ქეთა თოფურია: ”მოკლე კაბებს ადრე ვერიდებოდი, ახლა ნებისმიერ ექსპერიმენტზე თანახმა ვარ”

რუსული შოუბიზნესის ქართველი ვარსკვლავი, ქეთა თოფურია თავისი სასცენო და ყოველდღიური ჩაცმულობის შესახებ რუსულ გამოცემას ესაუბრა. მისი თქმით, ადრე მეტად აკონტროლებდა, რამდენად თამამი ან მოკრძალებული იყო სამოსი, წლების მატებასთან ერთად კი საკუთარ გარეგნობას უფრო მარტივად უყურებს და ნებისმიერ თამამ ექსპერიმენტზეც თანახმაა.

"ადრე სულ მეჩვენებოდა, რომ სამოსი ან ძალიან თამამი იყო, ან პირიქით, ზედმეტად მოკრძალებული. განსაკუთრებით ვერიდებოდი მოკლე კაბებს. "ამოჩემებული" იმიჯი მქონდა და მისი ჩარჩოების დარღვევა არ მსურდა. დღეს ყოველგვარ ექსპერიმენტზე თანახმა ვარ", - აცხადებს მომღერალი.

უნივერსალური სამოსი

ერთადერთი უნივერსალური სამოსი, რომელიც ჩემს გარდერობში ყოველთვის დევს, ჯინსებია. ყველგან მოხერხებულად ვატარებ - ჯინსზე გადაცმული მაისურით ყოველდღიურ შეხვედრებზე დავდივარ, თუ აბრეშუმის ზედატანსა და მაღალქუსლიან ფეხსაცმელს შევუხამებ, კონცერტზე წასასვლელადაც გამოდგება. ხშირად ვატარებ ჯინსის შორტებსაც.
ყოველდღიურ ჩაცმულობაში უფრო კომფორტულად ვგრძნობ თავს, ვიდრე გამოსასვლელ ან სასცენო კოსტიუმებში. სცენისთვის ეფექტურ და თამამ სტილს ვირჩევთ, რაც ხშირად სულაც არ შეეფერება ჩვენს შინაგან სამყაროს.

ძვირფასი მარკა

იმ კატეგორიის გოგონებს არ მივეკუთვნები, ვის გარდერობშიც მხოლოდ ძვირფასი ბრენდის ტანსაცმელია. ეს უგემოვნობის ნიშანია. მოხდენილი ქალი ყოველთვის კარგად უხამებს ერთმანეთს უბრალო და ბრენდულ სამოსს. ერთადერთი, რისთვისაც მართლაც ბევრ ფულს ვხარჯავ, ჩანთები და საათებია. მიმაჩნია, რომ ეს აქსესუარები ძვირფასი უნდა იყოს.


ქერა ქეთა თოფურია - "რა საშინელებაა"

ახალგაზრდობის წლებში გარეგნობის შეცვლასთან დაკავშირებით რამდენიმე წარუმატებელი მცდელობა მქონდა, მაგალითად თმა ყვითლად შევიღებე, თანაც, არაერთხელ. ახლა იმდროინდელ ფოტოებს რომ ვხედავ, ვხვდები რა საშინელებაც ჩამიდენია, თუმცა საკუთარი სტილი რომ იპოვო, წარუმატებელი ექსპერიმენტებიც საჭიროა. სხვათა შორის, ამ ვაი-ექსპერიმენტის წყალობით არა მარტო გარეგნობა შევიცვალე, თმაც სერიოზულად დავიზიანე.

შოპინგი - ჯერ ნერვების "წყვეტა", შემდეგ სიამოვნება

საყიდლებისთვის იტალიასა და საფრანგეთში ჩასვლას ვამჯობინებ. გაცილებით იაფიაც არის და მაღაზიებში შესვლაც სასიამოვნოა. "შოპინგისთვის" ხშირად მოსკოვის მაღაზიებსაც ვირჩევ.
ახლახან დავბრუნდი პარიზიდან, სადაც Stella McCartney-ის პალტო, Chanel-ის ჩანთა და Balenciaga-ს ფეხსაცმელი შევიძინე. შოპინგი ჩემთვის ჯერ ნერვების "წყვეტაა" და შემდეგ სიამოვნება.

ხშირად ვსარგებლობ სტილისტების მომსახურებით. ამაში ჩემი მეგობარი დიზაინერები, ბესარიონი და საშა არუთინოვი მეხმარებიან. ისინი ყოველთვის იმ სტილს მირჩევენ, რაც 100%-ით მიხდება.

მომზადებულია fashiontime.ru-ს მიხედვით.