რომელი მინისტრის ცოლთან მეგობრობს კახი კალაძის მეუღლე

ენერგეტიკის მინისტრ კახი კალაძის მეუღლე ანუკა არეშიძე ამჟამად საზღვარგარეთ იმყოფება, კერძოდ, უკრაინაშია საქმეებზე. მოგეხსენებათ, ანუკამ კახიზე გათხოვების შემდეგ მოდელობას თავი დაანება, დიზაინერობა გადაწყვიტა და ბიჭოლასთან ერთად ბრენდი ჩამოაყალიბა, რომელმაც პირველი ჩვენება უკრაინაში გამართა. სხვათა შორის, კიევში მალე სწორედ ამ ბრენდის ახალი მაღაზიის გახსნა იგეგმება.

ანუკასა და კახის ორი შვილი ჰყავთ, ლევანი და კახი. ანუკა თავს კარგ დედად მიიჩნევს და ამბობს, რომ შვილებს მთელ თავისუფალ დროს უძღვნის, თუმცა დამხმარე ქალიც ჰყავს და ბავშვების ბებია-ბაბუებიც მხარში უდგანან. კახის მშობლებთან ანუკას საუკეთესო ურთიერთობა აქვს და ფიქრობს, რომ კარგი რძალია.

- პირველ რიგში, საინტერესოა, მეუღლის მინისტრობას როგორ შეეგუე. თანაც იმ ფონზე, რომ რადგან შესაბამისი პროფესია და გამოცდილება არ აქვს, მის ნაბიჯებს ყველა დაკვირვებით უყურებს.
- ჩვენი ოჯახი ყოველთვის იყო ყურადღების ცენტრში, ყველა სიტყვას, ქცევას და ჩაცმულობასაც კი აკრიტიკებდნენ. დღეს ის შეიცვალა, რომ საკუთარი ემოციების მართვა დავიწყე, მაქსიმალურად ვცდილობ, საზოგადოებრივი თავშეყრის ადგილებში ისე ვიყო, როგორც სხვა დანარჩენი ადამიანები. ყურადღება უფრო გაიზარდა, ბევრი რამ შეიცვალა, ჩაცმის სტილით დაწყებული, ცხოვრების სტილით დამთავრებული. კახას მიმართ იყო კრიტიკა და დღესაც არის, თუმცა ვფიქრობ, კარგად გაართვა თავი, რაც მთავარია, მატყუარა არ არის და მაქსიმუმს აკეთებს.

- შენმა სამსახურმა მეორე პლანზე ხომ არ გადაინაცვლა?
- ჩემთვის პრიორიტეტი, რა თქმა უნდა, მეუღლე და ბავშვები არიან, ჩემი საქმიანობა ყოველთვის ამის მერე იდგა, კახას ხელს ვუწყობ, მაქსიმალურად ვართ ერთად, თუმცა ხანდახან წასვლა მიწევს, რადგანაც სამუშაო ბევრია და პასუხისმგებლობა მეც მაკისრია.

- არის რაიმე სიახლეები შენს საქმიანობაში?
- ამჟამად "ანუკი-ბიჭოლას" მაღაზიის გახსნისთვის ვემზადებით კიევში. მთელი ენერგია, ყურადღება იქით მაქვს, ასევე საიუველირო ხაზითაც ვარ დაკავებული და ვნახოთ. იმედია, ყველაფერი ისე გამოვა, როგორც ჩაფიქრებული გვაქვს.

- კრიტიკაზე ვილაპარაკეთ, მაგრამ მინდა, მაინც გკითხო, ადრე ინტერვიუში მითხარი, მეუღლეს პირველი მე გავაკრიტიკებო. აძლევ შენიშვნებს?
- როდესაც სახლში ბრუნდება, ბევრს ვსაუბრობთ. როცა რამე არ მომწონს, უცბად ამიხსნის ხოლმე, გამარკვევს და მეცვლება აზრი. ჯანსაღ კრიტიკას მივესალმები.

- სინათლის თემაზე თუ ხუმრობთ ხოლმე? რაც კახი მინისტრია, შუქი არ წასულა თქვენთან სახლში?
- არა, სახლში არ წასულა, თუმცა დაურეკავთ ჩემს მეგობრებს და გვიხუმრია, რა თქმა უნდა (იცინის).

- კახის თავისუფალი დრო აქვს?
- შაბათ-კვირას ჩვენთან ერთად ატარებს. თუ საქმე აქვს, უფროსი ვაჟი სამსახურში მიჰყავს. ძირითადად საღამოს ან გვიან ღამე ბრუნდება, კარი აუცილებლად მე უნდა გავუღო, რომელი საათიც უნდა იყოს...

- პატარებზე მინდა გკითხო. საქართველოში გადმოსვლის შემდეგ ვინმე გეხმარება მათ მოვლაში?
- ბებიებისა და ბაბუების ყურადღება არ აკლიათ, თუმცა დამხმარე ქალი მყავს, რადგანაც მე ენებში ვემზადები და ყველაფერს ვერ ვასწრებ, მაგრამ ვფიქრობ, კარგი დედა ვარ. თავისუფალ დროს ბავშვებთან ვატარებ და ვაკონტროლებ მათ აღზრდას. გათამამებული და უზრდელი ბავშვები არ მიყვარს (იღიმის).

- როგორია შენი ერთი ჩვეულებრივი დღე?
- ჩემი ერთი ჩვეულებრივი დღე ასეთია - დილას ინგლისურსა და რუსულზე მივდივარ, შემდეგ ვვარჯიშობ, ვყიდულობ საჭირო ნივთებს სახლისთვის, თუ დასალაგებელია, არც მაგას ვთაკილობ და ბავშვებთან ერთად ვატარებ საღამოს, შემდეგ კახას ველოდები და ვუმზადებ რაიმე კერძს, როცა მარტო ვართ, ყოველთვის გამზადებულ ვახშამს ვახვედრებ.

- რუსულისა და ინგლისურის შესწავლა რამ გადაგაწყვეტინა?
- იმან, რომ კიევში რუსულად მიწევს საუბარი და უბრალოდ, მჭირდება, რომ ხალხთან ურთიერთობა მქონდეს. ინგლისური კი, იტალიურის სწავლის ფონზე, ისე სათანადოდ აღარ ვიცი, ამიტომ ვსწავლობ ორივე ენას.

- მთავრობის სხვა წევრებთან თუ მეგობრობს კახი და შენ თუ გაქვს რაიმე ურთიერთობა სხვა მინისტრების ცოლებთან?
- კი, მეგობრობს, პირადად მე ძალიან მომწონს ირაკლი ღარიბაშვილის მეუღლე, მასთან ახლო ურთიერთობა მაქვს. ნუნუკა ძალიან კეთილი და კარგი გოგოა.

- ანუკი, მახსოვს წინასაარჩევნო პერიოდში შენი აქტიურობა "ფეისბუქზე". ახლა კი შენი სტატუსები აღარ ჩანს. რატომ აღარ აქტიურობ?
- ხომ ვთქვი, ვცდილობ, ემოციები ვაკონტროლო. ახლა ჩემს ყველა სტატუსს ჩასაფრებულები ელოდებიან, აზრს გამოვთქვამ, მაგრამ ისე აღარ, რადგანაც ბევრი რამ შეიცვალა, მეორეც - "ფეისბუქისთვის" დიდი დრო აღარ მაქვს.

- საკუთარი თავის მოსავლელად თუ იცლი? ყოველთვის კარგად გამოიყურები...
- ყოველთვის ვცდილობ, ფორმაში ვიყო. ინტენსიურად ვვარჯიშობ, სიგარეტს არ ვეწევი, სახის კანს ვუფრთხილდები და სოლარიუმში იშვიათად მნახავთ. სამოსი ყოველთვის წინასწარ მაქვს გამზადებული და ვიცი, რა დროს რა უნდა ჩავიცვა. თუ კარგად გამოვიყურები, ეს კახას დამსახურებაა, რადგან ის მაბედნიერებს.

- მისგან რა კომპლიმენტი მიგიღია ისეთი, რამაც ძალიან გაგახარა.
- ბევრი მახსენდება, მაგრამ როცა მეუბნება, - "შენ ჩემი სული ხარ", ესაა ჩემთვის ყველაზე დიდი კომპლიმენტი.

- ახალმა წელმა უკვე ჩაიარა, დაასაჩუქრე ოჯახის წევრები?
- ძალიან მიყვარს, როცა ადამიანს საჩუქარს ვუკეთებ და ვახარებ. ეს პროცესი საოცარ ბედნიერებას მანიჭებს. წელსაც მე ვიყავი თოვლის ბაბუა, არ დავარღვიე ტრადიცია და ნაძვის ხის ქვეშ დავალაგე საჩუქრები. თოვლის ბაბუამ წელს პატარებს თვითმფრინავი და გიტარა უსახსოვრა, დიდებს - სუნამო და შარფი (იღიმის).

- დაბოლოს, მინდა გკითხო, როგორი ურთიერთობა გაქვს კახის მშობლებთან?
- კახას ოჯახის წევრებთან, მშობლებთან ძალიან კარგი ურთიერთობა მაქვს, მაქსიმალურად ვცდილობ, ყურადღებიანი რძალი ვიყო. ჩვენ ცალკე ვცხოვრობთ, მაგრამ პარასკევს და შაბათ-კვირას აუცილებლად მათთან ვრჩებით. ისინიც მოდიან ყოველდღე ჩვენთან, ახალ წელსაც ერთად შევხვდით. კახას მშობლებთან სიარულს სტუმრობას ვერ დავარქმევ, რადგან არის შემთხვევები, როცა კვირაობით ვრჩებით მათთან. იმის მიუხედავად, რომ ჩემი დედამთილი ასაკშია, მაქსიმალურად გვიწყობს ხელს, როგორც ჩვენ გვინდა, ისე ვიყოთ. ეს ძალიან მახარებს. ახალგაზრდულად ფიქრობს და არ ჰგავს იმ ქალებს, რომლებიც შვილების მიმართ ეგოისტურად არიან განწყობილი. ვფიქრობ, კახას მშობლებთან კარგი ურთიერთობა მაქვს და ერთი დიდი ოჯახი ვართ.

ნინო მურღულია

ჟურნალი "რეიტინგი"