ჰიუ გრანტს მეორე შვილი შეეძინა

ცოტა ხნის წინ პრესის ვარაუდი დადასტურდა და ჰიუ გრანტმა აღიარა, რომ მეორე ბავშვის მამა გახდა. მსახიობსა და მის შეყვარებულს, ტინგლან ჰონგს ბიჭი შეეძინათ. ამის შესახებ 52 წლის გრანტმა შაბათს, ტვიტერის საკუთარ გვერდზე დაწერა: „ზოგიერთ ჟურნალისტს საპასუხოდ ვაცნობებ, რომ ჩემს ქალიშვილს ახლა უკვე ძმაც ჰყავს. მე ჩემს შვილებს ვაღმერთებ. მათ არაჩვეულებრივი დედა ჰყავთ. იმისათვის რომ ზედმეტი კითხვები არ გაჩნდეს: მამა მე გახლავართ“, - განაცხადა ჰიუმ. ბრიტანული პრესის ინფორმაციით, ბიჭუნა, რომელსაც ფელიქს ჩენგ ჰონგ გრანტი დაარქვეს, 29 დეკემბერს ლონდონის ერთ-ერთ კლინიკაში დაიბადა. მსახიობსა და მის საყვარელ ქალს, ტინგლანს უკვე ჰყავთ გოგონა ტაბიტა. იგი 2011 წელს მოევლინა ქვეყანას.