კარგი სიახლე?! - ქალები მამაკაცებზე ჭკვიანები აღმოჩნდნენ
პირველად, ბოლო 100 წლის მანძილზე, ქალებმა მამაკაცებს IQ-ტესტებში გადაუსწრეს. ფემინისტები ზეიმობენ, კაცობრიობის ძლიერი სქესი კი, სავარაუდოდ, შედეგებს გააპროტესტებს.
პირველად, ინტელექტის ტესტირების ისტორიის მანძილზე (მას, სხვათა შორის, 100 წელი შეუსრულდა), ფსიქოლოგებმა აღმოაჩინეს, რომ ქალებმა მამაკაცებზე მეტი ქულები დააგროვეს.
სერიოზული მიზეზია გამარჯვების აღსანიშნავად! "როცა IQ-ს ტესტირება დაიწყეს, ქალები სტაბილურად ჩამორჩებოდნენ მამაკაცებს 5 ქულით (ზოგიერთი ფსიქოლოგი მიიჩნევდა, რომ ამის მიზეზი გენეტიკური სხვაობაა)", - აცხადებს ბრიტანული გამოცემა The Daily mail და იმოწმებს IQ-ტესტების ცნობილ პროფს - ჯეიმს ფლინს.
"უკანასკნელი 100 წლის განმავლობაში IQ იზრდებოდა მამაკაცებსა და ქალებში, თუმცა ქალებში ის უფრო სწრაფად ვითარდებოდა, - ამტკიცებს ექსპერტი. - თანამედროვე ცხოვრების რთულ ტემპში ჩვენი ტვინი იძულებულია ადაპტირდეს, ინტელექტი კი - ამაღლდეს".
აღსანიშნავია, რომ IQ-ტესტები აფასებს აზრობრივ შესაძლებლობებს და არა ცოდნის დონეს.
ერთ-ერთი შესაძლო ახსნა იმისა, რომ ქალები მამაკაცებს დაეწივნენ და გაუსწრეს ინტელექტუალურ ტესტებში, ის არის, რომ ქალს შეუძლია ერთდროულად იმუშავოს და მიხედოს ოჯახს.
მეორე - ქალებს ყოველთვის მეტი პოტენციალი ჰქონდათ, ვიდრე მამაკაცებს, მაგრამ მხოლოდ ახლა გამოამჟღავნეს ეს. ბატონ ფლინს არ აღმოაჩნდა საკმარისი მასალა იმისათვის, რომ ზუსტი ახსნა მოეძებნა ახალი ტენდენციისთვის, თუმცა მან შეძლო გაეერთიანებინა IQ-ს შედეგები, რომლებიც მიიღო დასავლეთ ევროპის ქვეყნებში, აშშ-ში, კანადაში, ახალ ზელანდიაში, არგენტინასა და ესტონეთში.
ევროპულ ქვეყნებში მამაკაცებსა და ქალებს შორის განსხვავება ქულებში მინიმალური იყო. ავსტრალიის ძლიერმა და სუსტმა სქესმა, პრაქტიკულად, ერთნაირი ქულების რაოდენობა მიიღეს. ახალ ზელანდიაში, არგენტინასა და ესტონეთში ქალებმა მამაკაცებს გადაუსწრეს!
ერთი მხრივ, ეს სიახლე სასიხარულოა - განსაკუთრებით მაშინ, როცა გაცხარებული კამათისას მამაკაცი მოგაძახებს: "შტერო!" - ასეთივე "ალერსით" თამამად შეგვიძლია ვუპასუხოთ: "შენ ჩემზე შტერო!" და თან ექსპერტის შედეგები მოვუყვანოთ მაგალითად. მეორე მხრივ - მაღალი IQ სულაც არ არის ბედნიერი ცხოვრების გარანტი.
მაგალითად, მომხიბვლელი ქერა ქალბატონი, შერონ სტოუნი, რომლის IQ 154-ია, ამჟამად 27 წლის "თოიბოის" ხვდება, მაგრამ, საეჭვოა, 54 წლის მსახიობის მახვილგონიერებით იყოს ჭაბუკი დატყვევებული...
