სოფო ხალვაში მეორე შვილს ელოდება

თითქმის 6 წელია, რაც ბედი მიშა ძოძუაშვილს დაუკავშირა. მათი პირველი შვილი, ქეთო, უკვე 5 წლისაა. ოჯახში ახალი წევრის შემომატებას ყველა მოუთმენლად ელის, განსაკუთრებით კი ქეთო. მშობლებს ასეთი პირობაც წაუყენა – მაიმუნი უყიდონ, დედა ბავშვს გაზრდის, თვითონ კი – მაიმუნს.
სოფო ხალვაში "სარკეს" ამ სასიამოვნო სიახლესა და თავის დღევანდელ ცხოვრებაზე ესაუბრა. ამ წელიწადში ეს მისთვის პირველი ინტერვიუა და ჩვენს მკითხველებს სიხარულით მიულოცა შობა–ახალი წელი.
– სოფო, მოდით, საუბარი თქვენი შემოქმედებით დავიწყოთ. რაზე მუშაობთ ახლა?
– ახალი წელი სიახლეების მოლოდინით დაიწყო. იმედიანად ვარ განწყობილი. შარშან ჩემი ბენდი შევქმენი, რომელსაც ჯერ სახელი ვერ მოვუფიქრე. კონცერტებზე ასე გვაცხადებენ – სოფო ხალვაში და ლაივ ბენდი. სოლო გიტარა, დასარტყამი ინსტრუმენტი, ბასგიტარა, ელექტროკლავიში, კლარნეტი, ფლეიტა – ჩემი ბენდი ასეთი მრავალფეროვნებით გამოირჩევა. გასულ წელს ბევრი დახურული საღამო გავმართეთ.
– მომღერლები ბენდის ყოლაზე ვერც კი ოცნებობენ, თქვენ ვინ შეგიწყოთ ხელი ამაში?
– მომღერლისთვის ლაივ ბენდის ყოლა მართლაც დიდი ფუფუნებაა. როცა ფონოგრამით მღერი, ვეღარ ვითარდები, ჩარჩოებში ექცევი. ბენდთან ერთად მუშაობისას კი ყოველდღე იზრდები, მუსიკასაც სხვანაირად აღიქვამ. ყველა მომღერალს უნდა, რომ საკუთარი ბენდი ჰყავდეს და არც მე ვიყავი გამონაკლისი. ჩემი ინიციატივა და სურვილი იყო, ბენდი ჩამომეყალიბებინა, ამაში მეუღლემ ძალიან დიდი როლი ითამაშა, ასევე მუსიკოსმა ჭაბუკა ამირანაშვილმა, რომელიც ჩემს ხმისჩამწერ სტუდიაში მუშაობს და ამავდროულად ჩემი პედაგოგია – საქსოფონზე დაკვრა მან მასწავლა. ჩვენ ერთად შევკრიბეთ ბენდი.
– თქვენი ქმარი მუსიკაში კარგად ერკვევა?
– დიახ, მიშიკოს ძალიან უყვარს მუსიკა, ის უდაოდ კარგი მსმენელია.
– ბენდთან ერთად თქვენი რეპერტუარი რა ჟანრშია?
– გვაქვს ბლუზი, ფანკი, თანამედროვე მუსიკას ვმღერით. საქსოფონზე მე ვუკრავ და სოლისტიც თავად ვარ. ბენდის ბიჭები ძალიან კარგ მუსიკას წერენ. ერთობლივად ძალიან კარგად ვმუშაობთ. ჩემი მხრიდან ეს ახალი სიტყვა იქნება ესტრადაზე, აბსოლუტურად სხვა კუთხით წარვდგები მსმენელის წინაშე. ჩვენს მუსიკას ყველა თაობის ადამიანი მოუსმენს, კარგი პროგრამა შევადგინეთ.
– შემოთავაზებები გაიზარდა?
– საგრძნობლად, ახალ წელს ბათუმში გავმართეთ კონცერტი და არაერთ პრივატღონისძიებაში მივიღეთ მონაწილეობა. რამდენიმე ხნის წინ გერმანიაში ვიყავი, ოღონდ ბენდის გარეშე. რეჟისორმა ლაშა ონიანმა გამართა ღონისძიება, დიუსელდორფში ქართული ტაძრის მშენებლობას ჩაეყარა საფუძველი და საქველმოქმედო კონცერტი ჩატარდა. ჩემთან ერთად მოცეკვავეთა ანსამბლი იყო აჭარიდან.
– ალბათ უფრო შემოსავლიანიც გახდა თქვენი საქმე.
– ამ საქმეს ბიზნესის კუთხით არ ვუყურებ, ყველანი საკუთარ თავზე ვმუშაობთ, ენთუზიაზმზე ვაკეთებთ ყველაფერს, დღეში 5–6 საათს ვმეცადინეობთ. გვინდა, რომ კარგი შედეგი მივიღოთ. ადრე თუ გვიან შრომა დაგვიფასდება.
– როგორც ვიცი, პირად ცხოვრებაში ძალიან მნიშვნელოვანი სიახლე გაქვთ. თავად უამბეთ ჩვენს მკითხველს ამის შესახებ.
– დიახ, ამ წელს მეორე შვილს ველოდები. ჩვენს ოჯახს კიდევ ერთი ახალი წევრი შეემატება.
– დაგეგმეთ მეორე შვილი თუ ეს მოულოდნელი სიხარული იყო?
– სრულიად დაუგეგმავად გავხდით ამ სიხარულის მომსწრენი. პირველი შვილი საკეისრო კვეთით გავაჩინე და მიყოლებით მშობიარობა არ შეიძლებოდა.
– ბავშვის სქესი უკვე იცით?
– არა, ჯერ მხოლოდ 3 თვის ორსული ვარ.
– ქეთომ უკვე იცის ეს ამბავი? ხომ არ ეჭვიანობს?
– ქეთოს დიდი მოლოდინი აქვს. ამ ამბავს ოჯახის წევრები თანდათან ვაჩვევთ, რომ მერე არ იეჭვიანოს. იმით ვაწყნარებთ, რომ ქეთო უფრო გვეყვარება, ვიდრე ის.ამას საშინლად აპროტესტებს, ბრაზობს, გვეუბნება, მეორე ბავშვი ჩემზე ძალიან უნდა გიყვარდეთო.
– როგორი ფეხმძიმობა გაქვთ?
– ქეთო რომ გავაჩინე, 22 წლის ვიყავი. ისეთი ფეხმძიმობა მქონდა, ვერც ვაცნობიერებდი ჩემს მდგომარეობას. ახლაც ასეა, აქტიურად ვცხოვრობ. ბავშვი რომ დაიბადება, ალბათ მერე უფრო გამიჩნდება სხვა ინსტინქტები. განსაკუთრებული არაფერი მინდება და არაფერი მაღიზიანებს. გურმანი ვარ და თავს არაფერში ვიზღუდავ. შობას ძალიან ბევრი რამ მოვამზადე, ჩემი გაკეთებული კერძები ყველას მოეწონა. ქეთოზე რომ ვიყავი ორსულად, ძალიან მინდებოდა მჟავეს ჭამა, ახლა განსაკუთრებულად ერთი რამ ამოჩემებული არ მაქვს. ორსულობა ძალიან მშვიდად მიდის.
– თითქმის არ გეტყობათ, რომ ორსული ხართ. წონაში საერთოდ არ მოგიმატიათ?
– ჯერჯერობით ზედმეტი კილოგრამები საგრძნობლად არ მემჩნევა. ქეთოზე ორსულობის დროს 16 კილო მოვიმატე, მაგრამ მერე, ნელ–ნელა თავისით ჩავდექი ფორმაში.
– თქვენს ქმარს, მიშას, ბიჭი ალბათ ძალიან უნდა.
– ვერ წარმომიდგენია, რომ შეიძლება ბიჭის დედა გავხდე. სახლში ყველას უნდა, რომ პატარა რეზო ძოძუაშვილი გაჩნდეს. ოჯახში გვარის გამგრძელებელი აუცილებელია. მთავარია, ჯანმრთელი იყოს.
– ქეთო მუსიკალური ბავშვია?
– კარგი სმენა აქვს, "ბასტი ბუბუში" დადის, სიმღერა ძალიან მოსწონს და ამ ყველაფრით ერთობა. სამომავლოდ თვითონ გადაწყვეტს, რა პროფესიას აირჩევს. 16 იანვარს 5 წელი უსრულდება, გაგეცინებათ და, ცოცხალი მაიმუნის ყიდვა მოგვთხოვა. უფრო პატარა რომ იყო, ჩვენი სახლის წინ, მაღაზიაში, ყოველდღე ჩამყავდა და თითო მაიმუნს ყიდულობდა. ბოლოს რომ მივხვდი, ასე აღარ შეიძლებოდა, ეს ნაყიდი მაიმუნები უკან ჩამქონდა, დახლზე ვდებდით და მერე ისევ სახლში ამოგვქონდა... (იცინის). ქეთო ინტერნეტში უყურებს, ოჯახში როგორ უნდა მოვუაროთ მაიმუნს. მეუბნება, შენ რომ ბავშვი გეყოლება, ის შენი შვილი იყოს და ჩემი შვილი მაიმუნი იქნებაო. ქეთოს უნდა, რომ და ჰყავდეს, მას ხან მარიამს არქმევს, ხან – ბარბარეს. ქეთოს ემოციებმა ყოველგვარ ზღვარს გადააჭარბა, ახლაც რომ გამოვიდეს თავისი ოთახიდან, გახარებთ, რომ მუცელში პატარა ბავშვი მყავს. ამ სიახლის შესახებ ყველას უყვება.
– ცოლ–ქმარს ახლა რა ეტაპი გიდგათ, თქვენს ახლანდელ გრძნობას რას დაარქმევდით?
– შვილი რომ იბადება, ოჯახს დიდ სტიმულს მატებს, ამ სიახლეს სხვანაირი ურთიერთობები მოაქვს. ცოლ–ქმარს შორის დამოკიდებულება ტკბება, თბება. რა არის სიყვარული, ასე ვერ აგიხსნით. ღვინოსავითაა, თავიდან მაჭარია და შემდეგ ღვინდება. პატრიარქმა თქვა, სიყვარული არის სიკეთეო. არ ვიცი, მეტი რა გითხრათ. ჩემს ქმარზე ვარ შეყვარებული, ვეპრანჭები და მეორე შვილს ერთად ველოდებით.
2013 წელს ეს ჩემი პირველი ინტერვიუა, ამიტომ მინდა, თქვენი საშუალებით ყველას მივულოცო შობა–ახალი წელი, გისურვებთ სიკეთეს, სიყვარულს, ჯანმრთელობას, ბარაქას და გამრავლებას!
ლანა კიკნაძე