ინგა გრიგოლია - გაძლიერებული ვბრუნდები ჟურნალისტიკაში

ჟურნალისტი ინგა გრიგოლია მარტის ბოლოდან საზოგადოებრივ მაუწყებელზე კვირაში ორჯერ პოლიტიკურ თოქშოუს წაიყვანს. გადაწყვეტილება ამასთან დაკავშირებით, მიღებულია.

შესაბამისი კონტრაქტი მაუწყებელსა და ინგა გრიგოლიას შორის დღეს ოფიციალურად გაფორმდა. როგორი იქნება ინგას დაბრუნება ეკრანზე და რა სიახლეს სთავაზობს ის მონატრებულ ქართველ მაყურებელს, ამაზე გრიგოლია ექსკლუზიურად Prime Time News-თან საუბრობს.

ინგა გრიგოლია (ჟურნალისტი): "ჩემი გადაცემა საზოგადოებრივ მაუწყებელზე, ეთერში გავა მარტის ბოლოდან, ეხლა ტენდერი უნდა გამოცხადდეს სტუდიის მოწყობაზე. გადაცემა იქნება კვირაში ორჯერ, სავარაუდოდ ორი პირდაპირი ეთერით. ერთი იქნება კვირის შუა დღე და ერთი იქნება კვირა საღამოს 10 საათზე. ძალიან ბევრი სტუმრის, რიგითი მაყურებლების, საზოგადოებისა და პოლიტიკოსების მონაწილეობით. ვფიქრობთ, რომ ეს გამოვა საინტერესო. საზოგადოებრივი მაუწყებელი დღეს იძლევა იმის საშუალებას, მართლაც ყველა ფენის, ყველა წრის მოსაზრება იყოს გათვალისწინებული. ყველა გადაცემაში ვაპირებ მონაწილეობა მიიღოს რეგიონებმა, არ შეიძლება გადაცემა იყოს მხოლოდ თბილისური და თბილისში მაცხოვრებელი ადამიანების მოსაზრებები გაჟღერდეს. საზოგადოებრივი მაუწყებელი მოიცავს მთელ საქართველოს, ჩვენ ვაპირებთ, რომ მთელი საქართველო, ყველა წერტილი მოვიცვათ და ყველა სოფელში ადამიანებს მივცეთ იმის საშუალება, რომ ჩაერთონ იმ დიდ პოლიტიკურ დებატებში, რომლის განხორციელებასაც ვგეგმავთ.

- რამდენად დაგეხმარებათ პოლიტიკაში ყოფნის დროს მიღებული გამოცდილება ამ გადაცემაზე მუშაობის პროცესში?

- მე დღეს უფრო გაძლიერებული ვბრუნდები ჟურნალისტიკაში, გამომდინარე იქიდან, რომ საკრებულოში გავატარე სრული ორი წელი. ძალიან ბევრი რამ სულ სხვანაირად დავინახე, სულ სხვა რაღაც ვისწავლე და შევიძინე. მაგალითად, ის, რომ გადაცემები, რომელსაც მე მანამდე ვაკეთებდი, როგორ აისახება ადამიანებზე, ჩვენს კონკრეტულ თანამოქალაქეებზე და რამდენად მნიშვნელოვანია, ამ ხალხმა თვითონვე მიიღოს დებატებში მონაწილეობა. მინდა, რომ გადაცემა, რომელსაც გავაკეთებთ, რეალურად ასახავდეს იმას, როგორ გავლენას ახდენს პოლიტიკური და პოლიტიკოსების გადაწყვეტილებები ხალხზე. მე ბევრი რამე ვისწავლე საკრებულოში, ვიყავი ფრაქციის თავმჯდომარე, სოციალური და ჯანდაცვის კომისიის წევრი და შესაბამისად, ეს თემები გახდა ჩემთვის ძალიან საინტერესო. მივხვდი, რომ ქვეყანაში ჩვენი მოსახლეობის 70%-ს აქვს მძიმედ საქმე, ვერ ზრუნავს თავის ოჯახის წევრებზე, საკუთარი თავის ჯანდაცვაზე, ოჯახის გამოკვებაზე და ა.შ. ეს იქნება, ალბათ, ჩემი გადაცემის მთავარი თემები, ანუ მთელი ის გადაწყვეტილებები, რომელიც ქვეყანაში მიიღება, როგორ აისახება ხალხზე. მე უამრავ ადამიანს შევხვდი ორი წლის განმავლობაში, რომელსაც სახლ-კარი ჰქონდა გაყიდული იმიტომ, რომ საკუთარი შვილის ოპერაციისთვის საჭირო თანხა მოეგროვებინა, ბანკისგან ჰქონდა დაყადაღებული ქონება, არ ჰქონდათ შვილებისთვის ფეხსაცმლის შესაძენი ფული და ა.შ. ჩემთვის ამ გადაცემებში პრიორიტეტული იქნება სწორედ ეს ხალხი".

ნანა შონია