კოტე თოლორდავა: "კატოსნაირი ცოლის ატანა შეუძლებელია!"

მსახიობმა კოტე თოლორდავამ თავისი პერსონაჟის ქორწილში კარგად ისიამოვნა და სარგებელიც ნახა – ზედმეტი 19 კილო წარსულს ჩააბარა. მართალია, მას და განო მელითაურს ისეთი ლამაზი ქორწილი არ ჰქონიათ, როგორიც ფილმში "ჩემი ცოლის დაქალის ქორწილი" დიტოს აქვს, მაგრამ ხელმოწერა ნამდვილად ორიგინალური გამოუვიდათ. მსახიობი საყვარელი ქალის აივანზე ამწეკრანით ავიდა, ხელი სთხოვა და იქიდან პირდაპირ მმაჩის ბიუროში წავიდნენ. 6 წელია, რაც ერთად არიან. კოტე სამი შვილის მამაა, პირველი ქორწინებიდან ერთი შვილი ჰყავს, განოსთან კი – ორი. დაწვრილებით, თუ რა ხდებოდა კოტესა და დიტოს რეალურ თუ კინოქორწილებში, ქვემოთ შეიტყობთ.
– კოტე, ფილმის "ჩემი ცოლის დაქალის ქორწილი" პრემიერას გილოცავთ! რა ხდებოდა "ქორწილში"?
– ფილმი რეკორდულ დროში გადავიღეთ, 18 დღე ერთ–ერთ რესტორანში გავატარეთ, მასობრივი სცენები იყო, 200 კაციანი ქორწილის გადაღება იოლი ნამდვილად არ ყოფილა. გადასაღებ მოედანზე ისეთი განწყობა იყო, თამაში არ გვჭირდებოდა, ნამდვილ ქორწილში მეგონა თავი. რამდენჯერმე სტუმრებთან მივედი და ინსტინქტურად ვკითხე, რამე ხომ არ გნებავთ, ხომ ყველაფერი კარგად არის–მეთქი. მართლა დავიჯერე, რომ ჩემი ქორწილი იყო. ჩვეულებრივი ქართული ქორწილი გამოვიდა თავისი თამადით, მისი მოადგილით, ქართული ცეკვით და მოლხენით. იყო ჩხუბიც, საპირფარეშოში ძმაკაცები მოსაწევს ეწეოდნენ, ამ დროს ცოლი შეუვარდა ჩემს გმირს... ძალიან სასაცილო სცენები იყო. რაც მთავარია, დიტომ დედაც შემოირიგა, მიუხედავად იმისა, რომ იმ ქალს სძულდა კატო, რომელმაც მისი შვილი 20 წელი აწამა. "დედაჩემი" ქორწილშიც მოვიდა და ჩემს "ცოლს" საგვარეულო ბეჭედიც აჩუქა. მერე რა იქნება, ღმერთმა უწყის, დაელოდეთ მესამე სეზონს!
– როდის დაიწყება მესამე სეზონი?
– თუ არ ვცდები, მალე და თებერვლიდან უკვე ეთერში გავალთ.
– როგორც მსახიობს, რა შედეგი მოგიტანათ ამ სერიალში მონაწილეობამ?
– ძალიან დადებითი. თეატრის მსახიობად ვთვლიდი თავს, მაგრამ კინო არის ძალიან მაგარი, ეს სერიალი კი "კინოშნიკურია". რეჟისორი გიორგი ლიფონავა ქართულ კინოში არის პელე, სცენარის ავტორი ქეთი დევდარიანი კი ისეთ რაღაცეებს წერს, დღემდე შოკში ვართ. ქუჩური გარჩევის სცენებს ისე აღწერს, ხანდახან ვფიქრობ, ამ გოგოს მართლა ხომ არ უცხოვრია ქუჩური ცხოვრებით–მეთქი. ძალიან ბევრი რამ ვისწავლე, გადაღებების დროს დიდი სიამოვნება მივიღე, არაჩვეულებრივი ხალხი გავიცანი. ფილმის გადაღებების დროს ძალიან ვნერვიულობდი, წონაში საგრძნობლად დავიკელი, ერთ თვეში 19 კილოგრამი მივაბარე წარსულს. ეს ძალიან მიხარია, რადგან მსახიობი ღიპიანი არ უნდა იყოს, მე კი მქონდა ღიპი! ეს ნერვიულობა ამად ღირდა.
– თეატრთან დამშვიდობებას და მთლიანად კინოზე გადასვლას ხომ არ აპირებთ?
– თეატრშიც დიდი სიამოვნებით ვიქნები და არც კინოროლებზე ვიტყვი უარს. ეს ჩემი პირველი კინოროლი არ არის. რუსებმა გადამიღეს სრულმეტრაჟიან ფილმში "მამალეგა ჯაზი", თუმცა პრემიერაზე მოსკოვში ვერ ჩავედი. ეს ფილმი მოსკოვის კინემატოგრაფიის ინსტიტუტის მეოთხე კურსის სტუდენტმა ედუარდ ოგანესიანმა გადაიღო.
– რა ნიშნით შეგარჩიეს?
– ერთ დღეს დამირეკეს და მითხრეს, ხულიგანი ბიჭის როლზე მსახიობს ვეძებთ და ეგებ თქვენ ითამაშოთო. მეც დავთანხმდი.
– ესე იგი იმ ფილმშიც ძველი ბიჭის როლს თამაშობთ.
– იმ ფილმში "დურაკი" ხულიგანი ვარ.
– ძველი ბიჭის როლი კარგად გამოგდით, რეალურ ცხოვრებაში როგორი ხართ?
– რადიკალურად განსხვავებული! მე ვარ მსახიობი, რომელსაც ამ ტიპის როლების თამაში მიწევს. რეალურად კი კეთილი და მოსიყვარულე ვარ. 33 წლის ვარ და რაღა დროს ჩემი ქუჩური ცხოვრება და გარჩევებია! ბავშვობაში ყველას გაგვივლია ქუჩის ინსტიტუტი. ისეთ დროში გავიზარდე, მინდოდა თუ არა, მონაწილე ვიყავი ამ ტიპის პროცესების.
– იმის საშიშროება ხომ არ გაჩნდა, რომ ამ ამპლუაში ჩაიკეტოთ?
– არა, ძალიან მიყვარს კომედიური როლები და ტრაგიკული გმირიც მითამაშია. არ მინდა, თეატრის სცენაზე რომ დამინახავენ, თქვან, ეს დიტოაო. ისე, ძველი ბიჭებიც სხვადასხვანაირი ადამიანები არიან... ძალიან ბედნიერი ვარ, ჩვენს თეატრში (მოზარდ მაყურებელთა თეატრი. ავტ.) ოთარ ბაღათურია დგამს სპექტაკლს "კუკარაჩა", სადაც მურტალოს ვთამაშობ. 5 აპრილს გელოდებით პრემიერაზე!
– დიტოს მსგავსად სიყვარულის გამო 20 წელი დაელოდებოდით ქალს, რომედიც კატათაგვობანას გეთამაშებათ?
– 20 წელი რომ ვინმეს დავლოდებოდი? არა. განო რომ ცოლად მოვიყვანე, 6 თვის გაცნობილი მყავდა. საბედნიეროდ, ჩემი გრძნობა ცალმხრივი არ ყოფილა, თუმცა რომ დამჭირვებოდა, სიყვარულის გამო ყველანაირ მსხვერპლზე წავიდოდი. ეს ისეთი გრძნობაა, რომელსაც შეუძლია სასწაული გაგაკეთებინოს. ამიტომაც შემიყვარდა ჩემი პერსონაჟი – დიტო. ყველანაირად ვცდილობ, რომ მისი ცუდი მხარეებიც გავამართლო.
– დედასთან როგორი ურთიერთობა გაქვთ, დიტოსავით თქვენც ხშირად წასულხართ მისი აზრის საწინააღმდეგოდ?
– საბედნიეროდ, დედასთან წინააღმდეგობის გაწევა არ მომიწია. მორჩილი ადამიანი არ ვარ. როცა მე და განო ოჯახს ვქმნიდით, დედას უარყოფითი აზრი არ გამოუთქვამს, განო მისთვის სასურველი რძალი იყო. ასეც რომ არ ყოფილიყო, ჩემსას მაინც გავიტანდი, ამაში ორი აზრი არ არსებობს. ასეთ მნიშვნელოვან საკითხებს ყოველთვის თავად ვწყვეტ.
– კატოს ყველაფერი აპატია თქვენმა პერსონაჟმა, თავად რას ვერ აპატიებთ ან აპატიებთ საყვარელ ქალს?
– ოოო, ეს კითხვააა... მართალი გითხრათ, ამაზე საჯაროდ საუბარი არ მსურს. რატომ უნდა იცოდეს ვინმემ, მე ვის რას ვაპატიებ? მიმტევებელი ვარ, მაგრამ ყველაფერს თავისი დოზა გააჩნია. მგონი, დიტოსავით ვლაპარაკობ (იცინის)... თუმცა ის უფრო მიმტევებელი აღმოჩნდა, ვიდრე მე ვარ. ქალს ამდენ რამეს ვერ ვაპატიებდი. რისი გამოცდილებაც არ მაქვს, იმაზე ლაპარაკი მიჭირს.
– გადამღებ ჯგუფში თითქმის ყველა მსახიობი თქვენი თაობაა, მათთან რა ურთიერთობები გაქვთ?
– ნინო გაჩეჩილაძეს ძალიან დიდი ხანია ვიცნობ, თეატრში ის ან ჩემს ცოლებს თამაშობდა, ან შეყვარებულებს. ლევან ყოჩიაშვილი კი ჩემი ჯგუფელია, ჩვენ ერთად გავიზარდეთ. გიორგი ყიფშიძე არაჩვეულებრივი ადამიანია, რომელიც ფილმში ჩემი პერსონაჟის მეჯვარეა. მასთან თანამშრომლობით ვისიამოვნე. ფილმში გიორგის პერსონაჟს, ვერსკის თინას, მამობილი (ავთოს როლს მსახიობი ბესო მეგრელიშვილი თამაშობს) "უჭედავს", ვერსკი ხარ თუ ყვერსკიო, ეუბნება და ამის გამო ჩხუბი ატყდება. ნაღდი თბილისური ქორწილია.
– თავად როგორი ქორწილი გქონდათ, დიტოსავით თქვენც ნაციონალური სამოსი ხომ არ გეცვათ?

– პირველად რომ დავოჯახდი, კატეგორიულად არ მინდოდა, ქორწილი მქონოდა, მაგრამ მშობლების თხოვნით გადავიხადე. მეორედ რომ შევქმენი ოჯახი, თავად ვწყვეტდი, რა მინდოდა და რა – არა. განოს ამწეკრანით მივაკითხე ფანჯრებთან, აივანზე ვთხოვე ხელი და წამოვიყვანე. წავედით, ხელი მოვაწერეთ და მთელი დღე სადღაც დავბოდიალობდით. ასე რომ, არც 500 კაციანი ქორწილი მქონია და არც ჩოხა–ახალუხი ჩამიცვამს. ეს ყველაფერი იმხელა თანხებთან არის დაკავშირებული, რომ ამის საფასურად უკეთესია საზღვარგარეთ კარგი თაფლობისთვე მოიწყო.
– თქვენმა ცოლმა როგორ შეაფასა დიტო სიძის როლში?
– განიკო, ხომ იცით, როგორი კრიტიკულიც მყავს, მაგრამ ეს პირველი შემთხვევა იყო, როდესაც ჩემ მიმართ შენიშვნები არ ჰქონდა. პრემიერის დღეს ისე ვინერვიულე, ემოციები და ძალა სულ გამომელია. იყო ბევრი აპლოდისმენტი და კარგი შეფასებები.
– განომ არ ინანა, რომ თქვენც ისეთივე ლამაზი ქორწილი არ გქონდათ?
– არა, თვითონაც ჩემნაირად ფიქრობს. არანაირი სინანული!
– გადაღებების დროს ალბათ შეზარხოშდით კიდეც.
– სუფრაზე ყველაფერი ბუტაფორია იყო, მხოლოდ ნეფე–პატარძლის სუფრაზე იდო ცოტა სასმელი. გადაღების დროს – არა, მაგრამ გადაღების შემდეგ ყველანი ცოტ–ცოტას ვწრუპავდით.
– განოსა და კატოს შორის მსგავსებებს იჭერთ?
– არა, ეს რა მკითხეთ! ისინი ერთმანეთისგან რადიკალურად განსხვავებულები არიან. კატოს, მიუხედავად თავისი სიმსუბუქისა, ძალიან მძიმე ხასიათი აქვს, ასეთი ცოლის ატანა შეუძლებელია! ასეთი ადამიანები არსებობენ და ხშირად მარტოებიც რჩებიან, თუმცა კატოს გაუმართლა. განო სულ სხვანაირია, მის გარეშე არსებობა ვერც კი წარმომიდგენია. მან ისეთი გვერდში დგომა იცის, რომ ამის სიტყვებით გადმოცემა მიჭირს. მე და განომ თანაცხოვრების 6 წელი ისე გავიარეთ, რომ ვერც კი მივხვდით. ვჩხუბობთ, ვრიგდებით და ეს ყველაფერი ძალიან ლამაზად ხდება. ბედნიერი ვარ, რომ ასეთი მეორე ნახევარი მყავს.
– თეატრში რა სპექტაკლზე მუშაობთ?
– მოზარდ მაყურებელთა თეატრში კიდევ ერთი ძალიან კარგი სპექტაკლი იდგმება, სადაც მექალთანის როლს ვთამაშობ. ჩემი გმირი ტრაგიკული ტიპია, რომელსაც ცოლი ღალატობს, დაძვრება პარკებში და იქ ეძებს თავგადასავლებს. გადაეყრება ქალს, რომელსაც ძალიან ბევრ რამეს ატყუებს. სპექტაკლს ჰქვია "დეჟა ვუ". რეჟისორი ხათუნა მილორავა გახლავთ, პარტნიორობას მსახიობი ნინო ლეჟავა მიწევს. ძალიან მიხარია, რომ ეს წელი დიდი იმედებით, სიახლეებით და მოლოდინით დაიწყო.
ლანა კიკნაძე