სასამართლო ცეზარ ჩოჩელის საქმეზე განცხადებას ავრცელებს

აღწერა : თბილისის საქალაქო სასამართლო მცხეთა-მთიანეთის ყოფილი გუბერნატორის, ცეზარ ჩოჩელისთვის აღკვეთის ღონისძიების სახით გირაოს შეფარდებასთან დაკავშირებით განცხადებას ავრცელებს.

როგორც სასამართლოს მიერ გავრცელებულ განცხადებაშია ნათქვამი, 2013 წლის 26 იანვარს თბილისის საქალაქო სასამართლომ არ დააკმაყოფილა პროკურატურის შუამდგომლობა ბრალდებულ ცეზარ ჩოჩელის მიმართ აღკვეთის ღონისძიების სახით პატიმრობის გამოყენების თაობაზე და მას აღკვეთის ღონისძიების სახით 200 000 ლარის ოდენობით გირაო შეეფარდა.

სასამართლომ ბრალდებულ ცეზარ ჩოჩელის მიმართ აღკვეთის ღონისძიების კონკრეტული სახის შერჩევაზე მსჯელობისას, მიიჩნია, რომ ბრალდების მხარემ ვერ წარმოადგინა დასაბუთებულად ყველაზე მკაცრი სახის აღკვეთის ღონისძიების გამოყენების მართებულობა და მიზანშეწონილობა.
ამასთან, ბრალდების მხარის მიერ ვერ იქნა დადასტურებული მოწმეებზე ზემოქმედების საფრთხე. ასევე, ვერ იქნა დასაბუთებული ბრალდებულის მიერ მიმალვის საფრთხე.

სასამართლომ მხედველობაში მიიღო, ბრალდებულის პირადი მახასიათებლები, კერძოდ, ცეზარ ჩოჩელი წარსულში არ არის ნასამართლევი, აქვს მუდმივი საცხოვრებელი ადგილი, ჰყავს ოჯახი.
ასევე, იგი გამოძახებისთანავე გამოცხადდა საგამოძიებო ორგანოებში. ამ გარემოებების გათვალისწინებით, სასამართლომ მიიჩნია, რომ არ არსებობს აღკვეთი ღონისძიების სახით, პატიმრობის აუცილებლობა და შესაბამისად, ცეზარ ჩოჩელს შეეფარდა ნაკლებად მკაცრი აღკვეთის ღონისძიება - გირაო 200 000 ლარის ოდენობით.

აღნიშნულ საქმეზე წინასასამართლო სხდომა თბილისის საქალაქო სასამართლოში 14 მარტს, 15:00 საათზე, გაიმართება.
მცხეთა - მთიანეთის ყოფილ გუბერნატორ ცეზარ ჩოჩელს სამართალდამცავებმა ბრალი 337 - ე და 194 - ე მუხლის მესამე ნაწილით 25 იანვარს წაუყენეს. გამოძიება მას სამეწარმეო საქმიანობაში უკანონო მონაწილეობას და უკანონო შემოსავლების ლეგალიზაციას ედავება.