ბადრი პატარკაციშვილის მემკვიდრეებმა "ბორჯომის" საკონტროლო პაკეტი რუსულ "ალფა-გრუპს" მიჰყიდეს

აღწერა : ბადრი პატარკაციშვილის მემკვიდრეებმა "IDS Borjomi"-ს საკონტროლო პაკეტი რუსულ "ალფა-გრუპს" მიჰყიდეს, - ამის შესახებ რუსული "Прайм"-ი პატარკაციშვილის ქვრივზე, ინა გუდავაძეზე დაყრდნობით წერს.

მასალაში მოყვანილია ინა გუდავაძის წერილობითი კომენტარი, სადაც ის ადასტურებს, რომ გარიგება დასრულებულია. მისივე ინფორმაციით, გარიგების პირობები კონფიდენციალურია. "თუმცა, შეგვიძლია ვთქვათ, რომ აქციების პაკეტის მოცულობა, რომელიც ოჯახს დარჩა, აქტივების მართვაში მონაწილეობას განსაზღვრავს", - წერს პატარკაციშვილის ქვრივი.

"ფორბსის" მონაცემებით, კომპანიის 100%-იანი წილი შეფასებული იყო 500 მილიონ დოლარამდე. ზემოაღნიშნულ გარიგებამდე, საკონტროლო პაკეტის 87%-ის მფლობელი სწორედ პატარკაციშვილის ოჯახი იყო.

"ჩვენ

ახლა ვიმყოფებით რუსი ინვესტორისთვის კომპანიის მართვის კონტროლში გადაცემის პროცესში. ჩვენ ვრჩებით მცირე აქციონერებად და ნებისმიერ დროს, მზად ვიქნებით, თუკი საჭიროება მოითხოვს, გავუწიოთ ნებისმიერი სახის დახმარება და მხარდაჭერა ჩვენს რუს პარტნიორებს კომპანიის მენეჯმენტში", -განაცხადა ინა გუდავაძემ. მისი თქმით, ოჯახი ჯერ არ აპირებს გარიგების შედეგად მიღებული თანხის რაიმე სახის ინვესტიციაში ჩადებას.

როგორც ცნობილია, რუსულ ბაზარაზე ჯერჯერობით "ბორჯომი", ისევე როგორც სხვა ქართული პროდუქცია, აკრძალულია. "ჩვენ მოხარულები ვართ, რომ შეინიშნება ქვეყნებს შორის ურთიერთობების დათბობა. იმედი გაგვიჩნდა, რომ ურთიერთობების დათბობასთან ერთად, ჩვენი სიამაყე-ქართული მინერალური წყალი "ბორჯომი", სავარაუდოდ, მალე დაუბუნდება რუს მომხმარებელს",-აღნიშნა გუდავაძემ.