ლევან ჯიბღაშვილს 17 ათას დოლარიანი საათი უკეთია

მსახიობ ლევან ჯიბღაშვილს ტანსაცმელი ისეთი მოვლილ–მოწესრიგებული აქვს, რომ ნებისმიერ ქალს შეშურდება. "სარკესთან" რუბრიკა "სამოსი" ჩასაწერად თავისი მინიგარდერობით მოვიდა – საკიდებზე ჩამოკიდებული შარვლები, კოხტად დაკეცილი ჯინსები, ყუთებში ლამაზად ჩაწყობილი ფეხსაცმელები... როგორც უკვე მიხვდით, ჩაცმა–დახურვის საკითხი მისთვის ძალიან მნიშვნელოვანია. გოგოსაც სამოსით აფასებს. მოკლედ, მშვენიერი სქესის წარმომადგენლებს, ვინც მისი გულის მოგებას ცდილობენ, ეს ინტერვიუ ნამდვილად წაადგებათ.
– ლევან, ფოტოების გადაღების დროს თვალში მომხვდა, თუ როგორ უხამებთ ფერებს ერთმანეთს. რა პრინციპით არჩევთ ტანსაცმელს, რომელიც იმ დღეს უნდა ჩაიცვათ?
– ფერების ერთმანეთში არევა არ მიყვარს და სულ ვცდილობ, ბევრი ფერი არ ავურიო. ვფიქრობ, რომ ჩაცმულობაში აქსესუარები და ფეხსაცმელია მთავარი. შეიძლება ერთი შარფი გაიკეთო ისეთი, რომელიც ყველაფერს შეცვლის. ფეხსაცმელი და საათები ჩემი სტიქიაა. სახლიდან გასვლამდე ჯერ სამოსს ვიცვამ და მერე ვფიქრობ, მას რომელი ფეხსაცმელი მოუხდება. ჩემს ჩაცმულობას ფეხსაცმლით ბოლო წერტილს ვუსვამ.
– თქვენს გარდერობში დაახლოებით რამდენი წყვილი ფეხსაცმელია?
– დაახლოებით 30 წყვილი ფეხსაცმელი მექნება. 1–2 წყვილი კედი მაქვს, დანარჩენი – კლასიკური და სპორტული.
– ყიდვისას ტანსაცმელს სწრაფად და მარტივად ირჩევთ?
– არა, ძალიან რთულად. ზოგადად, ჩაცმულობაში ვარ რთული. რაღაცის საყიდლად რომ მივდივარ, 7–ჯერ მაინც უნდა გავიზომო, დავფიქრდე, რას მოუხდება, რასთან ჩავიცვა... მაგალითისთვის გეტყვით, რომ ზაფხულში ძალიან მიყვარს, პერანგზე სვიტერს რომ მოვიგდებ ხოლმე. ალბათ 14 ფერის ზუსტად ერთნაირი, სამკუთხედყელიანი ზედატანი მაქვს, ოღონდ პატარა ზომებია. გამორიცხულია, ისინი ჩავიცვა. მხოლოდ იმიტომ მაქვს, რომ მხრებზე მოვიგდო.
– განწყობა როგორ აისახება თქვენს ჩაცმულობაზე?
– ყოველთვის ისე მაცვია, როგორ განწყობაზეც ვარ. დილით მზეს თუ ვხედავ, იდეალურ ხასიათზე ვდგები. აბაზანაში ღიღინ–ღიღინით შევდივარ და რომ გამოვალ, გარეთ გასასვლელ სამოსს ვიცვამ. სანამ აბაზანაში შევალ, იქამდე ვარჩევ, რას ჩავიცვამ, დავალაგებ და, რომ გამოვალ, ჯარისკაცივით უცებ გამოვეწყობი ხოლმე.
– და როცა იდეალურ ხასიათზე არ ხართ?
– თუ იდეალურ ხასიათზე არ ვარ, შეიძლება რაღაც უცებ ჩავიცვა ან სამსახურში სულაც სპორტულებით წამოვიდე.
– ადამიანი სამოსით შეგიფასებიათ?
– მაგალითად, შეხვედრებზე ყველაფერი ჩაცმულობით იწყება. ვიღაც ინვესტორი რომ ჩამოდის და, ვთქვათ, გლდანის სასტუმროში რჩება, მასზე უკვე არასერიოზულად იწყებ ფიქრს. ასევე, როდესაც შეხვედრაზე ვიღაც გემოვნებით ჩაცმული მოდის, ხვდები, რომ სერიოზული ადამიანია. მხოლოდ შეხვედრებზე კი არა, ცხოვრებაშიც ძალიან მნიშნელოვანია, როგორ გაცვია. კარგად რომ იცვამ, ბევრ კომპლიმენტს იღებ, რაც დადებით მუხტს გაძლევს, თავდაჯერებული ხდები.
– ბუნებრივია, ქალის ჩაცმულობას კიდევს უფრო მეტ ყურადღებას მიაქცევთ.
– ჩემთვის ძალიან დიდი მნიშვნელობა აქვს, ქალი როგორ იცვამს. ძალიან მრავალფეროვნად და მაგრად უნდა ეცვას, ყოველთვის სხვადასხვანაირად უნდა გამოიყურებოდეს.
– ფოტოების გადაღებისას სხვადასხვანაირი საათები გაიკეთეთ, როგორც ჩანს, ბევრი გაქვთ.
– კი, საათების კოლექცია მაქვს, ძალიან მიყვარს.
– და აუცილებელია, რომ ბრენდი იყოს?
– მაქვს საათები, რომლებიც ძალიან ძვირადღირებულია. აქედან ზოგი ჩემი შეძენილია, მაგრამ ყველაზე ძვირადღირებული საათი, რომელიც ჩემს კოლექციაშია, მაჩუქეს.
– რა თანხაა გადახდილი მასში?
– "კარტიეს" საათია, დაახლოებით 17 000 დოლარი ღირს. ასევე მაქვს სხვა ბრენდების საათები, რომლებიც 10 000, 12 000 დოლარი ღირს.
– ასეთი ძვირადღირებული საჩუქრებით ვინ გაგანებივრათ?
– მეგობრები დიდხანს მიცოცხლოს ღმერთმა! ძვირადღირებულ საათებს ყოველდღურად არ ვხმარობ. როცა შეხვედრებზე მივდივარ, მაშინ ვიკეთებ. ყოველდღიურად ნაკლებფასიან საათებს ვიყენებ, რომლებსაც ჩემს ჩაცმულობას ვუხამებ. პირველი საათი "სვოჩის" ვიყიდე, 125 ლარი გადავიხადე. ჩემს ცხოვრებაში ეს დიდი მიღწევა იყო. ის საათი რომ მეკეთა, უფრო მაგარი განცდა მქონდა, ვიდრე დღეს, როცა "კარტიე" მიკეთია. ის საათი დღესაც მაქვს. ზუსტად იგივე ემოცია მქონდა, როცა ჩემი ფულით პირველად ვიყიდე ცოტა ძვირადღირებული სუნამო, 170 ლარი გადავიხადე. იცით, როგორ ვიზოგავდი? 5 წელი ვიხმარე და ახლაც მაქვს 10 მილიგრამი შენახული. საათი სამოსთან ფერებით უნდა იყოს შეხამებული, ის ისეთ წერტილს უსვამს ჩაცმულობას, რომ გეტყვიან, ვა, რა მაგარი ფერთა გამააო.
– ბევრ ისეთ დეტალს აქცევთ ყურადღებას, რასაც მამაკაცების უმრავლესობა ვერც მოიფიქრებს.
– კი, აბა, რა! დედაჩემი მეუბნებოდა ჩემს დეიდაშვილ გოგოზე, იმის გარდერობს რომ გამოხსნი, ხელები თავზე უნდა დაიფარო, რომ ზემოდან ტანსაცმელი არ დაგეყაროსო. ჩემი კარადა რომ გამოხსნათ, ფერებით, ზომების მიხედვით ალაგია ყველაფერი. პიჯაკები, კლასიკური შარვლები აუცილებლად საკიდზე უნდა ეკიდოს. ჯინსის შარვლებს ცალკე ვკეცავ. ფეხსაცმელები, ხომ ნახეთ, როგორ მაქვს ჩაწყობილი. ძალიან მოწესრიგებული ვარ, შეხედეთ შარფებს, როგორ მილაგია დაკეცილი. მარტო ვცხოვრობ და ყველაფერს მე ვუვლი. დედაჩემმა ასე გამზარდა, წესრიგს მიმაჩვია.
– ლამაზი, მაგრამ უშნოდ ჩაცმული გოგო არ მოგეწონებოდათ?
– ქალებს ვენაცვალე! შეიძლება ძალიან მაგარ გოგოს ისე ცუდად ეცვას, რომ მისკენ გახედვა არ მოგინდება, მაგრამ ასე თუ ისე ნორმალურ გოგოს ისე გემოვნებიანად და საყვარლად ეცვას, რომ მიგიზიდოს. არ მესმის, როცა ამბობენ, არ მაინტერესებს, სხვა რას იტყვისო. გემოვნებიანად, კარგად ჩაცმა ძალიან მაგარია. თუ ჯიბეში ოქროც ჩხრიალებს და მილანში, პარიზში წახვალ და იქ იყიდი, ამას რა სჯობს!
– მაღაზიებში ფასდაკლებებს ელოდებით თუ როცა გჭირდებათ, მაშინ ყიდულობთ, ფასის მიუხედავად?
– სამოსის საყიდლად ძირითადად ფასდაკლებებზე დავდივარ და ნახევარ ფასებში ვყიდულობ. რაღაც 200 ლარი რომ ღირს, მე 50 ლარად ვიძენ. ცოტა ხნის წინ ფეხსაცმელი 50 პროცენტიან ფასდაკლებაში ვიყიდე და მეორე დღეს მესიჯი მომივიდა, 70 პროცენტიანი ფასდაკლებაა დაწყებულიო, ლამის გავგიჟდი! მოკლედ, ჭკვიანურად, მარკეტინგულად და გემოვნებიანად ვიცვამ.

ქეთი დინოშვილი