გიორგი ნაზღაიძე საცოლესთან ერთად ამერიკაში საცხოვრებლად მიდის

მოდელ გიორგი ნაზღაიძის ცხოვრებაში ბევრი სიახლეა. ტელევიზიას და რადიოს დაემშვიდობა, სამსახურის გარეშე დარჩა, სამაგიეროდ დიზაინერობა დაიწყო. მოკლე დროში კოლექციის შექმნაც მოასწრო და ნიუ იორკში ჩვენებაც მოაწყო. ყველაზე მთავარი სიახლე კი ის არის, რომ ცოლს ირთავს, საყვარელი ქალი უკვე დანიშნა. რჩეულის ვინაობას არ ამხელს, მხოლოდ იმას ამბობს, რომ ის ძლიერი და ლამაზია, ამერიკაში ცხოვრობს და ბიზნესითაა დაკავებული. მის ცხოვრებაში სხვა სიახლეებიცაა, მაგრამ არ ლაპარაკობს, ეშინია, ქართული შოუბიზნესის "შურიანი თვალი არ ეცეს".
გიორგი ნაზღაიძე:
– საერთოდ არ მიყვარს სიახლეებზე ლაპარაკი, რადგან რასაც ვიტყვი, ბოლო მომენტში აღარ სრულდება ხოლმე, შურიანი ქართული შოუბიზნესის თვალი მოქმედებს. ვიტყვი იმას, რომ დანიშნული ვარ. ჩემი საცოლე თბილისში იყო, ახლა ისევ წავიდა. ბეჭდით დავდივარ, ასე რომ, უკვე დაკავებული მამაკაცი ვარ. რაც შეეხება ჩემს ახალ პროფესიას – დიზაინერობას, ჩვენება ჩატარდა ნიუ იორკში და კარგი შეფასებაც მივიღე. ახლა ქალის სამოსზე ვმუშაობ, ესკიზებს ვქმნი. თებერვლის ბოლოს კი ამ ქვეყნიდან (გულისხმობს საქართველოს. ავტ.) მივდივარ, რადგან ვთვლი, რომ აქ ბევრი რამ გავაკეთე, უკვე რეგალიებიც მაქვს და, მგონი, დამსახურებულადაც. ვფიქრობ, რომ აქ ჩემი თავი ამოვწურე. რაღა უნდა გავაკეთო? რაც უნდა მოინდომო, აქ მაინც ვერ მიხვალ იმ დონეზე, რომ ვიღაცამ დაგიფასოს. ჯობია, იქ წავიდე, სადაც დამაფასებენ.

– ამერიკაში რა უნდა აკეთოთ?
– ამერიკაში გავაგრძელებ ამ საქმიანობას და ალბათ მსახიობობასაც ვცდი, რომელიც ბავშვობიდანვე მინდოდა. არ ვიცი, იქიდან დავბრუნდები თუ არა.
– ვინ არის თქვენი საცოლე?
– არ მინდა მასზე დეტალურად საუბარი, სახელს და გვარს არ გეტყვით. ქართველი გოგოა, ოღონდ აქ არ ცხოვრობს, ნიუ იორკშია. ჩემი ასაკისაა, 27 წლის.
– როგორ გაიცანით?
– მე ბიზნესშემოთავაზება მქონდა მისგან, თანამშრომლობა კი ფლირტში გადაიზარდა, ბოლოს – დანიშვნაში. ალბათ მის გამოც ვტოვებ ამ ქვეყანას. საქართველოში ვინც უნდა მოვიდეს მთავრობაში, არც ქვეყანა შეიცვლება და არც ხალხის დამოკიდებულება ერთმანეთის მიმართ. აქ ყოველთვის იარსებებს ნაცნობობა და ა.შ.
– თქვენი რჩეული ბიზნესლედია?
– შეიძლება ასეც ეწოდოს.

– საკმაოდ პრეტენზიული სასიძო იყავით ყოველთვის. რითი მოგხიბლათ?
– ყოველთვის ვამბობდი, რომ ჩემ გვერდით მდგომი ქალი უნდა ყოფილიყო ჭკვიანი, ლამაზი, მაღალი, გამხდარი, გრძელთმიანი და აუცილებლად – ძლიერი ხასიათით. ასეთი გოგო ვიპოვე.

– ზუსტად ასეთია, როგორიც აღწერეთ?
– კი, ძალიან ძლიერია და ეს მომწონს. ყველაფერმა ერთად მომხიბლა. ვისაც ვეძებდი, ის ვიპოვე, ოღონდ საქართველოს საზღვრებგარეთ, მაგრამ ქართველია.
– მარტივად და სწრაფად განვითარდა ეს ურთიერთობა?
– იყო დაშორებებიც, შერიგებებიც და ა.შ. ჩემთან ურთერთობა მარტივი არ არის. გარშემომყოფები ჩემგან სულ სიახლეებს ელიან და ეს ურთიერთობებშიც მახასიათებს. ამასაც თავისი ხიბლი აქვს.
– თქვენი დანიშვნა რომანტიკულ გარემოში მოხდა?
– კი, რომანტიკულ გარემოში, ფრანგულ რესტორანში, საკმაოდ განსხვავებულად მოხდა ეს ყველაფერი, მაგრამ დეტალებზე არ მსურს საუბარი.
– მისთვის მოულოდნელი იყო თქვენი ეს ნაბიჯი?
– არ ეგონა, ასეთი რომანტიკული თუ ვიქნებოდი.
– ქორწილს როდის გეგმავთ?
– ჯერ თარიღი არ დაგვითქვამს. ორივე ვფიქრობთ, რომ აქაც ვიცხოვრებთ.
– თქვენთვის ეს პირველი ქორწინება არ იქნება. წინა სამწუხარო გამოცდილებას ახალ ოჯახში ალბათ გაითვალისწინებთ.
– როგორც ჩემი მეგობრები ამბობენ, კარგი მეოჯახე და ერთგული ქმარი ვიქნები. მეც ვიცი, რომ ასე იქნება. დარწმუნებული ვარ, კარგი მამა ვიქნები. მინდა, სამი შვილი მყავდეს – ერთი ცოდოა, ორი შეიძლება ერთმანეთს გადაეკიდოს და სამი მშვენიერი ვარიანტია.
– ოჯახის წევრებმა როგორ მიიღეს ეს ამბავი?
– ძალიან კარგად. ჩემთვის მთავარია, ორ ადამიანს უნდოდეს ერთად ცხოვრება. მე არ ვარ ისეთი ტიპაჟი, ცოლი დედას მივუყვანო და სახლში დავუსვა. მაქვს ჩემი შემოსავალი და შემიძლია საკუთარი ოჯახი შევინახო. ორივე ვიმუშავებთ და ერთმანეთს ხელებში არ შევხედავთ, რაც ზოგადად მომწონს წყვილებში.
– დიზაინერობა რატომ გადაწყვიტეთ, ეს საქმე შემოსავლიანია?
– დიზაინერობა მარკეტინგული გათვლით არ დამიწყია. ეს ქველმოქმედების გამო გავაკეთე. საქველმოქმედო ორგანიზაციამ, რომელიც ამერიკაშია დაფუძნებული, შემოგვთავაზა, ბავშვებს დავხმარებოდით. გამიჩნდა იდეა, რომ მოდა და ქველმოქმედება გაგვეერთიანებინა და პატარებს ასე დავხმარებოდით. თანხა მთლიანად ნაძალადევის ბავშვთა სახლს გადაეცა. ამ საქმეს გავაგრძელებ და როცა ჩემს სამოსს შეიძენენ, ფულს საქველმოქმედო მიზნებისთვის დავხარჯავ. სხვათა შორის, ჩემი კოლექციის დიდი ნაწილი ძალიან კარგად გაიყიდა.
– მაქსიმალური ფასი რა იყო?
– 250 ლარი. მამაკაცებისთვის გავაკეთე პიჯაკები, შარვლები, ჟილეტები და მაისურები. ფეხსაცმელი ოთხ ფერში გამოვიტანე. ჩემი მეგობარი ქეთი ყიფშიძე დამეხმარა, რომლის სამკერვალოშიც ეს ყველაფერი შევკერე.

– როცა დიზაინერობას იწყებ, ავტომატურად აცხადებ პრეტენზიას, რომ გერქვას გემოვნებიანი. როგორ ფიქრობთ, გემოვნებიანი ჩამცმელი ხართ?
– გარშემომყოფებისგან ყოველთვის ვიღებ კომპლიმენტებს, რომ გემოვნებით ვიცვამ. ყოველთვის კარგად გამოვიყურები და ვიცი, სად რა უნდა ჩავიცვა. წლების განმავლობაში მოდელი ვიყავი, თვალს ვადევნებდი მოდის ტენდენციებს, მაგრამ გემოვნება მაინც შინაგანია. ჩემს კოლექციაში იყო ის, რაც საქართველოს აკლია – ფერები.
– გასული წელი როგორი იყო თქვენთვის?
– ვერ ვიტყვი, რომ ცუდი წელი იყო, ვერ დავიწუწუნებ, მაგრამ მთავრობის შეცვლის შემდეგ ცნობადი სახეები ჩარჩოებში მოვექეცით. დავკარგე ორი სამსახური – ტელევიზიაში და რადიოში. ვინც უნდა მოდიოდეს მთავრობაში, ამას მნიშვნელობა არ უნდა ჰქონდეს – ნიჭიერი უნდა დაფასდეს. ბევრი ნიჭიერი ადამიანი დარჩა უსამსახუროდ. საერთოდ იმაზე მწყდება გული, რომ ამ ქვეყანაში ნიჭის ნაცვლად სხვა რაღაცები ფასდება – ლოგინი, ნაცნობობა და ა.შ. აქ ურჩევნიათ, სამსახურში უნიჭო დაიტოვონ, ვიდრე ქუჩიდან აყვანილი ნიჭიერი.

– რომელიმე პოლიტიკური ძალის მხარდამჭერი იყავით?
– საერთოდ აპოლიტიკური ადამიანი ვარ, მაგრამ არჩევნებზე ვიყავი. მნიშვნელობა არ აქვს, ვინ არის მთავრობაში, სხვებს, ვინც პოლიტიკაში არ ერევა, შეზღუდვები არ უნდა ჰქონდეთ. ჯერ საერთოდ რა შოუბიზნესი გვქონდა და დღეს ისიც მკვდარია. ერთი მხრივ, მიხარია ეს ამბავი. ისინი, ვისაც ამბიცია ჰქონდათ, ძლივს დაეშვნენ მიწაზე. მომწონს, რომ მათ ეს ამბიციები გაუქრათ.
– თქვენს ცხოვრებაში არაერთხელ იყო ცნობად სახეებთან სკანდალური "შეჯახებები". ამას თქვენი ხასიათი განაპირობებს თუ უმეტესწილად სხვებისგან მოდის უარყოფითი იმპულსები?
– ერთი, რაც ძალიან კარგი თვისება მაქვს, არის ის, რომ ყურადღებას არავის ვაქცევ. შოუბიზნესში ბევრი შური, ბოროტება და ნაგავია. ჩემი აზრით, ძალიან დიდი ტყუილია, როცა ამბობენ, რომ მეგობრობენ და ერთმანეთი უყვართ. დროთა განმავლობაში მჟღავნდება ხოლმე, რომ ასე არ არის. ბევრი ჭორი გამიგია ჩემზე. ჩემმა ჩვენებამ რომ წარმატებით ჩაიარა, ათასნაირი რაღაც გავიგე, რომ ვიღაცის საყვარლობით მივაღწიე ამას, რომ მე თურმე ძალიან მახინჯი ვარ რეალურად და უამრავი ოპერაცია მაქვს გაკეთებული... ამაზე ყოველთვის მეცინება.
– თქვენი და ია ფარულავას დაპირისპირება რითი დასრულდა? ეს საქმე სასამართლომდეც მივიდა.
– ვინ არის ეგ ქალი?! ასეთს არ ვიცნობ!
მანანა ნოდია