რა მსხვერპლს გაიღებენ ნოდიკო ტატიშვილი და სოფო გელოვანი "ევროვიზიის" კონკურსისთვის

მომღერლები ნოდიკო ტატიშვილი და სოფო გელოვანი 2013 წელს "ევროვიზიაზე" საქართველოს სახელით იმღერებენ. ეს ამბავი მათ 31 დეკემბერს შეატყობინეს. საზოგადოებრივი მაუწყებლის საპროდიუსერო გუნდმა ყოველგვარი შიდაშესარჩევი ტურის გარეშე მათი კანდიდატურები დაასახელა. მომღერლებისთვის ეს შეთავაზება მოულოდნელი იყო და, რა თქმა უნდა, სასიხარულო. წელს "ევროვიზია" შვედეთში გაიმართება. ქართველი კონკურსანტები უკვე სამზადისს შეუდგნენ.
რატომ ამჯობინა საზოგადოებრივმა მაუწყებელმა "ევროვიზიაზე" გასაგზავნი მომღერლების შერჩევის ასეთი გზა – პირდაპირი წესით დასახელება, ყოველგვარი ტურის გარეშე, "ევროვიზია საქართველოს" პროდიუსერი ნათია უზნაძე განმარტავს:
– წელს პირველად საზოგადოებრივმა მაუწყებელმა თავად გადაწყვიტა, ყოველგვარი წინაშესარჩევი კონკურსის გარეშე შეერჩია "ევროვიზიაზე" წამსვლელი მუსიკოსი. "ევროვიზიის" წესებით, ეს ნებადართულია და წელს ჩვენ და მაკედონიამ გამოვიყენეთ ასეთი უფლება. ორი დღე ძალიან დატვირთული მუშაობა გვქონდა, ვფიქრობდით ყველა მომღერალზე, რომელსაც აქვს სცენაზე დგომის კარგი გამოცდილება, ვფიქრობდით სოლო მომღერლებზე, დუეტებზე, ტრიოებზეც კი, მაგრამ საბოლოოდ ნოდიკო და სოფო გადავწყვიტეთ იმიტომ, რომ ორივე კარგი სოლისტია, ძალიან შრომისმოყვარეები და მოწესრიგებულები არიან.
ჩვენ მათზე ვიზრუნებთ მთლიანად, რეპერტუარიდან დაწყებული იმიჯით დამთავრებული. ამ დუეტს მთლიანად საზოგადოებრივი მაუწყებელი შექმნის. აქამდე კი ჩვენ ვმუშაობდით მომღერალთან, რომელსაც თავისი სიმღერა ჰქონდა და მას ვეხმარებოდით, "ევროვიზიის" სტანდარტებში ჩამჯდარიყო. ვფიქრობ, წელს ძალიან საინტერესო კონკურსანტები გვეყოლება "ევროვიზიაზე".
...
ნოდიკო 2009 წელს ჯეოსტარი გახდა, სოფო კი "ჯეოსტარი 2010"–ის ფინალისტია. მათი შემოქმედებითი წარსული ერთმანეთს ძალიან ჰგავს. არაერთი საერთაშორისო კონკურსის გამარჯვებულნი არიან. დუეტშიც არაერთხელ უმღერიათ. ერთობლივი პროექტიც ჰქონდათ დაგეგმილი – თებერვალში კონსერვატორიის დიდ საკონცერტო დარბაზში ძველი ქართული სიმღერების გაცოცხლებას აპირებდნენ, მაგრამ მათი გეგმები "ევროვიზიამ" თავდაყირა დააყენა. ამ სასიამოვნო სიურპრიზზე, წინასაკონკურსო ეიფორიასა და ემოციებზე სოფო და ნოდიკო "სარკეს" ესაუბრნენ.
– 2012 წლის 31 დეკემბერს თქვენს "ფეისბუქზე" სტატუსი დაწერეთ, არ გვეგონა, წლის ბოლო დღეს ასეთ სასიხარულო ამბავს თუ შევიტყობდითო. არ ელოდით "ევროვიზიაზე" თქვენი კანდიდატურების წარდგენას?
სოფო: არ ვიცოდი, წლის ბოლო დღეს ასეთი ბედნიერი დასასრული თუ ექნებოდა. ჩვენთვის 2013 წელი განსხვავებულად დაიწყო.
ნოდიკო: "ევროვიზიაზე" არც ერთს გვიფიქრია, მით უმეტეს, დუეტში სიმღერაზე. ამ ამბავმა ცოტა დაგვაბნია. ყველაზე სასაცილო კი ის იყო, რომ შემოთავაზების შემდეგ გვკითხეს, დუეტში სიმღერის საწინააღმდეგო ხომ არაფერი გაქვთო.
სოფო: რატომღაც რომ უარი გვეთქვა!
ნოდიკო: ჩვენ ერთმანეთთან კარგად ვართ შემღერებული, გარდა ამისა, მეგობრები ვართ, ერთმანეთს პატივს ვცემთ. ძალიან მნიშვნელოვანია, როდესაც სცენაზე გყავს პარტნიორი, რომელსაც შენი კარგად ესმის.
სოფო: ნოდიკოს სოლო კონცერტზე ანრი ბასილაიას სიმღერა ერთად შევასრულეთ. როცა "ჯეოსტარში" ვმონაწილეობდი, ნოდიკომ ჩემთან ერთად იმღერა. სიმღერის დროს ნოდიკო სრულ კომფორტს მიქმნის.
ნოდიკო: სოფო 2010 წელს "ჯეოსტარში" ჩემი ერთ–ერთი ფავორიტი იყო.
– საკონკურსო გამოცდილება ორივეს გაქვთ, მაგრამ "ევროვიზია" უფრო მასშტაბურია. მასში მონაწილეობა თქვენთვის სიამოვნება უფროა თუ დაძაბულობა და ნერვიულობა?
სოფო: კონკურსის დროს სწრაფი რიტმით და აჩქარებული პულსაციით ცხოვრობ. ჩვენს შემოქმედებით ცხოვრებას რომ გადახედოთ, ერთმანეთს ძალიან ჰგავს. ორივე ხშირად დავდიოდით კონკურსებზე, არაერთი გრანპრი და პირველი ადგილი გვაქვს აღებული, თუმცა "ევროვიზია" არ ჰგავს სხვა კონკურსებს, იქ მარტო სიმღერას არ ექცევა ყურადღება. ბევრი ეტაპის გავლაა საჭირო...
ნოდიკო: "ევროვიზიის" ფინალი არის ძალიან არაპროგნოზირებადი, ეს არის კონკურსი, სადაც ვერ გათვლი, რა სიმღერამ შეიძლება გაიმარჯვოს. ხშირად ამბობენ, რომ პოლიტიზირებული კონკურსია, მაგრამ ეს არ გვაინტერესებს და არც პროგნოზების გაკეთებას ვაპირებთ. ჩვენი ერთადერთი ამოცანაა, ქვეყანა ღირსეულად წარვადგინოთ. თავს არ დავზოგავთ, ბევრს ვიმუშავებთ, სცენაზე რომ გავალთ, გვინდა, ყველამ თქვას – ბრავო, საქართველო!

– გამარჯვებისა და პირველობის ამბიცია არ გაქვთ?
სოფო: იმედი გვაქვს, რომ ფინალში მოვხვდებით და შედეგიც ცუდი არ გვექნება, თუმცა სახელმწიფოებრივი ფაქტორი დიდ როლს თამაშობს. კარგად ვიმღერებთ და არა მგონია, ვიღაცამ ნაკლები ქულა დაგვიწეროს.
ნოდიკო: პოლიტიკა და მეგობარი ქვეყნების მხარდაჭერა ძალიან მნიშვნელოვანია. "ევროვიზია" ამით განსხვავდება იმ კონკურსებისგან, სადაც ჩვენ აქამდე გვიმღერია.
– რაზე გააკეთებთ მთავარ აქცენტს, ვოკალზე, ვიზუალურ მხარეზე თუ შოუზე?
ნოდიკო: ყველაფერზე ერთად. პირველ რიგში, გვინდა, რომ სიმღერა იყოს კარგი, მელოდიური, დასამახსოვრებელი, ევროპული სტანდარტის.
სოფო: ჩვენთვის მნიშვნელოვანია, რომ გემოვნებიანი იყოს. წლების შემდეგ რომ მოვუსმენთ, უნდა ვიამაყოთ.
ნოდიკო: არ ვაპირებთ, წავიდეთ კომპრომისზე!
– კომპრომისში რას გულისხმობთ? რას არ დათმობთ?
ნოდიკო: გვინდა, რომ სიმღერა ძალიან აკადემიური იყოს, ოღონდ ევროპაზე მორგებული და ადვილად დასამახსოვრებელი.
– ადვილად დასამახსოვრებელი ანუ მარტივი?
ნოდიკო: არა, მარტივი ზუსტადაც არ უნდა იყოს. ორაკორდიანი სიმღერის გატანას ნამდვილად არ ვაპირებთ, მაგრამ ეს იმას არ ნიშნავს, რომ მილიონი აკორდი ექნება.
– ვის სიმღერას იმღერებთ?
ნოდიკო: ჯერ არ ვიცით. ნათია უზნაძესთან ("ევროვიზია საქართველოს" პროდიუსერი. ავტ.) ბევრი წერილი მოდის. უცხოელებისგან უამრავი შემოთავაზებაა, გვთხოვენ, რომ მათ მივანდოთ სიმღერის დაწერა, მაგრამ ამ საკითხში ჯერ ჩამოყალიბებული არ ვართ.
– ქართული ელემენტები შეტანილი იქნება სიმღერაში?
ნოდიკო: არა, რადგან უცხოენოვანი სიმღერის ქართული ელემენტებით გაჯერება მსმენელს აბნევს. ჩვენ, ქართველები, ვიგებთ, მაგრამ უცხოელი მაყურებელი – ვერა. ინგლისურად ვიმღერებთ, ეს საერთაშორისო ენაა და, მგონი, ამაში პრობლემა არ უნდა იყოს.
სოფო: მაგრამ იქნება ქართული სულით ნამღერი. ბევრი გვეკითხება, რომანტიკულ სიმღერას შევასრულებთ თუ არა. არა მგონია, ამ სტილის სიმღერაზე გავაკეთოთ არჩევანი.
– როგორ შოუს დადგამთ, ამაზე ლაპარაკი ალბათ ნაადრევია, მაგრამ ის თუ იცით, თქვენს ჩაცმულობაზე ვინ იზრუნებს?
სოფო: ავთანდილი. ვნახოთ, რაზე შევთანხმდებით.

– თქვენი წინამორბედების გამოცდილებიდან რა დასკვნები გაქვთ გაკეთებული, რა შეცდომებს აღარ გაიმეორებთ?
ნოდიკო: საქართველოდან ვინც კი აქამდე გასულა "ევროვიზიაზე", ყველა მათგანთან ვმეგობრობთ. ჩემი აზრით, მათ შეცდომები არ დაუშვიათ. ისინი ცდილობდნენ, მაქსიმალურად კარგად წარედგინათ საკუთარი თავიც და ჩვენი ქვეყანაც. თითოეულმა ძალიან დიდი შრომა ჩადო. ყველამ თავისი მიმართულებით წაიყვანა სიმღერაც და შოუც. ჩვენც ჩვენი ხაზით წავალთ, არ გვინდა, ვინმეს დავემსგავსოთ. ერთ სასაცილო რაღაცას გეტყვით: როდესაც სოციალურ ქსელში დაიდო ინფორმაცია, რომ "ევროვიზიაზე" ჩვენ მივდიოდით, ევროპული გამოცემები წერდნენ, საქართველოში გოგოებს მარტო სოფო ჰქვიათო. წინა წლებში "ევროვიზიაზე" სოფო ხალვაში, სოფო ნიჟარაძე, სოფო ტოროშელიძე მონაწილეობდნენ და ახლა სოფო გელოვანი იმღერებს. ამან ძალიან გააოცათ.
– ქართველმა კოლეგებმა რა გითხრეს?
ნოდიკო: ბევრმა დამირეკა, პირადად მომილოცა. მადლობა ყველას, ვისაც მართლა გაუხარდა და გამოგვეხმაურა.
სოფო: არ იცით, ეს რამხელა ძალას და სტიმულს გვმატებს.
– ჯერ არავის გამოუთქვამს კრიტიკულ–პესიმისტური აზრი თქვენი დუეტის მიმართ?
სოფო: ჯერ – არა, მაგრამ ველოდებით, რომ კრიტიკა იქნება. ჩვენი მიზანი არ არის, ამ ტიპის საუბრებში მივიღოთ მონაწილეობა, მთავარია, ქვეყანა ვასახელოთ.
– შარშან ამ კონკურსისთვის ანრი ჯოხაძემ თმა შეიღება. თქვენ აპირებთ ვიზუალურ ცვლილებას ან სხვა "მსხვერპლის" გაღებას?
სოფო: ვიზუალის რა მოგახსენოთ, მაგრამ ერთი კი ზუსტად ვიცი, რომ ნოდიკო სიგარეტის მოწევას აუცილებლად დაანებებს თავს. მე, მაგალითად, მზად ვარ, თუ დამჭირდა...
ნოდიკო: თუ "ევროვიზიისთვის" სიგარეტის მოწევა გახდება საჭირო, ამისთვისაც მზად ხარ?
სოფო: მზად ვარ, ყველანაირ მსხვერპლზე წავიდე. მითხრეს, რომ ძალიან არ უნდა გავხდე. მახსოვს, "ჯეოსტარის" ფინალზე ნერვიულობისგან ნახევარი ადამიანი ვიდექი სცენაზე.
ნოდიკო: მე წონაში უნდა დავიკლო, ამისთვის ვაპირებ ტრენაჟორებზე ვარჯიშს, ცურვას. მაისისთვის ფორმაში უნდა ვიყო.
სოფო: ნოდიკო ძალიან ყურადღებიანია, რასაც ეტყვი, მოგისმენს, გაითვალისწინებს. 2 იანვარს, ბედობადღეს, მე, ნოდიკო და ნათია უზნაძე წმინდა გაბრიელის საფლავზე ვიყავით. იქიდან სხვანაირი მუხტით წამოვედით. შემთხვევით არაფერი ხდება. ბევრი ნატრობს "ევროვიზიაზე" წასვლას, მაგრამ ეს ყველაფერი წელს ღმერთმა ჩვენ გვარგუნა.
– შიდაშესარჩევი ტური არ გაიმართა და წელს "პირველმა არხმა" თქვენი კანდიდატურა პირდაპირ დაასახელა. იცით, ასე რატომ მოხდა?
სოფო: მართლაც მხოლოდ წელს მოხდა ისე, რომ საზოგადოებრივი მაუწყებლის საპროდიუსერო ჯგუფმა პირდაპირ ჩვენ დაგვასახელა. მათ ამის უფლება ჰქონდათ, თუმცა სანამ გადაწყვეტილებას მიიღებდნენ, ბევრი კანდიდატურა განიხილეს, ყველა ის მომღერალი, ვინც კი არსებობს საქართველოში. დანარჩენი – არ ვიცი.
ნოდიკო: ნათია უზნაძემ დაგვირეკა და გვითხრა, სასწრაფოდ ტელევიზიაში მოდითო. გვეგონა, პროექტ "10/10"–ში უნდა მიგვეღო მონაწილეობა. ტელევიზიაში რომ მივედით, ჩვენ გარდა არავინ იყო. ყველაფერს ვიფიქრებდით, მაგრამ ვერაფრით წარმოვიდგენდით, რომ "ევროვიზიაზე" ჩვენ წავიდოდით. რომ გვითხრეს, ემოციებს ვერ ვმალავდით. 31 დეკემბერს ნერვული სისტემა მოგვეშალა, სახეზე ღიმილი შეგვეყინა.
სოფო: პირველად ჩემს მეუღლეს დავურეკე და ეს ამბავი ვახარე. მადლობა მას, რომ გვერდში მიდგას და ჩემს სიხარულს იზიარებს.
– ამ შემოთავაზების შემდეგ თქვენს ცხოვრებაში ცვლილებები უკვე დაიწყო?
სოფო: ახლა მე, ნოდიკო და ნათია უზნაძე 24 საათის განმავლობაში ერთმანეთს ვეკონტაქტებით. ჯერ კიდევ ვერ გავაცნობიერე, ჩვენს თავს რა ხდება.
– მარცხზე არ ფიქრობთ? საქართველოს ხომ ამ კონკურსში არც ისე სწყალობს ბედი.
ნოდიკო: ფინალში სიმღერა უკვე წარმატებაა. იმედი მაქვს, რომ ამ შედეგს მივაღწევთ. თუ ფინალში გადავედით, მერე გვექნება სურვილი, რომ მოწინავე ადგილებზე გადავიდეთ.
სოფო: რადგან კონკურსზე გადიხარ, ფსიქოლოგიურად მოგებისთვისაც მზად უნდა იყო და წაგებისთვისაც.
– ზოგადად იღბლიანი ადამიანები ხართ?
ნოდიკო: შრომის გარეშე არასდროს არაფრისათვის მიმიღწევია. კარიერაშიც და პირადშიც თანაბრად იღბლიანი ვარ, მაგრამ ლანგრით ჩემთვის არაფერი მოურთმევიათ. ვცდილობ, სწორად ვიცხოვრო. მართალია, ჯერ საკუთარი ოჯახი არ მაქვს, მაგრამ ბედმა გამიღიმა, რომ მყავს არაჩვეულებრივი მშობლები, და, მეგობრები, რომლებიც ყოველთვის გვერდში მიდგანან. ალბათ იღბალია ის, რომ მე და სოფო "ევროვიზიაზე" ყოველგვარი განსაკუთრებული მზადების გარეშე მოვხვდით.
სოფო: თავს იღბლიანად არ მივიჩნევ, თუ არ ჩავთვლი იმას, რომ არაჩვეულებრივი მეორე ნახევარი მყავს. ადამიანები რასაც ვიმსახურებთ, ალბათ იმას ვიმკით. იღბლის ანაბარა არ უნდა დარჩე არც კარიერაში და არც პირად ცხოვრებაში.
– ნოდიკო, "ევროვიზიამ" ამერიკაში წასვლასთან დაკავშირებით თქვენი გეგმები შეაფერხა?
ნოდიკო: თავისთავად, ახლა მთელი აქცენტი ამ კონკურსზე მაქვს გადატანილი. მოწვევა მზად იყო, ნიუ იორკში ერთ–ერთ აკადემიაში ორი თვით მივდიოდი სასწავლებლად. 10 წლიანი ვიზა მაქვს და ვნახოთ, მომავალში რა იქნება.
სოფო: ასეთი მშრომელი ადამიანი ჯერ არ მინახავს, თავს არ ზოგავს, საქმისთვის ყველაფერს გადადებს. ამიტომ ძალიან მშვიდად ვარ, ზუსტად ვიცი, რომ სამუშაო პროცესში მისი გეგმები ხელს არ შეგვიშლის.
ლანა კიკნაძე