თიკა ფაცაცია: "ახლა მიკვირს, თმის გადაპარსვის გამო ქმარმა რომ არაფერი მითხრა"

ყოფილი მოდელისა და ახლა უკვე ტელესახე თიკა ფაცაციასთვის გარეგნობა სავიზიტო ბარათია და ამიტომ მასზე საგანგებოდ ზრუნავს და უფრთხილდება. სასარგებლო რეცეპტებს როგორც კი ყურს ან თვალს მოჰკრავს, საგულდაგულოდ იწერს რვეულში და შემდეგ პრაქტიკაში ცდის. რადგან ემოციების გამოხატვისას მიმიკებს აქტიურად იყენებს, იცის, რომ მალე დასჭირდება გარკვეული აპრობირებული მეთოდების გამოყენება ნაოჭების ასაცილებლად, ჯერჯერობით კი მისი გარეგნობა მხოლოდ სრულყოფილი ძილის, ჯანსაღი კვებისა და ვარჯიშის შედეგია.
თიკა ექსპერიმენტებს ყოველთვის თამამად მიმართავდა, განსაკუთრებით ვარცხნილობასა და თმის ფერზე. ხალხს ის ახსოვს ქერა თმით, შავი თმით და ნახევრად გადაპარსული თმითაც კი. ახლა მის იმიჯში ავანგარდმა იკლო და ელეგენტურობამ იმატა. ბოლო დროსაც შეიცვალა ფერი და მოდურ ღია წაბლისფერზე გადავიდა. ასეთმა ცვლილებებმა თმა რომ არ დაუზიანოს, სპეციალურ პროცედურებს სისტემატურად იტარებს.
– თიკა, ეკრანზე ყოველთვის ლამაზად, მოწესრიგებულად და მოდურად გამოიყურებით. საინტერესოა სახლშიც თუ ახერხებთ იმავეს.
– იმის გამო, რომ საზოგადოების ყურადღების ცენტრში ხშირად ვექცევი, სულ მიწევს გარეგნობაზე ზრუნვა. სახლში კი მაინცდამაინც კარგი დასანახი არ ვარ. ამიტომ სილამაზის სალონში ხშირად დავდივარ. ვარცხნილობასაც ხშირად სალონში ვიკეთებ და ისე მივდივარ სამსახურში.
– ისეთი სამუშაო გაქვთ, ალბათ ყოველდღე გიწევთ ინტენსიური მაკიაჟის გამოყენება.
– კი და ეს ჩემთვის მტკივნეული თემაა. როგორც კი ეთერი სრულდება, მაკიაჟს ვიშორებ, რომ კანმა ისუნთქოს. ხაზს ვუსვამ, რომ ქალბატონი თუნდაც მინიმალური მაკიაჟით, ბევრად სასიამოვნო დასანახია, ვიდრე უმაკიაჟოდ, მაგრამ დღის და საღამოს მაკიაჟის განსხვავება უნდა ვიცოდეთ. ხშირად ეს ორი რამ ერთმანეთში ერევათ.
– იქნებ თქვენ დაეხმაროთ რჩევით, როგორი მაკიაჟი გაიკეთონ დღისით და საღამოს.
– დღის მაკიაჟისთვის კანის საფარი, ე.წ. ტონალური კრემი, უნდა იყოს ძალიან თხელი, თითქმის არ უნდა ჩანდეს. თვალები მინიმალურად უნდა იყოს შეღებილი. ძალიან ცოტა ტუშის გამოყენებაც შეიძლება. თვალებზე მუქი, შავი, ინტენსიური ჩრდილები მხოლოდ საღამოს მაკიაჟს უხდება. დღის განმავლობაში ზოგი ძალიან იხდენს მკვეთრი ფერის ტუჩსაცხს, ოღონდ ამ შემთხვევაში თვალები არ უნდა იყოს შეღებილი.
– გარეგნულ იმიჯს პერიოდულად იცვლით. ეს ამართლებს, ყოველთვის გიწონებენ ცვლილებას გარშემომყოფები?
– იმიჯს სულ ვიცვლი. ასეთ დროს ბევრნაირ აზრს ვისმენ ხოლმე, ზოგს მოსწონს, ზოგს – არა. ბუნებრივია, ყველას აზრს ვერ გაითვალისწინებ. თმაზე ექსპერიმენტების ჩატარება ჩემთვის პრობლემა არაა. ამ ბოლო დროს თმის ფერი შევიცვალე და ეს დიდ ინტერესს იწვევს. პროფესიონალები ზრუნავენ ჩემი თმის ფერზე და მათზე ვარ მინდობილი.
– ხშირი ღებვა, საშრობით ვარცხნა თმას არ გიზიანებთ?
– იმის გამო, რომ სულ მიწევს თმაზე ლაქის გაკეთება თუ საშრობის გამოყენება, თმის სპა პროცედურებს ვიყენებ, თუმცა ამ მეთოდს იშვიათად მივმართავ.
– ინტერვიუებში დედას ხშირად ახსენებთ. ალბათ ის არის თქვენი მთავარი მრჩეველი.
– კი, ნამდვილად ასეა. დედა რეალობასთან მაახლოებს. ვფიქრობ, რომ ყველას არ უნდა სიმართლის თქმა და ამიტომ სხვების კომპლიმენტების მერე დედის კრიტიკულ შენიშვნას თუ ვიღებ გარეგნობასთან დაკავშირებით, მას ვუჯერებ. ობიექტურად აღიქვამს სხვადასხვა მოვლენებს ჩემს ცხოვრებაში.
– მაგალითად, რა დაგიწუნათ დედამ?
– მაინცდამაინც არ არის აღფრთოვანებული ჩემი "ჩოლკით", მაგრამ ჯერჯერობით ვატარებ. ერთი პერიოდი ნახევარი თავი გადაპარსული მქონდა. ახლა ამ ვარცხნილობას არაერთი გოგონა ატარებს. მე კი ეს 8 წლის წინ გავაკეთე. ახლა გაკვირვებული ვარ, ამ ვარცხნილობის გამო როგორ არაფერი მითხრეს არც მშობლებმა და არც მეუღლემ. უმტკივნეულოდ მიიღეს. დღევანდელი გადასახედიდან ჩემი იმდროინდელი იმიჯი ძალიან არ მომწონს, მაგრამ მაშინ ვირგებდი. ალბათ ასაკიც მოქმედებს. ახლა ნამდვილად არ გავიკეთებდი.
– თმისა და კანის მოვლისთვის შინაური რეცეპტები გამოგიყენებიათ?
– კი და დღემდე ასე ვიქცევი. შინაურ რეცეპტებს პატარა რვეულში ვიწერ. საუკეთესო ვერსიას საკუთარ თავზე ვცდი. თმაზე მაიონეზის ნიღაბი გამიკეთებია. თმის მოვლის კოქტეილები არჩილ სოლოღაშვილმა მასწავლა. ერთ–ერთი რეცეპტი ასეთია: კვერცხის გული, ერთი სუფრის კოვზი ზეითუნის ზეთი, ერთი ჭიქა კონიაკი და ლიმონის რამდენიმე წვეთი ერთმანეთში უნდა შეურიოთ და თმაში შეიზილოთ. დაახლოებით 40 წუთი უნდა გაიჩეროთ. თმას ბზინვარებას მატებს. თავდაპირველად ამას ყოველდღიურად ვაკეთებდი, შემდეგ კი – თვეში ორჯერ. ასეთი რეცეპტების გამოყენებისთვის საუკეთესო დრო ზაფხულია, როცა ისვენებ და თავისუფალი ხარ. სახის კანის ნიღბებშიც კვერცხის გული ფიგურირებს, კანს ჭიმავს და მომწონს. არაჟნის ნიღაბიც კარგია. ესთეტიკურ ცენტრებშიც დავდივარ და კანის ნიღბებს იქაც მიკეთებენ.
– რამდენად მისაღებია თქვენთვის ბოტოქსი ან ამგვარი საშუალებები?
– კარგია, უბრალოდ ყველაფერში ზომიერებაა საჭირო. არ მომწონს, როცა ქალბატონები ზომაზე მეტად მიმართავენ პლასტიკურ ქირურგიას და ბუნებრიობას კარგავენ. ადრე ქალები ასე ძალიან არ განიცდიდნენ დაბერებას, როგორც დღეს. ალბათ იმიტომ, რომ თავის მოვლის ასეთი საშუალებები არ იყო. ჩემთვის ყველა მეთოდი მისაღებია, რასაც შედეგი მოაქვს. საკუთარ თავში უკვე რაღაცეები არ მომწონს და ეს ასაკის მატებასთან ერთად ბუნებრივია. თვალის თუ ტუჩის გარშემო უსიამოვნო სიახლეები შეინიშნება ჩემს სახეზე, მაგრამ ჯერჯერობით ყველაზე კარგი მეთოდის ძიებაში ვარ და ამიტომ არ ვიცი, მათ წინააღმდეგ რას გამოვიყენებ. ძალიან ემოციური ვარ და ამის გამოსახატავად ყველა კუნთს ვიყენებ, ამიტომ ჩემი მდგომარეობა კიდევ უფრო რთულია. გარდამავალ პერიოდში, ანუ 30 წლის ზემოთ, მოვძებნი საუკეთესო საშუალებას, რასაც გამოვიყენებ.
– ცხოვრების წესსაც დიდი მნიშვნელობა აქვს გარეგნობისთვის. თქვენ რა რეჟიმით ცხოვრობთ?
– ადრე ვიძინებ. ღამის ათ საათზე უკვე მძინავს და ამ დროს ტელეფონი თუ მირეკავს, მტერი მგონია. ამას იმიტომ კი არ ვაკეთებ, რომ სოფი ლორენმა დაგვიბარა, არამედ იმიტომ, რომ ბავშვი ამ დროისთვის იძინებს და ადრე დგება, მეც მის რეჟიმზე ვარ გადართული. დილის 7 საათზე ვიღვიძებ. სულაც არ მივტირი ღამის ცხოვრებას. მგონია, რომ მეტი ძილით ჩემს გარეგნობას კარგ საქმეს ვუკეთებ.
– თუ სადმე გეპატიჟებიან, უარს ამბობთ?
– გამონაკლისი შემთხვევების გარდა, ღამით ვერსად მნახავთ, რადგან მძინავს. კვებასაც ყურადღებას ვაქცევ. ბაბუაჩემის გამოთქმაა, რომ ჯანმრთელობა და სილამაზე თეფშიდან იწყება. ვერიდები ღამე ჭამას და ცხიმიან კერძებს. კვებიდან ძილამდე 3 საათი მაინც უნდა იყოს გასული. დილით ვცდილობ, შვრიის ფაფა ან მისი მსგავსი რამ მივიღო. კარგია ბევრი წყლის დალევა, მაგრამ, სამწუხაროდ, ვერ ვახერხებ, სულ მავიწყდება.
ინტენსიურად ვვარჯიშობ. ვფიქრობ, რომ ერთადერთი, რასაც საკუთარი გარეგნობისა და ჯანმრთელობისთვის ვაკეთებ, არის ვარჯიში. სახლშიც მაქვს ტრენაჟორები. კვირაში სამი დღე მაინც ვვარჯიშობ. ბავშვს ხშირად ვასეირნებ კუს ტბაზე და ესეც ფიზიკურ აქტივობაში ითვლება. პატივს ვცემ ყველა იმ ადამიანს, ვინც ვარჯიშით საკუთარ სხეულს უვლის. როცა სხეული მოვლილი გაქვს, უფრო თავდაჯერებული ხდები.
– მავნე ჩვევები არ გაქვთ?
– პრინციპში, მავნე ჩვევები არ მაქვს. ყავას დღეში ორ ჭიქაზე მეტს არ ვსვამ. ბავშვის გამო კომპიუტერთან ბევრ დროს ვეღარ ვატარებ, არ მინდა, რომ მიეჩვიოს.
– დიეტას თუ აქვს თქვენს ცხოვრებაში ადგილი?
– სიმართლე გითხრათ, კვებაში თავს არ ვიზღუდავ. ჩემს ცხოვრებაში იყო პერიოდი, როცა სულ დიეტაზე ვიყავი და მაშინ ყველაზე მეტი წონა მქონდა. მერე უბრალოდ კვება დავარეგულირე. ახლა, ინტერვიუს ჩაწერის მერე, წესით, ერთი ნაჭერი ტორტი უნდა მივირთვა, თუ არ გადავიფიქრე. ვცდილობ, ბევრი ბოსტნეული მივიღო. მირჩევნია, ფრინველის ხორცი და თევზი ვჭამო, ვიდრე ხბოს ან ღორის ხორცი. უცნაური რაღაც მოხდა – რაც დიეტურია და სწორი კვებისთვისაა განკუთვნილი, ის საკვები შემიყვარდა. გამონაკლის შემთხვევებში ხაჭაპურსაც გეახლებით, მაგრამ სახლში არ ვამზადებ, რომ მერე ჩემთვის სატყუარა არ გახდეს.
– ორსულობის შემდეგ ქალისთვის წონის დაბრუნება დიდი პრობლემა ხდება, რამაც თქვენ, ეტყობა, საბედნიეროდ, გვერდი აგიარათ.
– გამიგია, რომ ამბობენ, ბავშვს საკვები სჭირდებაო და ამიტომ ღამის 2 საათზე ნაყრდებიან. არადა თვითონ ფეხმძიმესთვის არის რთული ზედმეტი წონა, ბავშვის გაჩენის შემდეგ კი ფორმის დაბრუნება უძნელდებათ. მე ორივე ორსულობისას ერთნაირად მოვიმატე – 14 კილო. ეს არც ბევრია და არც ცოტა, ნორმაა. ორსულობის დროსაც ვაკონტროლებდი წონას, ბევრს დავდიოდი ფეხით და ა.შ. ამას იმიტომ ვაკეთებდი, რომ მერე პრობლემა არ მქონოდა. მოხარშული ხორცი თუ ჭარხალი არავის გაასუქებს და ნაყოფის განვითარებასაც ხელს შეუწყობს, რასაც ნამდვილად ვერ ვიტყვი ხაჭაპურებსა და ხინკლებზე.
– რამდენად ხართ დამოკიდებული სარკეზე?
– სარკის მიმართ ჩვეულებრივი დამოკიდებულება მაქვს, როცა მჭირდება, მაშინ ვიხედები. მანქანის სარკეები უკან და გვერდით მომავალი მანქანების დასანახად მაქვს გასწორებული. სარკესთან არც შეძახილები მახასიათებს, მაგრამ ამბობენ, რომ რაც გინდა, დაინახო, ის უნდა თქვა სარკესთან, მაგალითად, როგორი კარგი კანი გაქვს და ა.შ. ზოგჯერ ხუმრობით ესეც გამიკეთებია. არის ამაში რაღაც საიდუმლო.

– გარეგნობა განწყობაზე მოქმედებს?
– თავიდან ბოლომდე მოწესრიგებული უნდა ვიყო. ყველაფერი მოქმედებს ხასიათზე – თმა, ფრჩხილები და ა.შ.
– როგორ ფიქრობთ, დიდი თანხაა საჭირო თავის მოსავლელად?
– მთავარია სურვილი და შეიძლება ყავის ნალექით მოუარო ხელებს. ვაფასებ იმ ქალებს, რომლებიც დიასახლისები არიან, ადგომისთანავე ჯერ თავს იწესრიგებენ და საქმეს შემდეგ შეუდგებიან.