ნინო გაჩეჩილაძე: "სიყვარული მხოლოდ ერთხელ მეწვია"

მსახიობ ნინო გაჩეჩილაძეს თავისი კინოგმირის, კატოს, ხუთდღიანმა ქორწილმა საბოლოოდ გადააწვეტინა, რომ ცხოვრებაში მსგავსი არაფერი ექნება. ის ევროპულ, მწვანე მდელოზე მოწყობილ ლამაზ წვეულებაზე და თეთრ ფატაზე ოცნებობს. მანამდე კი თავის სიყვარულს უნდა შეხვდეს. ცხოვრებაში ერთხელ იყო შეყვარებული, მაგრამ მაშინ გათხოვება ვერ გადაწყვიტა.
თუ კატომ სერიალში ახალი ცხოვრება ქმართან ერთად დაიწყო, ნინომ რეალობაში ახალი ცხოვრება ახალ სახლში გადასვლით გადაწყვიტა. მხიარულ და ხმაურიან ოჯახს გამოეყო და პატარა, კოხტა ბინა მოიწყო. თავის საოცნებო ქორწილსა და დამოუკიდებელ ცხოვრებაზე მსახიობი "სარკეში" საუბრობს.
– ნინო, ფილმ "ჩემი ცოლის დაქალის ქორწილის" გადაღებები მოიტოვეთ, ახლა, როცა უკვე პრემიერამაც ჩაიარა, როგორ გახსენდებათ გადასაღები მოედანი?
– არანორმალურად გიჟურ რიტმში ვიღებდით! საერთოდ რთულ პირობებში გვიწევს მუშაობა, სულ გვეჩქარება, რადგან კვირაში ორი სერია უნდა გავიდეს. როდესაც ასეთი რეჟიმის პარალელურად ფილმის გადაღებას იწყებ, ეს დამატებით სირთულეებთან არის დაკავშირებული. როდესაც მხატვრული ფილმის გადაღება დავიწყეთ, მგონი, ყველა მსახიობმა ორმაგად მოვინდომეთ და მასში დიდი ენერგია ჩავდეთ. როგორც ვიცი, მაყურებელს მოეწონა. ამას ისიც მოწმობს, რომ ფილმზე დასასწრები ბილეთები თითქმის არ იშოვება.

– თვითონ "ქორწილმა" რა შეგრძნებები დაგიტოვათ?
– "ფორმულა კრეატივმა" ხუთდღიანი ქორწილი გადამიხადა და ეს იმდენად აუტანელი იყო, მივხვდი, რომ ამ ყველაფერს შეიძლება მხოლოდ ერთი დღე გაუძლო. საშინელებაა, ხუთი დღის განმავლობაში გეცვას საპატარძლო კაბა, გესმოდეს გაუთავებელი სადღეგრძელოები! ორდღიანი ქორწილი გამიგია, მაგრამ ხუთდღიანი?! დაიწყო და აღარასოდეს მთავრდებოდა. მასობრივ სცენებში უამრავი ადამიანი მონაწილეობდა და ურთულესად გადასაღები სცენები იყო., მაგრამ რეჟისორმა ამ ყველაფერს გადასარევად გაართვა თავი. ვინც ფილმი ნახა, ყველა მეუბნება, მართლა ქორწილში გვეგონა თავიო.
– საერთოდ ქართულ ქორწილზე, რა სახითაც დღეს ის არსებობს, რა აზრი გაქვთ?
– ქართული ქორწილები და მისი ტრადიციები, სიმართლე გითხრათ, არ მომწონს. შეიძლება ეს ძალიან კარგი ტრადიციაა, მაგრამ გაუთავებელი სადღეგრძელოები, ტაშ–ფანდური თავისი ქართული ცეკვებით და საესტრადო მომღერლებით, ჩემთვის აბსოლუტურად მიუღებელია. ნურავის ეწყინება, მაგრამ ზუსტად ვიცი, რომ ასეთ ქორწილს ცხოვრებაში არ გადავიხდი, კოშმარია! ამ ფილმის შემდეგ კიდევ ერთხელ დავრწმუნდი, რომ ქორწილი არ მინდა! თუმცა ისეთ ქორწილზე უარს არ ვიტყოდი, როგორსაც უცხოურ ფილმებში ვუყურებ – ზღვის ან ტბის სანაპიროზე, ღია ცის ქვეშ ლამაზად გაწყობილი სუფრები, სიმფონიური ორკესტრი, არცთუ ისე ბევრი ადამიანი, სიწყნარე, სიმშვიდე... მოკლედ, ჩემი ოცნების ქორწილი სულ სხვანაირია, მაგრამ საქართველოში ამის ახდენა ალბათ წარმოუდგენელია. ამიტომ ჯობია, ხელისმოწერის და ჯვრისწერის შემდეგ შენს საყვარელ ადამიანთან ერთად საქორწილო მოგზაურობაში წახვიდე.
– და ამ ლამაზმა დღემ თეთრი კაბის გარეშე ჩაიაროს?
– არა, თეთრი კაბა აუცილებელია! ყველა ქალის ოცნებაა, ქორწილში თეთრი კაბა ჩაიცვას. მე და ფილმის კოსტიუმების მხატვარს კატოს გმირისთვის სხვანაირი თეთრი კაბა გვქონდა ჩაფიქრებული, უფრო დახურული უნდა ყოფილიყო, გრძელი სახელოებით, მაგრამ ცოტა დრო იყო დარჩენილი და ასეთის შეკერვა ვერ ხერხდებოდა. ამიტომ ავირჩიეთ ისეთი კაბა, რომელიც ასე თუ ისე მიახლოებული იყო ჩვენს ჩანაფიქრთან. ცუდი ნამდვილად არ არის, ძალიან მომწონს, თუმცა ეს ნამდვილად არ არის ჩემი ოცნების კაბა და არ არის ის, რის ჩაცმასაც ქორწილში ვისურვებდი.
– როგორს ისურვებდით?
– ჩემი ოცნების კაბა გრეის კელის კაბაა, რომელიც მას 1956 წელს ეცვა, მაშინ, როდესაც მონაკოს პრინცს გაჰყვა ცოლად. მიუხედავად იმისა, რომ მას შემდეგ ნახევარ საუკუნეზე მეტი გავიდა, ეს კაბა მაინც ერთ–ერთი ულამაზესი და დახვეწილია. ძალიან მინდოდა, ფილმში ფატა მქონოდა, მაგრამ კოსტიუმების მხატვარმა ასე გადაწყვიტა. ჩემს რეალურ ქორწილში ფატის გარეშე სახლიდან არ გავალ!
– თქვენმა ეკრანულმა ქმარმა დიტომ ანუ მსახიობმა კოტე თოლორდავამ "სარკესთან" თქვა, რომ ცხოვრებაში კატოსნაირ ცოლს ვერ აიტანდა. თავად რას ფიქრობთ თქვენს გმირზე?
– კოტეს აბსოლუტურად ვეთანხმები იმაში, რომ კატოსნაირი ცოლის ატანა შეუძლებელია, თუმცა ჯერ ხომ არ იცის, როგორი ცოლი იქნება, ეს ალბათ ყველაზე უკეთ ჩვენმა სცენარისტმა იცის. თუ დიტო შეძლებს კატოს მორჯულებას, შეიძლება მისგან კარგი ცოლი დადგეს.
– დიტოსნაირ მამაკაცს თქვენ ქმრად ისურვებდით?
– არ შეიძლება დიტოს ცალსახად დადებით ან უარყოფით ტიპად დახასიათება. მას აქვს რამდენიმე ისეთი ღირსეული თვისება, რომელიც შეიძლება ბევრ ქალს მოეწონოს, თუმცა მას ისეთი თვისებებიც აქვს, რომელიც კატეგორიულად არ მომეწონებოდა.
– დავაკონკრეტოთ, რა მოგწონთ და რა – არა.
– მომწონს ის, რომ დიტო ძალიან ხელგაშლილია, არამარტო კატოსთან, არამედ მის ახლობლებთანაც. იმდენად კეთილია, რომ კატოს პირველი ქმრის "ფეხებზე დაკიდებაც" ვერ შეძლო. ხელგაშლილობა მამაკაცის მნიშვნელოვან თვისებად მიმაჩნია და ვერ წარმომიდგენია ისეთთან ურთიერთობა, ვისაც ეს ღირსება არ ექნება. ხელმომჭირნე, წუწუნა კაცი ჩემს თვალში უსუსურია. ბევრი თვლის, რომ დიტო უთავმოყვარეოა, კატოს საქციელზე თვალს ხუჭავს. მე ეს არ მიკვირს. როდესაც ადამიანი გიყვარს, ყველაფერს აპატიებ. ვნახოთ, დიტო როგორი ქმარი იქნება. თუ ეჭვიანობას და მაგიდაზე მუშტების ბრახუნს დაიწყებს, ცოლის მიმართ გაცივდება და ტიპურ ქართველ კაცს დაემსგავსება, ჩემს თვალში ყველა ღირსებას დაკარგავს. არ მინდა, ასეთი დიტო დავინახო. კატოს მსგავსად არც მე ვისურვებდი, რომ ჩემი რჩეული ნარკოტიკზე ან სასმელზე იყოს დამოკიდებული. ყველაზე დიდი ნარკოტიკი სიყვარულია. ურთიერთობები იმდენად მრავალფეროვანია, რომ ყოველდღიურად ახალ–ახალი რაღაცეების აღმოჩენა შეიძლება საყვარელ ადამიანში.
– როგორც ჩანს, მამაკაცების მიმართ ძალიან მომთხოვნი ხართ.
– ძნელია არ ვიყო მომთხოვნი. თუ მასთან ბედნიერი არ ვიქნები, მირჩევნია, გვერდით საერთოდ არავინ მყავდეს.
– თქვენი და თქვენი ფიქტიური ქმრის, დიტოს კოცნას ბევრი განიხილავს. ამაზე რა რეაქცია გაქვთ?
– არ ვიცი, რა ტიპის მაყურებელს გულისხმობთ.
– ალბათ უფროს თაობას.
– კი, ბატონო, მოდი, პატივი ვცეთ უფროს თაობას და ამ შემთხვევაში დიდი ბოდიში მოვუხადოთ ყველა იმ ქართველი მსახიობის სახელით, რომელმაც გაბედა და ეკრანზე თავის პარტნიორს აკოცა. სხვა პროფესიის წარმომადგენლების მსგავსად, ზოგჯერ მსახიობებსაც გვიხდება ბევრი არასასურველი რამის გაკეთება. ისეთი სცენების თამაში გვიწევს, რომელიც შეიძლება დიდად არ გვინდოდეს, მაგრამ სცენარი მოითხოვდეს. თუმცა არის როლები, რომლებზეც კატეგორიულ უარს ვიტყვი. ეროტიკულ სცენებში მონაწილეობას, კამერის წინ გაშიშვლებას ვგულისხმობ. არ მინდა, მაყურებელმა ამ კუთხით დამინახოს.
– თუმცა კატოც საკმაოდ თამამია...
– კატოს ეკრანზე ისეთი არაფერი გაუკეთებია, რაზეც შეიძლება ითქვას, როგორ გაბედაო. რომელი საუკუნეა?! მგონი, ამ თემაზე საუბარი სამარცხვინოა. მე რომ ეროტიკულ სცენებში ვთამაშობდე, რომლის ყურების დროსაც ბავშვები ეკრანებს უნდა მოვარიდოთ, მაშინ შეიძლება ამ თემაზე სერიოზულად ვისაუბროთ. ბოდიში, მაგრამ მეღიმება ასეთ კრიტიკულ შეფასებაზე. ადამიანები ცხოვრებაში ბევრად უფრო უარესად იქცევიან, ვიდრე ჩვენი გმირები სერიალში.
– რადგან დღეს ჩვენი თემა სიყვარული და ქორწილია, იმაზეც უნდა ვისაუბროთ, რეალურად თუ გამოგიცდიათ სერიოზული გრძნობა, რომელიც თითქმის ქორწილამდე მისულა.
– მყვარებია, მაგრამ ეს გრძნობა არ ყოფილა ისეთი სერიოზული და ღრმა, რომ გათხოვების და პატარძლის როლში ყოფნის სურვილი გამჩენოდა. სამწუხაროდ, ვიღაცის ცოლობა არასოდეს მომდომებია. ეს ძალიან ცუდია, მით უმეტეს, როცა ჩემს ასაკში ასეთ რამეს ამბობს ქალი, მაგრამ ფაქტია. თავის დროზე ალბათ ორივე მხარე ვფიქრობდით, რომ ჩვენი გრძნობა სერიოზული გახდებოდა... დგება რაღაც ეტაპი, როდესაც აცნობიერებ, რომ არ შეგიძლია იმ ადამიანთან ერთად მთელი ცხოვრების გატარება. ჩვენც ასე დაგვემართა. ყველაზე მთავარი ჯერ კიდევ წინ მელოდება, მინდა, ისეთი სიყვარული მეწვიოს, როგორიც ფილმებში მინახავს, წიგნებში წამიკითხავს. შეიძლება მეოცნებე ქალი ვარ, მაგრამ მგონია, რომ თუ მოინდომებ, ყველანაირ ოცნებას აისრულებ.
– ანუ ამჟამად თქვენი გული თავისუფალია.
– ახლა არაფერი ხდება. ამჟამად შემოქმედებითი პროცესი დაიწყო, სერიალის პარალელურად ახალი სპექტაკლის რეპეტიციები მაქვს, რომელსაც გიზო ჟორდანია დგამს.
– როცა ურთიერთობა მთავრდება, საკუთარ თავს არ ეკითხებით, რომ იქნებ თქვენ ხართ ზედმეტად პრეტენზიული?
– ვერ გეტყვით, რაში შემიძლია საკუთარი თავი დავადანაშაულო, მაგრამ იმის გამო, რომ ძალიან მწირი გამოცდილება მაქვს სასიყვარულო ურთიერთობაში...
– მხოლოდ ერთხელ გიყვარდათ?
– სიყვარული მხოლოდ ერთხელ მეწვია და ისიც ცოტა ხნით. დიდი ხანია ყველაფერი დამთავრდა და სიმართლე გითხრა, აღარც მახსოვს. ამ შემთხვევაში ვერ გეტყვით, რაში შემიძლია საკუთარი თავი დავადანაშაულო. ვიღაცამ რომ მომისმინოს, შეიძლება იფიქროს, როგორი პრეტენზიული ყოფილაო, ამ დროს პრეტენზიები არც ერთი თაყვანისმცემლისთვის წამიყენებია. ალბათ იმიტომაც, რომ მათთან სერიოზულ ურთიერთობას არ ვაპირებდი. როცა სიყვარულია, ძნელია მნიშვნელოვან რაღაცეებზე თვალები დახუჭო. გრძნობის გამო საკუთარ პრინციპებზე უარი არ უნდა თქვა, თუმცა ცხოვრებაში ყველაფერი ხდება. ურთიერთობა მაშინაა კარგი, როცა ადამიანს ისეთი უყვარხარ, როგორიც სინამდვილეში ხარ. ესაა გახსნილი, ღია და გულწრფელი გრძნობა. თავიდანვე განწირულია ურთიერთობა, როცა გეუბნებიან, ჩემ გამო სხვანაირი უნდა გახდეო. ადამიანი რაღაცეებზე წინასწარ უნდა დაფიქრდე, რომ მერე ფაქტის წინაშე არ აღმოჩნდე. შეიძლება წინასწარ რომ მიყვარს რაღაცეების გათვლა, ამიტომაც მიჭირს ურთიერთობის დაწყება.
– ორიგინალური სიყვარულის ახსნა გახსენდებათ?
– მგონი, ლექსების მოძღვნა უკვე აღარ არის ორიგინალური. ეჭვი არ მეპარება, რომ ყველას გრძნობა გულწრფელი იყო, ორიგინალური არც ერთი ყოფილა, ალბათ ამიტომაც არ გამოვიდა არაფერი.
– ახალი წლიდან ცალკე გადახვედით საცხოვრებლად, მარტო ცხოვრება მოგწონთ?
– საკმაოდ ძნელია, თუმცა ხანდახან და (მომღერალი თაკო გაჩეჩილაძე. ავტ.) რჩება ხოლმე ჩემთან. მთელი ცხოვრება მიჩვეული ვართ, რომ ერთმანეთის გვერდიგვერდ გვძინავს, ახლა კი ორივე მარტო დავრჩით. სამი წლის ვიყავი, თაკო რომ გაჩნდა და ბავშვობიდან ერთად მოვდივართ. ძალიან შეკრული ოჯახი ვართ.
– მშობლებს არ გაუჭირდათ თქვენი გაშვება სახლიდან?
– ჩემი განაცხადი მათთვის ცოტა მიუღებელი იყო. უკვე 32 წლის ვარ და, მგონი, არაფერია იმაში გასაკვირი, რომ ცალკე გადასვლა მოვინდომე, მით უმეტეს, რომ თავის რჩენა შემიძლია. მაქვს სამსახური და სტაბილური შემოსავალი. ერთ მშვენიერ დღეს გადავწყვიტე, რომ დამოუკიდებლად უნდა დამეწყო ცხოვრება და საკუთარი თავისთვის მიმეხედა. არ შეიძლება მთელი ცხოვრება დედა გიკეთებდეს საჭმელს, გირეცხავდეს, გიუთოვებდეს, საწოლს გისწორებდეს. მარტო ცხოვრებას ერთი უპირატესობა აქვს, საკუთარ თავთან დიალოგისთვის მეტი დრო გრჩება.
– თქვენს სახლში რემონტი გააკეთეთ?
– ელიავას ბაზრობა უკვე ყელში მაქვს ამოსული! არც "პრარაბი" მყოლია და არც ინტერიერის დიზაინერი, ორივეს მოვალეობა მე შევითავსე. რემონტისთვის ბანკიდან კრედიტი გამოვიტანე. ჩემი ხელფასით სახლისთვის საჭირო ნივთებს ვყიდულობ, საკუთარი თავისთვის ვეღარაფერს ვიმეტებ. დიდი ხანია, რაც ტანსაცმელი და ფეხსაცმელი არ შემიძენია. რემონტის პროცესი დიდი ნარკოტიკი გამოდგა, ძალიან ჩამითრია. სახლს რაღაც დეტალები აკლია, ბოლომდე რომ მოვრჩები, თქვენც დაგპატიჟებთ. ყველა მეუბნება, რომ ჩემი სახლი მე მგავს.
ქეთი დინოშვილი