ლიკა ყაზბეგი ჯვარს საპატიმროში იწერს

”ლიკა ყაზბეგის სამოდელო სააგენტოს” ხელმძღვანელი, ლიკა ყაზბეგი თხოვდება და ჯვარს სასჯელაღსრულების მე-16 დაწესებულებაში იწერს. ლიკა ყაზბეგმა ”ამბები.გე”-ს ინფორმაცია თავად დაუდასტურა.

ლიკა ყაზბეგის რჩეული გიორგი ჯელაძეა, მეტსახელად - "ჩუქჩა". ლიკას არც ის დაუმალავს, რომ მისი საქმრო ამჟამად პატიმრობაში იმყოფება. შესაბამისად, ხელმოწერა და ჯვრისწერაც საპატიმროში გაიმართება.

როგორც ლიკა აცხადებს, გიორგის დიდი ხანია იცნობს და მის პატიმრობას მათი ურთიერთობებისთვის ხელი არ შეუშლია.

”ის გამორჩეული ვაჟკაცია, როგორც გარეგნობით, ასევე თვისებებით. მოხდა ისე, რომ საპატიმროშია. ამნისტია ჯერ არ შეხებია, მაგრამ გადავწყვიტეთ მოვლენები დაგვეჩქარებინა და ციხეშივე მოგვეწერა ხელი და ჯვარიც დაგვეწერა”, - განუცხადა ლიკამ ”ამბები.გე”-ს.

ლიკას 3 მეჯვარე უნდოდა ჰყოლოდა, მაგრამ შექმნილი ვითარების გამო 1 ხელისმომკიდე ეყოლება - სასჯელაღსრულებისა და პრობაციის სამინისტროს თანამშრომელი ლალი მოროშკინა.

ლალი მოროშკინამ სამსახურებრივი უფლებამოსილებით ისარგებლა, საპატიმროშივე გადაამოწმა სასიძოს ვინაობა და განგვიცხადა, რომ ლიკას საქმრო "ოქროს ბიჭია".

ბომონდურ-პენიტენციური ჯვრისწერა 14 თებერვალს, ვალენტინობა დღეს გაიმართება. რამდენი ადამიანი დაესწრება საქორწინო ცერემონიას, ჯერჯერობით, უცნობია.

გიორგი ბერიძე
ambebi.ge