იტალიაში ღვინოს ჰიტლერის გამოსახულება ამშვენებს
იტალიაში, ვერონას პროკურატურა ერთ-ერთი ღვინის მწარმოებელი კომპანიის პასუხიმგებლობის საქმეს განიხილავს. კომპანიის წარმოებული ღვინის ეტიკეტს ადოლფ ჰიტლერის პორტრეტი ამშვენებს. პროკურატურამ ეს ფაქტი ფაშიზმის გამართლებად შეაფასა.
პროდუქციამ რამდენიმე ებრაელი ტურისტის აღშფოთება გამოიწვია, მათ თავი შეურაცხყოფილად იგრძნეს.
"ჩემი მეუღლე სასტუმროში იმყოფებოდა, მე კი სასეირნოდ გამოვედი. შევედი მაღაზიაში პროდუქტების შესაძენად და იქ აღმოვაჩინე ღვინო ჰიტლერის გამოსახულებით. ეს შეურაცხყოფას აყენებს არა მხოლოდ ებრაელებს, არამედ მთელს კაცობრიობას", - განაცხადა ებრაელმა ტურისტმა მეთიუ ჰერშმა. 
ამავე სუპერმარკეტში იყიდება ღვინო, რომლის ეტიკეტზე რომის 264-ე პაპი - იოანე პავლე II გამოსახული.
ეს ღვინოები კომპანიის "ისტორიული ხაზის" ნაწილია. მათი ფასი, დაახლოებით 10 ევროა.
ეს პირველი შემთხვევა არ არის, როდესაც იტალიაში მსგავსი სკანდალი ხდება. სამი წლის წინ დახლებზე გამოჩნდა ღვინო, რომლის ეტიკეტზე ჰიტლერს გვერდს ბენიტო მუსოლინი უმშვენებდა.
მომზადებულია L'Espresso-ს მიხედვით.
