არჩევანი ქმარსა და ძმის სიდედრს შორის გავაკეთე

მშობლები ადრე გარდამეცვალნენ და მე და ჩემი ძმა ბებიამ გაგვზარდა. დიდი სახლი გვაქვს და ძმა რომ დაოჯახდა, მთხოვა, ჩემს ცოლს ბინის პრობლემა აქვს და ცოტა ხანს დედამისიც ჩვენთან იცხოვრებსო.
არანაირი პრობლემა არ მქონია, თან ძმას წინააღმდეგობას ხომ არ გავუწევდი. თავიდან ქალბატონი დოდო ძალიან სათნო ქალი აღმოჩნდა. ყოველდღე სადილს ამზადებდა და ხანდახან ჩემს ტანსაცმელსაც რეცხავდა.

ყველაფერი რამდენიმე თვეში შეიცვალა. სათნო ქალბატონი ნამდვილ მონსტრად გადაიქცა. ყველას სათითაოდ გვაძლევდა ბრძანებებს. ყოველ დილას ამოწმებდა ჩემს საძინებელს, რომ ოთახი არეული არ დამეტოვებინა.

თავიდან ჩემი ძმა მის უეცარ ცვლილებას აპროტესტებდა. შემდეგ კი არ ვიცი, ჯადო გაუკეთეს თუ რა მოხდა, ერთხელ დოდოს გამო სახეშიც გამარტყა. რამდენჯერ მინდოდა სახლიდან გაქცევა, მაგრამ თან ნერვები მეშლებოდა, როგორ დამეტოვებინა ჩემი ძმა ამ გიჟი დედა-შვილის ხელში.

სწორედ ამ პერიოდში გამოჩნდა ჩემს ცხოვრებაში თამაზი. გარეგნულად დიდი არაფერი იყო, სიმართლე გითხრათ, საკმაოდ სუსტი ადამიანის შთაბეჭდილებას ტოვებდა, მაგრამ ცოლად მაინც გავყევი.

არჩევანი ძმის სიდედრსა და ქმარს შორის გავაკეთე. უკვე სამი თვეა, გათხოვილი ვარ. ვერ ვიტყვი, რომ ბედნიერი ვარ. ხანდახან თავისუფლება მენატრება, მაგრამ ჩემს სახლში გაბატონებული მონსტრი რომ მახსენდება, ვხვდები, რომ სწორი გადაწყვეტილება მივიღე.