იმ პოლიტიკურმა ფონმა მიმიყვანა გადაწყვეტილებამდე, რომ ჩემი ქვეყანა დამეცვა და პოლიტიკურ ფერხულში ჩავბმულიყავი.
– თქვენი ბოლო არჩევანი როგორ მიიღო საზოგადოებამ?
– შეფასებები არაერთგვაროვანი იყო. ზოგმა მისაყვედურა, რატომ წახვედი ქრისტიან–დემოკრატებთანო, ზოგმა – პირიქით, მომიწონა. როცა რომელიმე პოლიტიკური გუნდის წევრი ხდები, უკვე მხარე ხარ და, ბუნებრივია, შენი არჩევანი ყველას არ მოეწონება.
– რატომ არ დადექით "ქართული ოცნების" გვერდით? როგორც ვიცით, მათ იდეოლოგიას ემხრობოდით.
– მათი მხრიდან უნდა ყოფილიყო ინტერესი. იმ გარდამტეხ მომენტში, როცა ასეთი პოლიტიკური ფონი იყო, თავს პასიურობის უფლება ვერ მივეცი და ჩემი პოზიცია დავაფიქსირე. ავირჩიე ქრისტიან–დემოკრატები, რომლებსაც ამ ეტაპზე მორატორიუმი აქვთ გამოცხადებული. ახალ ხელისუფლებას უნდა აცადონ, დააკვირდნენ. თუმცა ქრისტიან–დემოკრატების გეგმებზე ცოტა გამიჭირდება საუბარი, რადგან არ ვიცი, რას გეგმავენ.
– თქვენმა ყოფილმა თანამებრძოლმა ინგა გრიგოლიამ, შეიძლება ითქვას, ბოლო წუთს მოხსნა თავისი კანდიდატურა და გააკეთა განცხადება, რომ პოლიტიკიდან წავიდა. თქვენც ხომ არ აპირებთ, პოლიტიკას დაემშვიდობოთ?
– საბოლოოდ მივხვდი, რომ პოლიტიკა ჩემი საქმე არ არის და სიმღერას უნდა დავუბრუნდე. რაც შეეხება ინგას, მიჭირს ადამიანების გადაწყვეტილებებზე ლაპარაკი. შეიძლება საკუთარ თავზე ვთქვა, რომ რაღაც სიტუაციაში შეცდომა დავუშვი, მაგრამ სხვაზე როგორ ვთქვა, მისი მხრიდან ეს შეცდომა იყო–მეთქი?! თუმცა ინგას რომ თავისი კანდიდატურა არ მოეხსნა, დარწმუნებული ვარ, ქრისტიან–დემოკრატიული პარტია 6 პროცენტს აიღებდა, ბარიერს გადალახავდა და პარლამენტში შევიდოდა.
– სცენაზე თქვენს დაბრუნებას ალბათ მოჰყვება კრიტიკა, თუ სიმღერა უნდოდა, ემღერა, პოლიტიკაში რას მიდიოდაო.
– ამას შეჩვეული ვარ. როცა ხათუნა (ჟორდანია. ავტ.) მოვიყვანე ცოლად, ჩვენს ურთიერთობაზე დაუსრულებლად ლაპარაკობდნენ. პოლიტიკურ ასპარეზზე რომ გამოვჩნდი, არანაკლები კრიტიკის ქარცეცხლში მოვყევი. ზოგიერთისთვის პირდაპირ შოკისმომგვრელი იყო ქრისტიან–დემოკრატებში ჩემი გამოჩენა. ასე რომ, როცა რაღაცას აკეთებ, კრიტიკისგან თავის დაძვრენა გარდაუვალია, ამაში დავრწმუნდი.
– ხელისუფლების ორგანიზებულ კონცერტებში მიიღებთ მონაწილეობას?
– ჯერ არ ვიცი, ამ ახალ წელს ქუჩაში არანაირი კონცერტი არ ჩატარებულა... ვაცადოთ, არ იქნება სწორი, ახლავე დავეტაკოთ და რაღაცეები მოვითხოვოთ. უამრავი სხვა პრობლემაა, რაც უნდა მოგვარდეს და კონცერტებზე შემდეგ ვიმსჯელოთ.
– ყოველ შემთხვევაში, შავ სიაში ალბათ აღარ მოხვდებით.
– ყველა კონცერტზე გვბლოკავდნენ და არამარტო ჩვენს ჯგუფს, ნინი ქარსელაძესაც. ჩვენს სახელებსა და გვარებზე წითელი ხაზი იყო გადასმული, არსად უნდა გავჭაჭანებულიყავით. ხელოვანებისთვის ნამდვილად რთული წლები იყო. მინდოდა, მემღერა, მაგრამ საქართველოში ამის დრო არ იყო. ნათქვამიც მქონდა, სანამ ჩვენს ქვეყანაში მთავრობა არ შეიცვლება, სიმღერას არ დავუბრუნდები–მეთქი. შიგადაშიგ ახალ სიმღერებს ვწერდი, უბრალოდ ეს საქმე მენატრებოდა.
– როგორ ფიქრობთ, ახალ თაობას მოსწონს თქვენი ჯგუფის რეპერტუარი? იქნებით ისეთივე წარმატებული, როგორიც წლების წინ?
– რა გგონიათ, თინეიჯერები რასაც უსმენენ, ჩვენ იმავე ჟანრს არ ვუსმენთ? არ ვიცით, მათ რა მოსწონთ? ახალი თაობის მოხიბლვას ძალიან მარტივად შევძლებთ. თუ ქვეყანაში ყველაფერი დალაგდება, მუსიკალური არხები გაიხსნება, აქტიურად გამოვჩნდებით. თუ იგივე ვაკუუმი გაგრძელდება, რა თქმა უნდა, უძლურები ვიქნებით.
– ხედავთ იმის ნიშნებს, რომ ეს ვაკუუმი შენარჩუნდეს?
– არა მგონია, ასე იყოს, თუმცა "ჯიდიეს"–ზე რასაც ვუყურებ, იქ მომღერალ ბერას გარდა არავინ ჩანს. ამ ეტაპზე წელიწადში ერთხელ მხოლოდ მაია ასათიანის "პროფილში" ვმღერით. მას დიდ პატივს ვცემ, მაგრამ ეს არ ჰყოფნის მუსიკის და კლიპის გაპიარებას.
"ქუჩის ბიჭებმა" შარშან ორი სიმღერა ჩავწერეთ – "დაბრუნება" და "გასულები ვართ სხვაგან". კლიპიც გადავიღეთ. ახალი სიმღერებიც გვაქვს. ჩემს შვილთან, ანასტასიასთან, დუეტი ჩავწერე. ძალიან დიდი იმედი მაქვს, რომ ესტრადას ეშველება. არავინ გაბედავს იმას, რომ ე.წ. წინა ხელისუფლების მომღერლები დაიჩრდილონ. სამთავრობო კონცერტების ორგანიზატორებს ყოველთვის მივცემ შენიშვნას, თუ მომღერალს მხოლოდ იმიტომ დაბლოკავენ, რომ ადრე მიშა სააკაშვილს უჭერდა მხარს. ყველას აქვს იმის უფლება, ვიღაცას მოსწონდეს ბიძინა ივანიშვილი და ვიღაცას – მიშა სააკაშვილი. თავისუფალი აზრი არ უნდა შეიზღუდოს.
– 2013 წლისგან რას ელოდებით?
– ყველაფერ კარგს. მადლობა ღმერთს, რომ ასეთი კარგი მოძღვარი, ოჯახი და მეგობრები მყავს. მადლობა ჩემს ოჯახს, რომელიც მყავს ბორჯომში და მადლობა ხათუნას, მის ძმას, მერაბს. მყავს ანგელოზივით ორი გოგო – ანასტასია და ნინი. ამაზე მეტი ბედნიერება რა უნდა უნდოდეს კაცს?! ვინც მიცნობს, მათ იციან, რომ მხოლოდ საკუთარი კეთილდღეობისთვის არასოდეს მიცხოვრია. ვცხოვრობ ადამიანების კარგად ყოფნისთვის. ყველას გილოცავთ ახალ წელს! უფალი ფარავდეს სრულიად საქართველოს!
ლანა კიკნაძე