რის გამო დაუპირისპირდნენ ერთმანეთს "მყუდრო" გია ცინაძე და "ფრანის" გაგა ჩიხლაძე

გია ცინაძე, ანუ მყუდრო, რომელსაც ეს სახელი სერიალიდან შეერქვა, როგორც აღმოჩნდა, პოლიტიკურად ძალიან აქტიური ადამიანია. მას შემდეგ, რაც "ქართულმა ოცნებამ" გაიმარჯვა, მისი "ფეისბუქის" გვერდზე ამ პოლიტიკური ძალის გამაკრიტიკებელი სტატუსების ნამდვილი ბუმია. გია არც მალავს, რომ "ნაციონალური მოძრაობის" აქტიური მხარდამჭერია და ხელისუფლებაში ახალმოსულთა მოტრფიალე არ გახლავთ.

ყოველდღიურ სტატუსებში მის პოზიციას მშვენივრად ამოიკითხავთ, მისმა ამ აქტიურობამ კი, როგორც ჩანს, ძალიან გააკვირვა შოუბიზნესის კიდევ ერთი სახე, ჯგუფ "ფრანის" წევრი გაგა ჩიხლაძე, რომელმაც გადაწყვიტა, მყუდროსთვის ეკითხა, რა სჭირდა და რატომ გახდა ასეთი პოლიტიზებული.

"სიბინძურეს ყველგან ნახავ და რაღა ახლა გაგახსენდა ეს პოლიტიკურ-რელიგიური წერილები?!. რაც ახლა ჩანს, ადრეც იყო და სულ იყო..." გიამ პასუხად მისწერა, რომ მის მოსაზრებებს არ ეთანხმებოდა. "მეც რომ არ გეთანხმები, მაგიტომ მოგწერე, მაგრად მიყვარხარ და რომ არ მომეწერა, არ შემეძლო, გავედი", - პასუხობს გაგა. "მერე უნდა მითხრა, გია, არ გეთანხმები", - ამბობს გია ცინაძე.

"უცებ გულმა რაც მიკარნახა, ის დავწერე, გია, და ტექსტზე აღარ დავფიქრებულვარ..." - ეს გაგას სიტყვებია. გია ცინაძე კი პასუხობს, რომ თუკი რაიმეში არ ეთანხმება, ეს იმას არ ნიშნავს, რომ "ფეისბუქზე" უნდა დაუწეროს, ბიჭო, რა გჭირსო. ყველას შეიძლება თავისი მოსაზრება ჰქონდეს, მაგრამ მსახიობის თქმით, ქურდების დრო დადგა და ამას "ფრანის" სოლისტსაც ახსენებს, შემდეგ კი ეკითხება, რა ხდება იმერეთის "სტალიცაში". გაგა, მოგეხსენებათ, ქუთაისელი გახლავთ. გია "ფრანის" წევრს ურჩევს, არ ინერვი­ულოს იმაზე, ვინ იქ­ნება მთავრობაში, თავად კი ამ თემაზე ნერვიულობის გაგრძელებას აპირებს. ამის შემდეგ სიტყვა-პასუხში ცოტა სიტუაცია აირია, რადგან გაგა ჩიხლაძემ შემდეგი პასუხი გასცა: "ჩემთვის არც არავინ მოსულა და არც წასულა, "ბრატ", არც ეგ სარკაზმი მეკუთვნის შენგან, და სწორად მიკითხავს თავიდანვე, რა გჭირს-მეთქი, ახლა დავრწმუნდი!.. სხვა დროსაც გენერვიულა".

გია ცინაძე: "ბიჭო, რას მეძაბები. ან რომც იყოს, რატომ უნდა გეწყინოს... ჩემი აზრი დამიტოვე-მეთქი, გითხარი, გაგა, "უგამანის" რა, თორემ გამაკვირვებ. "ბიჭო, ოე"-ზე გამიტრაკე კიდევ ახლა და სულ მოვკვდები სიცილით. სხვა დროს არ ვნერვიულობდი, ესეთები არ ხდებოდა და რატო მენერვიულა და ლოგიკას ვერ ვხედავ კითხვაში, რატომ არ განიცდიდიო..." მყუდროს ამ ნათქვამს გაგას მხრიდან არანაირი გამოხმაურება არ მოჰყოლია.

მყუდროს პოლიტიზებული "ფეისბუქის" გვერდი, როგორც აღვნიშნეთ, მრავალი ანტიქართულოცნებისეული სტატუსითა და ფოტოთია მდიდარი. მათ შორის ერთ-ერთია იატაკის ტილოზე წამოცმული "ქართული ოცნების" მაისურის ფოტო, რომელზეც მყუდროს ასეთი მინაწერი აქვს გაკეთებული - "ამ საქმეშიც არ ივარგებს..." ერთ-ერთ ნიუსს, სადაც მორიგი დაყაჩაღების შესახებ ინფორმაციის ამოკითხვა შეიძლებოდა, მყუდროს ვრცელი პასკვილი მოჰყვა "აღიარებითი ჩვენებით" იმის შესახებ, თუ როგორ შეხვდა კონსპირაციულ ბინაში ინკოგნიტო შემკვეთს, რომელმაც კრიმინოგენური სიტუაციის დამძიმება დაავალა - "ვსიო, უნდა ავხადო ფარდა ყველაფერს!.. რაც ამ ბოლო დროს ჩემი პროფესიით არ ვარ დაკავებული და მომენატრა, გადავწყვიტე, ხელი მომეწერა ამ საქმეზე, კონსპირაციულ ბინაში შევხვდი ვინმე ნ.მ.-ს და მან დამავალა მეთამაშა ეს ყველაფერი ისე, ხალხს ჰგონებოდა, რომ კრიმინოგენური სიტუაცია აირია. შენც შენსას გაისწორებო, მითხრა, როლში იქნებიო. მაინც თავი დაიზღვიეს, უარი რომ არ მეთქვა და მანახვეს ვიდეო, სადაც ჩემს მეგობარს ნიანგები აუპატიურებდნენ, შემდეგ ერთმა ადამიანმა, რომელსაც 5-ნომრიანი მაისური ეცვა, თვალი ამოსთხარა და ჭამდა. მეც გადავწყვიტე, გამეხსენებინა კამერების წინ მუშაობა და ეს ყველაფერი მათი ბინძური თეატრია. მართალია, ნიღაბში ვარ, მაგრამ მგონი, კარგად ვდგავარ "სტვოლით", დამაჯერებლად ვუმიზნებ. ახლა გავრბივარ ბელგიაში და იქიდან ვიბლატავებ!.. გაუძელით, თანამემამულენო, გაგებით მოეკიდეთ ამ ყველაფერს..."

"დღეს აკვანში უნდა დავიძინო, თავი უნდა დავიბრტყელო... დილიდან ისევ ბლატაობას დავიწყებ, თბილისის უბნებში ფურთხებას, ნაგვის დაყრას, წითლებზე გადასვლას ფეხით მოსიარულის რანგში, ნასტირნად თვალს გავაყოლებ ხალხს, ჯინსებს ჩავიცვამ შავ კურტკაზე, კისერს გავიკეთებ საპარსით, წვერს პროტივზე გავიპარსავ, დილით პირის დაბანის დროს ხელებში ჩავიგუბებ წყალს და ფრუუუ, ასე დავიბან, ვინმეს მერე, არაქართულად ჩაცმულს დედას შევაგინებ, მერე მალევე პატრიარქის სადღეგრძელოს დავლევ, მოკლედ, ჯიგარი ვიქნები რა ხვალიდან, ნამდვილი კაი კაცი, ჩვენს ქვეყანას რომ ეკადრება!.."

მყუდრო, როგორც ჩანს, არა მხოლოდ ბიძინა ივანიშვილსა და "ოცნებისტებზე", არამედ მთელ ქართულ საზოგადოებაზეა გაბრაზებული. პოლიტიკამ ადამიანების მოსაზრებები რომ გაყო, ეს ფაქტია და შოუბიზნესურ წრეებში რადიკალური განსხვავებები ამ კუთხით აშკარად თვალში საცემია.

ჟურნალი "რეიტინგი"