რამ დაუტოვა ჯანეტ ქერდიყოშვილს სახეზე ნაიარევი

"მის საქართველო 2011", ჯანეტ ქერდიყოშვილი, ცოტა ხნის წინ ხიფათს გადაურჩა. ქუჩაზე გადასვლისას სახეზე ქვა მოხვდა. ჭრილობა იმდენად ღრმა იყო, ოთხი ნაკერი დაადეს. მართალია, ნაიარევი დარჩა, მაგრამ ექიმები ჰპირდებიან, რომ სამედიცინო ჩარევით დროთა განმავლობაში ის გაუქრება.
ჯანეტი, როგორც ყველა ლამაზი გოგო, ბავშვობიდან ყურადღებას აქცევდა გარეგნობას. დღეს კი მან ზუსტად იცის, როგორი მაკიაჟი ან ვარცხნილობა უხდება. უფრო მეტიც, ხშირ შემთხვევაში სტილისტების დახმარებაც არ სჭირდება. მაგალითად, "მის მსოფლიოს" კონკურსზე მაკიაჟიც თავად გაიკეთა და თმაც. მომავლისთვის ვარცხნილობის შეცვლა სურს, საკუთარი თავი მოკლე და ფერფლისფერ თმაში წარმოუდგენია, მაგრამ გარკვეულ ეტაპამდე ამ ნაბიჯისგან თავს იკავებს. იცის პატარ–პატარა საიდუმლოებები, როგორ შენიღბოს ნაკლი და ზედმეტი კილოგრამები, რასაც "სარკის" მკითხველებსაც სიამოვნებით უზიარებს.
– ჯანეტ, რა ასაკში გაიკეთეთ პირველი მაკიაჟი?
– მაკიაჟი ბავშვობიდან მაინტერესებდა. არ მახსოვს, ინტერნეტით თუ ვინმეს დახმარებით, მისი გაკეთებაც ვისწავლე. ჩემს ნათესავ გოგოს ძალიან ლამაზი, შვლის ნუკრის მსგავსი თვალები ჰქონდა და ძალიან მომწონდა, როცა ვხედავდი, თუ როგორ იღებავდა. საკმაოდ გვიან, მეთერთმეტე კლასში დავიწყე მაკიაჟის ხელოვნების შესწავლა და დღემდე თვითონ ვიკეთებ.
– მაკიაჟით სახეზე რის გამოკვეთას ცდილობთ, აქცენტს რაზე აკეთებთ?
– ჩემი აზრით, როცა ადამიანს პირველად ხედავ, თვალებს აქცევ ყურადღებას. სადღაც წავიკითხე, რომ კაცები ქალებს, პირველ რიგში, თვალებზე აკვირდებიან. ზაფხულში თვალებზე ფერადი ჩრდილების გამოყენება მიყვარს. ყველა ადამიანის თვალის ფორმა განსხვავებულია, ზოგი აწეულია, ზოგი ღრმად ზის და ა.შ. დავაკვირდი, რომ ასაკში შესულ ქალებს არ უხდებათ თვალის ფანქარი, რადგან ქუთუთოები დაბლა ეწევათ და ფანქარი ამას ხაზს მეტად უსვამს. თვალების შეღებვისას თავიდან ღია ფერის ჩრდილი უნდა გამოვიყენოთ და თვალების დაბოლოებებისკენ – მუქი. ასე თვალი უფრო დიდი ჩანს.
რაც არ მიყვარს, ეს არის ტუჩსაცხი. თითქმის არასდროს ვიღებავ ტუჩებს. მგონია, რომ არ მიხდება. ტუჩებზე აქცენტს მაშინ აკეთებენ, როცა მკრთალი სახე და მცირე ზომის ნაკვთები აქვთ. მე დიდი თვალები მაქვს და ტუჩების შეღებვა უკვე ვულგარულად მეჩვენება. შეიძლება ვცდები კიდეც. ფრჩხილის ლაქსაც თვითონ ვისვამ.
– რუსეთში დიდხანს ცხოვრობდით და ალბათ შეგიძლიათ შეადაროთ რუსი და ქართველი ქალები, რა განსხვავებაა მათ შორის.
– აქ უფრო კრიტიკულები არიან. რაც უნდა ჩაიცვა, ვიღაც მაინც გაგაკრიტიკებს. რუსეთში ჩვეულებრივ მოსახლეობას არ აინტერესებს, ვის რა აცვია. ჩვენთან, სხვა ქვეყნებთან შედარებით, გემოვნებით იცვამენ. საქართველოში შეუძლიათ, არაფრისგან ისე ჩაიცვან, რომ ყურადღება მიიქციონ. რუსეთში ჩვეულებრივი ხალხი ძალიან უბრალოდ იცვამს. მოსკოვში ცოტა ხნის წინ ვიყავი. რომ ჩავედი, მაშინვე მიხვდნენ, იქაური არ ვიყავი. დაბრუნებულს კი ყველა მეკითხებოდა, მოსკოვიდან ხომ არ ჩამოხვედი, ჩაცმულობაზე გეტყობაო. აქედან მუქი სამოსით წავედი და იქიდან ბრჭყვიალა ტანსაცმლით და აქსესუარებით დავბრუნდი.
– საკმაოდ ექსტრავაგანტურად გამოიყურებით. გიყვართ გარეგნობით ყურადღების მიქცევა?
– წვეულებაზე მივდივარ და იმიტომ გამოვიყურები ასე. თან სადღესასწაულო დღეებია. სხვაზე მომწონს, გამორჩეულად როცა იცვამენ, თვითონ კი არ მიყვარს ექსტრავაგანტურობა.
– გარეგნობაზე ექსპერიმენტების ჩატარება თუ გაინტერესებთ?
– ყოველთვის მინდოდა, მოკლე და ფერფლისფერი თმა მქონოდა. ახლა გადავწყვიტე, რომ გათხოვებამდე მქონდეს გრძელი თმა და გათხოვების მერე შევიჭრა და შევიღებო. ისე კი, ექსპერიმენტების დიდად მოყვარული არ ვარ, ადვილად ვერ ვრისკავ.

– გათხოვებას რატომ ელოდებით, რომ თმა შეიჭრათ?
– ქორწილს განსაკუთრებულ მნიშვნელობას ვანიჭებ და მინდა, ამ დღეს გრძელი თმა მქონდეს. მსურს, ჩემი კაბა გრძელი შლეიფით იყოს. დაახლოებით ისეთი, როგორიც პრინცესა დაიანას ეცვა. არ მიყვარს, როცა პატარძალი ბევრს ცეკვავს. ვიცი, რომ მამაჩემის, ჩემი ძმის და ქმრის გარდა არავის ვეცეკვები. მინდა, რომ ქორწილში მეორე კაბა ჩავიცვა და, რაც მთავარია, ეს დღე ორ ქალაქში აღვნიშნო, აქ და მოსკოვში.
– ისე ლაპარაკობთ, მგონი, ქორწილი უკვე დაგეგმილი გაქვთ. საქმრო გყავთ?
– სამწუხაროდ, არა, მაგრამ ახალი წელი დადგა, სურვილები ჩავიფიქრე და ვნახოთ. ახალი წლის ღამეს, 12 საათზე, ხელსახოცზე სურვილებს ვწერ, ვწვავ, ფერფლს შამპანურში ვყრი და ვსვამ. ყოველთვის მისრულდება ჩაფიქრებული სურვილი. მაგალითად, 2011 წელს ვისურვე, "მის საქართველო" გავმხდარიყავი და ამისრულდა...
– სარკის წინ დგომისას თქვენს გარეგნობაში რა მოგწონთ და რა – არა?
– არ მესმის იმ კატეგორიის გოგონების, სარკის წინ რომ დგანან და ფეხის სიგრძეს ან ცხვირის ფორმას უწუნებენ საკუთარ თავს. ყოველთვის უფლის მადლობელი უნდა იყო იმით, რაც მოგცა. თუკი საჭიროა, არ ვარ პლასტიკური ქირურგიის წინააღმდეგი, მაგრამ ზედმეტი არაფერი მიყვარს. არ ვარ ისეთი, სარკის წინ მდგომი საკუთარ თავს ვეუბნებოდე, რომ ძალიან კარგი ვარ, მაგრამ არც ვწუწუნებ. ცოტა ხნის წინ რუსეთში წასვლამდე შემემთხვა ასეთი ამბავი: ქუჩაზე გადასვლისას, არ ვიცი, ვიღაცამ მესროლა თუ მანქანის ბორბალმა აისხლიტა, სახეზე კენჭი ისეთი ძალით მომხვდა, რომ ოთხი ნაკერის დადება დამჭირდა. ახლა ოდნავ მეტყობა პატარა ნაიარევი, მაგრამ მამშვიდებენ, რომ დროთა განმავლობაში სამედიცინო ჩარევებით გააქრობენ. მაშინაც კი, სარკეში რომ ვიყურებოდი და სამედიცინო ბინტი მქონდა სახეზე, ვცდილობდი, არ მეწუწუნა, მით უმეტეს, რომ სახე ჩემთვის ძალიან მნიშვნელოვანია. ვფიქრობდი, მადლობა ღმერთს, ის კენჭი თვალში არ მომხვდა–მეთქი.
– არასოდეს ხართ ისეთ განწყობაზე, როცა საკუთარი გარეგნობა არ მოგწონთ და არსად წასვლა არ გინდათ?
– ასეთი რამ არ მახსენდება. პირიქით, სულ მინდა, მოძრაობაში ვიყო. ყოველთვის სიახლის ძიებაში ვარ. წონას დიდი მნიშვნელობა აქვს. ახალი წლების მერე ბევრი იმატებს. ასეთ დროს არაფერი მოგწონს საკუთარ თავზე და გარეთ გასვლაც არ გინდა.
– თქვენ რას აკეთებთ, რომ არ მოიმატოთ?
– რუსეთში ყოფნისას სულ ვიმატებ, რადგან იქ სავაჭრო ცენტრებში სიარულისას მუდმივად ვჭამ. ჩემი სისუსტე ტკბილეულია, რაზეც უარს ვერ ვამბობ. მაგრამ ახლა ისე დავბრუნდი მოსკოვიდან, არ მომიმატია. ვცდილობ, სწორად ვიკვებო, რადგან დიეტას აზრი არ აქვს, მისი დასრულების მერე მაინც აკრიფავ დაკარგულ კილოგრამებს. დავაკვირდი, რომ თუ საღამოს 6 საათის მერე არაფერს შეჭამ, დღის განმავლობაში როგორც უნდა იკვებო, არ მოიმატებ. მეც ამას ვცდილობ. ან ხშირად უნდა იკვებო და ცოტ–ცოტა. ესეც ეფექტურია.
– თქვენი გარეგნობა კრიტიკის თემა გამხდარა?
– როგორ არა, მაგრამ კრიტიკა მიმიღია. ყველამ იცის, რა ნაკლი აქვს, როგორ დაფაროს და დადებით მხარეს როგორ გაუსვას ხაზი. სოციალურ ქსელში წამიკითხავს, რომ არ მაქვს "მის საქართველოს" გარეგნობა. ეს თავიდან მწყინდა, მაგრამ ახლა უკვე ყურადღებას არ ვაქცევ.
– თუ საიდუმლო არაა, რა არის თქვენი ნაკლი გარეგნობაში?
– ვფიქრობ, სამი სანტიმეტრით მაღალი რომ ვიყო, სამოდელო კარიერას გავაგრძელებდი. მეტრი და სამოცდათხუთმეტი ვარ. როცა ვიმატებ, ფეხებზე მემჩნევა და ასეთ დროს ვინიღბები ხოლმე. სხვათა შორის, როცა ადამიანი წონაში იმატებს, დაბლები არ უნდა ჩაიცვას. ასეთ დროს ყველაზე კარგი გამოსავალი მაღალქუსლიანი ფეხსაცმელებია.
– უფროსი თაობისგან, დედისგან და ბებიისგან რა ისწავლეთ თავის მოვლასთან დაკავშირებით?
– დედას მაკიაჟის გამოყენება არ უყვარს. პირიქით, ხშირად მე ვურჩევ, როგორი მაკიაჟი გაიკეთოს და რა ვარცხნილობა მოუხდება. რაც შეეხება ბებიის რჩევებს, მისგან ვიცი, რომ კანის გასაწმენდად კარგია მჭადის ფქვილი. ერთხელ გამოვიყენე ეს რეცეპტი და მომეწონა, მაგრამ ზოგადად შინაური რეცეპტებით თავის მოვლა არ მიყვარს, არც დრო მაქვს. ერთხელ თმის ნიღაბი გავიკეთე მაიონეზით, ლიმონით და კონიაკით, რომელიც მთელი ღამე უნდა დამეტოვებინა. კოშმარად მახსოვს ის ღამე!
– ძალიან გრძელი და ლამაზი თმა გაქვთ. როგორ უვლით მას?
– ვარცხნილობას ხშირად თვითონ ვიკეთებ, რადგან ყველაზე კარგად მე ვიცი, რა მიხდება. "მის მსოფლიოზეც" მე გავიკეთე ვარცხნილობა. სტილისტები ყველაფერს სტანდარტულად აკეთებენ, არადა ყველას ინდივიდუალური გარეგნობა აქვს. რაც შეეხება თმის მოვლას, არასდროს მენანება ფული შამპუნებზე, კონდიციონერებსა და ნიღბებზე. თმის ნიღაბს კვირაში ერთხელ ვიკეთებ, მეტჯერ არ შეიძლება. კონდიციონერი კი, თუ მოცულობა გაინტერესებთ, ძირებზე არ უნდა წაისვათ, არამედ ბოლოებზე, რომ თმა არ დავარდეს.
– კანს როგორ უვლით?
– კოსმეტოლოგთან წელიწადში ორჯერ მივდივარ და ვეკითხები, მჭირდება თუ არა რაიმეს გაკეთება კანზე. როგორც წესი, უარით მისტუმრებს. ჯერჯერობით კანს განსაკუთრებულად არ ვუვლი.

მანანა ნოდია