ინდოეთში გაუპატიურებისთვის სიკვდილით დასჯიან

ინდოეთის პრეზიდენტმა მხარი დაუჭირა კანონპროექტს, რომლის მიხედვითაც გაუპატიურებაში მხილებულებს სიკვდილით დასჯიან. ამის შესახებ "ბიბისი" იუწყება.

სახელმწიფოს მიერ დამტკიცებულმა სპეციალურმა კომისიამ შეიმუშავა კანონპროექტი "გაუპატიურების შესახებ", რომელიც ითვალისწინებს 10-დან 20 წლამდე სასჯელს ან სასჯელის უმაღლეს ზომას – სიკვდილით დასჯას. სიკვდილმისჯილებს არც ამნისტია შეეხებათ.

ახალი კანონმდებლობით გათვალისწინებულია კანონის გამკაცრება ვუაერისტების, სექსუალური მოძალადეებისა და მათ წინააღმდეგ, ვინც თავდასხმისას მჟავას გამოიყენებს.
"ბიბისი"-ს ინფორმაციით, პრეზიდენტის მიერ მხარდაჭერილი კანონპროექტი ახლა პარლამენტმა უნდა დაამტკიცოს.

კანონმდებლობაში ცვლილების შეტანა და "გაუპატიურების შესახებ" კანონპროექტის გამკაცრება ინდოეთში მას შემდეგ
გადაწყდა, რაც ექვსმა თავდამსხმელმა ავტობუსში გოგონა გააუპატიურა, შემდეგ კი ავტობუსიდან გადმოაგდეს. მოგვიანებით, გოგონა გარდაიცვალა, რასაც ინდოეთში მასობრივი აქციები მოჰყვა.

თუ პარლამენტი ახალ კანონპროექტს დაამტკიცებს და 23 წლის სტუდენტი გოგონას გაუპატიურებაში ბრალდებულებს დანაშაული დაუმტკიცდათ, მაშინ მათ სიკვდილით დასჯა ელით.

ინდოეთში სიკვდილით დასჯას იაშვიათად მიმართავენ. ბოლოს სასჯელის უმაღლესი ზომა გასული წლის ნოემბერში, 2008 წლის მუმბაის ტერორისტული აქტის ერთადერთ ცოცხალ მონაწილეს მიუსაჯეს.

მომზადებულია bbc.co.uk-ის მიხედვით.