ილია მეორე - მოსკოვში ვიზიტი ისტორიული იყო და მას კარგი შედეგები მოჰყვება

აღწერა : საქართველოს კათოლიკოს-პატრიარქმა, უწმინდესმა და უნეტარესმა ილია მეორემ მოსკოვში ვიზიტს ისტორიული უწოდა. "ღვთის წყალობითა და შეწევნით ვიზიტი იყო ძალიან წარმატებული და ვფიქრობ, ეს იყო ისტორიული ვიზიტი და მას კარგი შედეგები მოჰყვება", - ბრძანა უწმინდესმა.
პატრიარქი მოსკოვიდან გუშინ ჩამობრძანდა. ილია მეორე რუსეთში მოსკოვისა და სრულიად რუსეთის პატრიარქის კირილის მიწვევით 5-დღიანი ვიზიტით იმყოფებოდა. ვიზიტის ძირითადი მიზეზი, უწმინდესის დაჯილდოება იყო. ილია მეორე "მართლმადიდებელ ხალხთა ერთობის ფონდმა" სპეციალური პრემიით დააჯილდოვა. ჯილდო მართლმადიდებელი ხალხების დამეგობრებაში შეტანილ განსაკუთრებულ წვლილს უკავშირდება.
ვიზიტის ფარგლებში უწმინდესი მოსკოვისა და სრულიად რუსეთის პატრიარქს, მის უწმინდესობა კირილს შეხვდა. გარდა ამისა, პატრიარქებმა წმინდა სინოდის წევრებთან ერთად, კრემლის ყოვლადწმინდა ღვთისმშობლის მიძინების სახელობის ტაძარში წირვა ჩაატარეს.
საქართველოს კათოლიკოს-პატრიარქმა რუსეთში ყოფნის დროს შეხვედრა ფედერაციის პრეზიდენტ ვლადიმერ პუტინთანაც გამართა.

უწმინდესთან ერთად სასულიერო პირების დელეგაციის წევრებს შორის იმყოფებოდნენ საპატრიარქოს საგარეო განყოფილების თავმჯდომარე, ზუგდიდისა და ცაიშის მიტროპოლიტი გერასიმე შარაშენიძე, პატრიარქის ქორეპისკოპოსი, მიტროპოლიტი თეოდორე ჭუაძე, ბათუმისა და ლაზეთის მიტროპოლიტი დიმიტრი შიოლაშვილი, პროტოპრესვიტერი გიორგი ზვიადაძე, არქიმანდრიტი დავით ჭინჭარაული, არქიდიაკონი დემეტრე დავითაშვილი, ისტორიის მეცნიერებათა დოქტორი ზაზა აბაშიძე.

წყარო/Source: http://www.ambebi.ge/sazogadoeba/70240-ilia-meore-moskovshi-viziti-istoriuli-iyo-da-mas-kargi-shedegebi-mohyveba.html#ixzz2JAVCFftk