მწეველების კბილები არ იკურნება!

საყოველთაოდ ცნობილია, რომ თამბაქოს მოწევა მიზეზია მრავალი დაავადების: ფილტვის კიბოს, გულის იშემიური დაავადების, ინსულტის, მაგრამ ალბათ ცოტამ იცის კბილებზე მისი მავნე ზეგავლენის შესახებ.
სტატისტიკის მიხედვით, პაროდონტოზის შემთხვევების 50%–ის მიზეზი თამბაქოს მოწევაა. პირის ღრუში თამბაქოს მიერ გამოწვეული ძირითადი პრობლემებია: პირის ღრუს კიბო; გინგივიტი (ღრძილების ანთება) და პაროდონტოზი (კბილის ირგვლივ ქსოვილის გადაგვარებითი ცვლილებები და განლევა); შავი და ხაოიანი ენა; სასის ეროზია; ლეიკოპლაკია (პირის ღრუს ლორწოვანი გარსისა და ტუჩების ქსოვილის გარქოვანება); კბილების გაყვითლება; ლორწოვანი გარსის სოკოვანი დაზიანება; პირიდან სუნი. გარდა ამისა, კბილების იმპლანტაციის წარუმატებლობა მწეველებში რამდენჯერმე მეტია, ვიდრე არამწეველებში. მწვევლებში კბილის ამოღების შემდეგ ხშირად გვხვდება უსიამოვნო გართულება ე.წ. მშრალი ბუდის სინდრომი.
ნიკოტინი იწვევს ცვლილებებს იმუნურ სისტემაში, რაც ხშირად პაროდონტოზის მკურნალობას შეუძლებელს ხდის. მოწევასთან დაკავშირებულია ძვლების დაშლა, მათ შორის კბილებისა და მათ ირგვლივ ქსოვილების. მწეველებში ჩნდება ნადები და ქვები, კბილების ყელი შიშვლდება. რაც მეტია მოწეული სიგარეტის რაოდენობა, მით უფრო მაღალია პაროდონტოზით დაავადების რისკი. მწეველთა 90%–ში მოცემული დაავადების მკურნალობა არაეფექტურია. შედეგი კბილების ნაადრევი დაცვენაა.