საჭიროა თუ არა ზაფხულში სახის კრემის მოხმარება?

არ არის რეკომენდებული ზაფხულში სახის წყლით დაბანა. ამისათვის უმჯობესია, გვირილისა და ცაცხვის ნახარში გამოიყენოთ.

პროცედურის შემდეგ წაისვით დამატენიანებელი კრემი.
არსებობს მოსაზრება, რომ ზაფხულში არ არის საჭირო კრემის მოხმარება, რადგან კანი ისედაც ცხიმიანია.

მაგრამ ეს მოსაზრება მცდარია: კვების გარეშე დარჩენილ კანს წლის ყველა დროს ემუქრება გამოშრობა. თუ ცხიმიანი კანი გაქვთ, გამოიყენეთ ლოსიონები მატონიზირებელი ეფექტით და სპირტის მინიმალური შემცველობით.

სახის ჭარბი ოფლიანობა შეიძლება გამოწვეული იყოს კრემის არასწორად მოხმარების შედეგად. არასოდეს წაისვათ კრემი, თუ არ იცით, დღისაა თუ ღამის. ასევე დაუშვებელია მისი დიდი რაოდენობით წასმა.

ოფლიანობის მიზეზი შეიძლება ასევე გახდეს კრემი, თუ ის თქვენი ასაკობრივი ჯგუფისათვის არ არის განკუთვნილი. იმისათვის, რომ ფორები არ დაიხშოს, ზაფხულში მინიმუმამდე დაიყვანეთ პუდრის მოხმარება. ცხიმიანი კანის მქონე ქალბატონებს კი გირჩევთ, საერთოდ უარი თქვათ მასზე.

ძალიან სასარგებლო და ეფექტურია ხილისა და ბოსტნეულის ნიღბები. მაგრამ თუ კანი გაღიზიანებულია, ნიღბის მოშორების შემდეგ სახეზე მცენარეული ზეთი ან არაჟანი გადაისვით, 10 წუთში ჩამოიბანეთ და ყინულის კუბი გადაიტარეთ.

გახსოვდეთ: გაფართოებული კაპილარებისა და მომატებული მგრძნობელობის დროს არავითარ შემთხვევაში არ გამოიყენოთ ყინული! უკვე გასუფთავებულ კანზე წაისვით კრემი: მშრალი კანისთვის - ცხიმიანი, ხოლო ცხიმიანი კანისათვის - ჯერ ტონიკი და შემდეგ ნაკლებცხიმიანი კრემი.

ზაფხული შესანიშნავი დროა სახის კანის მოვლისათვის. ამ დროს ყოველთვის ხელთ გვაქვს ვიტამინებითა და მინერალებით მდიდარი პროდუქტები და ნებისმიერ დროს შეიძლება მათგან სხვადასხვა სახეობის და დანიშნულების ნიღბის გაკეთება:

• თუ ფორებიანი და ცხიმიანი კანი გაქვთ, დაგეხმარებათ პომიდვრის ნიღაბი. პომიდვრის რბილობი წაისვით სახეზე, გაიჩერეთ 30 წთ და თბილი წყლით ჩამოიბანეთ.

• თუ გაფართოებული ფორები გაქვთ, პერიოდულად გახეხეთ კიტრი და დაიდეთ სახეზე.

• მშრალი კანისათვის მარგებელია წითელი მოცვის, ჟოლოსა და მარწყვის ნიღბები. გააკეთეთ პიურე კენკრისგან და წაისვით სახეზე. 20 წთ-ის შემდეგ ჩამოიბანეთ გრილი წყლით.

• თუ სახის ჭარბი ოფლიანობა გაწუხებთ, სახე მუხის ქერქისა და კრაზანას ნახარშით გაიგრილეთ.

• ოფლიანობასთან ბრძოლაში ასევე ეფექტურია რძის მჟავა. დილაობით წაისვით სახესა და კისერზე რძე. მასში შემავალი მჟავები დააკავებს სითხეს კანში და თან მის დამცავ ფუნქციებს გააძლიერებს.

• თუ მზისგულზე დიდხანს მოგიხდათ გაჩერება ან სიარული, არ არის გამორიცხული, კანის დამწვრობა მიიღოთ. კომბოსტოს ფურცლები ძალიან წვრილად დააქუცმაცეთ, დაუმატეთ 1 კვერცხის გული, აურიეთ, მიღებული მასა სქლად წაისვით სახეზე და 20 წუთის შემდეგ დაიბანეთ თბილი წყლით.

• სალათის ფურცლები წვრილად დაჭერით და აურიეთ მაწონში. წაისვით სქლად და 20 წუთში თბილი წყლით ჩამოიბანეთ.

• რამდენიმე ს/კ პიტნის ფოთოლს დაასხით 1 ჭიქა მდუღარე და გააჩერეთ 30 წთ. გადაწურეთ ნაყენი და დაუმატეთ სახამებელი. ურიეთ მანამ, სანამ სქელ მასას არ მიიღებთ. წაისვით დამწვარ ადგილებზე, გაიჩერეთ 20 წთ და ჩამოიბანეთ თბილი წყლით, ხოლო შემდეგ პიტნის ნაყენით.