აჩი ფურცელაძე თბილისში საცოლესთან, გაია ხაჩიძესთან, ერთად ჩამოვიდა

მომღერალ აჩი ფურცელაძის თბილისური კარიერა ციხიდან გამოსვლის შემდეგ მთლიანად განადგურებული იყო – აღარც რადიო, აღარც კონცერტების წაყვანა და არანაირი პერსპექტივა ქართულ შოუბიზნესში. ამიტომ 6 წლის წინ მოსკოვისკენ აიღო გეზი და იქ ცხოვრება ნულიდან დაიწყო. ამ ხნის განმავლობაში რუსეთის დედაქალაქში თავისი მუსიკით ცდილობდა თავის გატანას. გასული წლის ბოლოს კი მუსიკალურ პროექტ "ვოისში" (მისი ქართული ანალოგია "ახალი ხმა") წარმატებულად გამოვიდა და მომღერალ ლეონიდ აგუტინის ფავორიტი გახდა. სულ მალე კი პოპულარული რუსული დუეტის, "ნე პარას" სოლისტ მამაკაცს ჩაანაცვლებს. ასე გადაინაცვლა ქართველმა აჩიმ პატარა რუსული სცენიდან დიდ სცენაზე.
ამ დღეებში მომღერალი საქართველოში დედის დაბადების დღისთვის ჩამოვიდა, დიდი ხნის სურვილი აუხდინა და ბრილიანტის ბეჭედი აჩუქა. მანამდე კი მათ დედაშვილობაზე პოპულარულმა რუსულმა ტოქ შოუმ "პუსტ გოვორიატ" ("დე ილაპარაკონ") გააკეთა გადაცემა. წამყვანმა ანდრეი მალახოვმა აჩის დედა მოსკოვში სიურპრიზად ჩაუყვანა და საზოგადოებას დახმარებისკენ მოუწოდა. მომღერლის დედას რთული ოპერაციის გაკეთება ესაჭიროება.
აჩიმ დედას დაბადების დღეზე კიდევ ერთი სიურპრიზი მოუწყო. თბილისში საცოლით ჩამოვიდა. როგორც "სარკესთან" აცხადებს, მისი ცხოვრების ორი უძვირფასესი ადამიანი – დედა და საცოლე – ერთმანეთს კარგად უგებენ.
– აჩი, როგორ ვიცი, საქართველოში შემოქმედებითად ისევ გააქტიურდით. რა სიახლეებია?
– 27 იანვარს დედაჩემის დაბადების დღე იყო. ყოველ წელს ამ დღეს მის გვერდით ვატარებ. ამ ყველაფერს დაემთხვა ისიც, რომ 26 იანვარს ერთ–ერთ კლუბში ჩემი კონცერტი გაიმართა. მეორე დღეს კი ჯგუფ "ვინდთან" და გიგა აგლაძესთან ერთად ჩავწერე სიმღერა "ლამაზი დღე", რომელსაც 12 წლის წინ ვასრულებდით. კლიპის გადაღებებიც დავიწყეთ.
– დედის, ქალბატონი ხატულას დაბადების დღე როგორ აღნიშნეთ?
– მოსკოვიდან დედას ბევრი მისთვის საჭირო ნივთი ჩამოვუტანე. ბუნებრივია, ჩემს კონცერტს ისიც ესწრებოდა და, როგორც კი საათის ისრები 12–ს გადასცდა, სიმღერით მივულოცე, მოვეფერე. დილა რომ გათენდა, ბრილიანტისთვლებიანი ოქროს ბეჭედი ვაჩუქე. ძალიან გაუხარდა, მისი ბედნიერი სახე არასოდეს დამავიწყდება. მისთვის ამ პატარა ოცნების შესრულებაც შევძელი. ჩვენი ოჯახი ღარიბულად ცხოვრობდა, ძვირფასი სამკაულები არ გვქონდა. იმ დროს, როცა დედას უნდოდა, რომ სამკაულები ჰქონოდა, ამის საშუალება არ იყო. მინდა, რომ ოცნებები შეძლებისდაგვარად ავუხდინო.
– თქვენს კონცერტზე რა ხდებოდა, როგორ შეგხვდნენ კოლეგები, მსმენელები?
– ქართველი მსმენელი კარგად შემხვდა. რამდენიმე მეგობარი დაესწრო კონცერტს – სალომე გოგიაშვილი, ნინი ბადურაშვილი, ნოე სულაბერიძე, გიორგი მამაცაშვილი. ჩემი უბნელები, ძველი ნაცნობები, მეგობრები იყვნენ კლუბში. ყველას ნახვა გამიხარდა.
– არ აპირებთ, რომ სამუდამოდ დაუბრუნდეთ საქართველოს?
– მოსკოვური ცხოვრება ძალიან კარგად მიდის. პროექტ "ვოისის" შემდეგ ბევრი შემოთავაზება მაქვს – კონცერტები, მოწვევები. ჩემი შემოსავალიც საგრძნობლად გაიზარდა. ასევე მივიღე შემოთავაზება რუსული ჯგუფიდან "ნე პარა". ამ ჯგუფში ბიჭი და გოგო მღეროდნენ, ბიჭმა სოლო კარიერა წამოიწყო, მენეჯერებმა ჩემზე გააკეთეს არჩევანი და მის ნაცვლად მიმიწვიეს. ახლა მოლაპარაკებები მიმდინარეობს.
– პროექტ "ვოისში" როგორ აღმოჩნდით?
– ტელევიზიით გავიდა რეკლამა, რომ ეს პროექტი იწყებოდა და მეგობრების დაჟინებული თხოვნით მივიღე მონაწილეობა. მათ გამომიგზავნეს ანკეტა, შევავსე და რამდენიმე დღეში დამირეკეს. ჟიურიმ ჩემი ვიდეოები ნახა, გასაუბრებაზე მივედი და სამი ტური გავიარე. ეს არ იყო მარტივი. ყველაფერმა ძალიან კარგად ჩაიარა, იყო იუმორისტული ჩართვებიც, აქცენტი ჩემს ქართველობაზეც გავაკეთე. ამ ყველაფერმა დიდი რეზონანსი გამოიწვია. მიუხედავად იმისა, რომ 22 წელია სცენაზე ვდგავარ, "ვოისი" ჩემი პირველი მოსკოვური გამოწვევა იყო. ვფიქრობ, რომ ეს გამოცდაც ნორმალურად ჩავაბარე.
– რატომ ჩაიქნიეთ ხელი საქართველოში სიმღერაზე?
– აქედან 2006 წელს წავედი. ეს ის პერიოდი იყო, როც ჩვენს ქვეყანაში არაფერი ტარდებოდა. ჩემი სახელი და გვარი, რომელიც ყველამ იცოდა, უცბათ გაქრა. მანამდე რადიოში ვმუშაობდი, სხვადასხვა ღონისძიება მიმყავდა, მერე კი ერთდროულად დამთავრდა ყველაფერი, შემოსავლის ყველანაირი წყარო გამიქრა. მართალია, პატარა ოჯახი მყავს (დედა, მე და ძაღლი), მაგრამ მასაც ხომ სჭირდებოდა რჩენა? ერთადერთი გამოსავალი მოსკოვში წასვლა იყო. ამ წლებმა ტყუილად არ ჩაიარა. დედას ვეხმარები, ის კი ჩემს მეგობრებს ეხმარება. გამოდის, რომ ჩემი იქ ყოფნით რამდენიმე ოჯახის გვერდით დგომა შევძელი.
– ქალბატონ ხატულას განსაკუთრებული როლი უჭირავს თქვენს ცხოვრებაში. ანდრეი მალახოვის ტოქ შოუში თქვენს დედაშვილობაზე დიდი აქცენტი გაკეთდა. სიურპრიზიც კი მოგიწყვეს და დედა მოსკოვში ჩამოგიყვანეს. გვიამბეთ ამ ყველაფრის შესახებ, რა და როგორ მოხდა.
– ეს ჩემთვის მართლაც დიდი სიურპრიზი იყო. პროექტში რადგან დედაჩემზე დაიწყეს ლაპარაკი, მივხვდი, რომ მას ჩემ გვერდით ვნახავდი. ხატულა შარშან მყავდა მოსკოვში, მას სახეზე პლასტიკური ოპერაცია სჭირდება, მაგრამ არც ერთმა რუსულმა კლინიკამ მოჰკიდა ხელი. პლასტიკური ოპერაციის გაკეთება თითქოს ადვილად ჟღერს, მაგრამ თურმე რთული ყოფილა. ანდრეი მალახოვმა დედა მიიწვია და ძალიან გულისამაჩუყებელი ინტერვიუ გამოუვიდათ. ხატულა იმისთვის ჩამოფრინდა, რომ ამ გადაცემაში მიეღო მონაწილეობა. მადლობა მათ! მე და დედამ არაჩვეულებრივი 5 დღე გავატარეთ ერთად.
– პლასტიკური ოპერაციის გაკეთებაც ხომ არ მოხერხდა?
– არა. მისი ჩამოსვლის მიზეზი ოპერაციის გაკეთება არ იყო.
– დედას რა დიაგნოზი აქვს?
– 5 წლის წინ თავიდან სიმსივნე ამოაცალეს. ამის შედეგად ხატულას სახის კუნთი დაუზიანდა და სახეზე მიმიკა აღარ აქვს, კუნთი არ მუშაობს. მართალია, ოპერაციის შემდეგ ნერვი არ აღუდგება, მაგრამ სახის მარცხენა ნაწილი მარჯვენის სიმეტრიული იქნება.
– კარგი შვილი ხართ, ამას ხშირად აღნიშნავს ქალბატონი ხატულა.
– ხატულამ მალახოვთან ინტერვიუში თქვა, რომ მისი ოცნება იყო ვარდისფერი საძინებელი ოთახი, რომლის რეალობად ქცევაც შევძელი. ამდენი წლის განმავლობაში დედას ფულს რომ ვუგზავნიდი, ის დანაზოგს აკეთებდა და შიგადაშიგ სახლსაც ალამაზებდა. ყოველ ჩამოსვლაზე ახალ–ახალი ნივთი მხვდება. ინტერიერს სამ თვეში ერთხელ ცვლის. რა ვიცი, ჩემებურად ვცდილობ, მისი გული გავახარო.
– თქვენი ცხოვრების სხვადასხვა პერიოდებში თქვენ გვერდით სხვადასხვა ქალი იყო, დაქორწინებულიც იყავით. ახლა რა ხდება პირადში?
– ის ადამიანი, ვისთან ერთადაც ოჯახს შევქმნი, ახლა ჩემ გვერდით არის. საქართველოში ერთად ჩამოვფრინდით. ქართველია, აქ ბევრი ნათესავი ჰყავს. უახლოეს ხანში დავქორწინდები.
– მის ვინაობას არ გაგვიმხელთ?
– ვისი ვინაობაც გაგიმხილეთ, ურთიერთობა არც ერთთან ამეწყო... კარგი, გეტყვით. ჩემი რჩეული გაია ხაჩიძეა, პიარის სპეციალისტი, კარგი განათლება აქვს მიღებული. მართალია, არც მღერის და არც ცეკვავს, მაგრამ ჩვენი ხასიათები ერთმანეთს ძალიან ჰგავს. გაია მედიაგამომცემლობაში მუშაობდა. მოსკოვის "პირველი არხის" ძალიან ბევრი გადაცემის წამყვანი და სტუმარი ჩაუცმელი დარჩებოდა, გაია რომ არ აგვარებდეს ამ საქმეს.

– ეს ის არის, ვისაც ელოდით ამდენი ხანი?
– ეს ცოტა ხმამაღალი ნათქვამია, მანამდე ბევრი გოგონა იყო ჩემს ცხოვრებაში და ყველა მათგანს დიდ მადლობას ვუხდი. მათთან ერთად ძალიან ბედნიერი ვიყავი, თუმცა გაია არის ის, ვინც მინდა, რომ ჩემ გვერდით იყოს. მას არაჩვეულებრივი გარეგნობა და მდიდარი შინაგანი სამყარო აქვს. იდეალურთან მიახლოებული ქალია. დედაჩემს გაია ძალიან უყვარს, რადგან თბილი, საყვარელი, ერთგული, ყურადღებიანია და კარგი ოჯახის შვილია. მოკლედ, ყველა ის თვისება, რაც კარგ სარძლოს უნდა ჰქონდეს, გაიას აქვს. დედა ბედნიერია, რომ ჩვენ ერთად ვართ.
ლანა კიკნაძე