"ევროვიზიის" გამარჯვებულმა აღიარა, რომ ბისექსუალია "ევროვიზიის" გამარჯვებულმა აღიარა, რომ ბისექსუალია

რვა წლის წინ ლორენი "ვარსკვლავების აკადემიის" შვედურ ანალოგში მონაწილეობდა, მაგრამ მერე სადღაც გაქრა, საერთოდ მიატოვა შოუბიზნესი. ექვსი წლის შემდეგ კი დაბრუნდა, მაგრამ ვეღარავინ იცნო.

პუტკუნა სახისგან მკაფიოდ გამოკვეთილი ყვრიმალებიღა დარჩა, აფრიკული კულულები სწორმა თმამ შეცვალა. შვედეთში ბევრს ისიც კი სჯერა, რომ ლორენი ტრანსსექსუალია. მომღერალმა გადაწყვიტა, გავრცელებულ ხმებს ბოლო მოუღოს და თვითონვე ისაუბროს საკუთარ თავზე.

- ლორენ, როგორი იყავით ბავშვობაში?

- ჩემი მშობლები ჩრდილოეთ მაროკოში მცხოვრები ბერბერული ტომიდან არიან წარმოშობით. ბავშვობაში ხშირად ჩავდიოდი იქ ბებიასთან. ბავშვები ვიკრიბებოდით, დოლზე ვუკრავდით, ვმღეროდით. მუსიკა თითოეული ჩვენგანისთვის ცხოვრების წესი იყო. თითქმის ყველა მღეროდა და სიმღერებს წერდა.

- რა მოგწონთ მუსიკის გარდა?

- იოგით ვარ დაკავებული. ძალიან მიყვარს მარტოობა, საკუთარ თავთან მარტო დარჩენა, ფიქრი. ეს ბავშვობიდან მჭირს. შემეძლო შინ შემერბინა, სააბაზანოში ჩავკეტილიყავი სიბნელეში, ვმჯდარიყავი იქ, სრულ სიჩუმეში.

ახლა ძალიან განვიცდი, რომ "ევროვიზიის" მერე აღარ მრჩება დრო სიმარტოვისთვის. სულ გადაფრენები, ინტერვიუები, ხალხი გარშემო... ცუდია, რომ ეს გარემო ახლა დიდი ხნით იქნება ჩემი თანამდევი.

- რა ცეკვას ასრულებდით "ევროვიზიის" სცენაზე? კუნგ-ფუს ჰგავდა...

- მე ასე ვმოძრაობ, ეს ჩემი მოძრაობებია. თუ კლუბში გამომყვებით, დარწმუნდებით ამაში (იცინის).

- თქვენს სამშობლოში, მაროკოში, ისლამს მისდევენ. თქვენ მუსულმანი ხართ?

- ახლა არა. როცა წამოვიზარდე, უარი ვთქვი რაიმე სარწმუნოებაზე. შეიძლება ითქვას, რომ ახლა არავითარი რელიგიური მიდრეკილება არ მაქვს.

როცა ბოლოს ვიყავი სამშობლოში, გავიგე, რომ ჩემი 13 წლის ბიძაშვილი 40 წლის კაცზე გაათხოვეს! ალბათ, მეც ეს მელოდა, ჩემი მშობლები რომ შვედეთში არ გადასულიყვნენ საცხოვრებლად.

- ბევრი აყენებს ეჭვქვეშ თქვენს სექსუალურ ორიენტაციას...

- ასე გეტყვით: სრულიად უმნიშვნელოა, როგორ სიყვარულს განიცდით. თქვენ ხომ სხეული ან სექსი არ გიყვარდებათ! თქვენ გიყვარდებათ ადამიანის სული. თუ ეს ქალია, ჩემთვის არც ამას აქვს დიდი მნიშვნელობა. თქვენ ჩემს სექსუალურ ორიენტაციაზე მეკითხებით.

მართალი არ ვიქნებოდი, მეთქვა, თითქოს მხოლოდ ბიჭები მომწონს. უბრალოდ, მინდა ჩემი სიყვარული ვიპოვო. და თუ ეს ქალი იქნება და მე ვიგრძნობ, რომ ეს სწორია, დაე, იყოს ასე.

- ქალი გყვარებიათ ოდესმე?

- ასე გიპასუხებთ: არასდროს ვყოფილვარ ამის წინააღმდეგი. დიდი სისულელეა, ის არ გააკეთო, რაც მოგწონს, რაც გინდა... ისე უნდა მოიქცე, როგორც გული გიკარნახებს და როგორც ბედნიერი იქნები.