ნაომი კემპბელისა და ლედი გაგას პირადი თანაშემწეები ალაპარაკდნენ - მორიგი სკანდალი ამერიკულ შოუბიზნესში

ნაომი კემპბელის პირადმა თანაშემწემ ცნობილი მოდელის ცუდ ჩვევებზე ისაუბრა, ლედი გაგას თანაშემწე კი უკვე სასამართლომდეა მისული და სამუშაოს დამკვეთისგან სოლიდურ თანხას ელის კომპენსაციის სახით.

ამერიკულ შოუბიზნესში მორიგი სკანდალია - ლედი გაგას ყოფილმა თანაშემწემ მომღერალი სასტიკ ექსპლუატაციაში დაადანაშაულა. იმ ზედმეტი სამუშაოსთვის, რასაც ჯენიფერ ონილი ვარსკვლავთან მუშაობისას წლების განმავლობაში აკეთებდა, ახლა იგი სასამართლოს მეშვეობით 390 ათას დოლარს ითხოვს.

სასამართლოს გადაწყვეტილების მოლოდინში კი ინტერვიუებს არიგებს და ჟურნალისტებს უამბობს ლედი გაგასთან მუშაობის პერიპეტიებზე - იმაზე, თუ როგორ მუშაობდა მასთან დღე-ღამის 24 საათის განმავლობაში და სულაც არ უხდიდნენ მეტ ფულს ზედმეტი სამუშაოსთვის. როგორც ქალბატონი ჰყვება, მას არ ჰქონდა პირადი ცხოვრება, ვერ რჩებოდა მარტო და გამუდმებით ძლიერი სტრესის ქვეშ იმყოფებოდა.

ეგ კი არა, გაგა აიძულებდა, საწოლშიც კი მის გვერდით ყოფილიყო, რადგან მარტო წოლის ეშინოდა. ღამღამობით მომღერალი აღვიძებდა მოთხოვნებით, დისკი გადაებრუნებინა - თვითონ ეზარებოდა ამის გაკეთება; ან სულაც ტუალეტში წყალი ჩაერეცხა.

თანაშემწეს უნდა გაემზადებინა ვარსკვლავისთვის ჩაი, ეზრუნა მის ვარცხნილობაზე და უზრუნველეყო ჰიგიენის საშუალებებით. თავად მომღერალი უარყოფს ბრალდებებს და იმასაც ამბობს, რომ ჯენიფერი მისი საუკეთესო მეგობარი იყო და არა დამხმარე.

ჯენიფერს შეუერთდა რებეკა უაიტი, რომელიც თავის დროზე ნაომი კემპბელის თა­ნაშემწე იყო. სხვათა შორის, ორივე ქალბატონს ცნობილ ადამიანებთან მუშაობის გამოცდილება აქვს. სხვადასხვა დრ­ოს მათი კლიენტები იყვნენ ასევე კლერ დეინსი, ჯეინ რიდელი და სხვანი.

"მათთვის არ არსებობს ისეთი რამეები, როგორებიცაა ზედმეტი დრო ან შენი საკუთარი ცხოვრება, - ამბობს ჯენიფერი, - ფაქტობრივად, თქვენ ამ ადამიანებზე დაქორწინებული ხართ".

ნაომიც არ ყოფილა საჩუქარი თავისი ქვეშევრდომებისთვის.

"მსახურებს უყვიროდა, ატირებდა, - ამბობს ქალბატონი უაიტი, რომელიც ”შავ ავაზასთან" ხუთი წელი მუშაობდა, - მაგრამ მე მისი არასდროს მეშინოდა".

პირადი თანაშემწის თქმით, ის სასტუმროში ნაომიზე რამდენიმე საათით ადრე უნდა მისულიყო, რომ იქაურობა მოეწესრიგებინა - ამოელაგებინა ჩემოდნები, დაეუთოებინა სამოსი, გამოეღო სასმელი მინი-ბარიდან და შროშანის ფორმის 25 სურნელოვანი სანთელი დაეწყო ოთახებში.

"ყოველთვის უნდა ყოფილიყო ხუთი სანთელი სააბაზანოში, ათი - საძინებელში და ათიც - სასტუმრო ოთახში", - ჰყვება მოდელის ყოფილი თანაშემწე.

გარდა ამისა, სასმელს მინი-ბარიდან მოახლის ოთახში ამალვინებდა.

"მას სურდა, მსოფლიოსთვის დაემტკიცებინა, რომ არ აქვს ლოთობის პრობლემა. ყველა სასტუმროში, სადაც ვიყავით, სასმლის ბოთლები ჩემთან გადამქონდა, რომ მენეჯერებსა და დამლაგებლებს ვერც კი ეეჭვათ, როგორ უყვარს ნაომის სმა. საღამოს შემოდიოდა ჩემთან ნომერში, დაიდგამდა ბოთლს და თვრებოდა.

ჩემი სამუშაო იყო კიდევ ის, რომ მის საუკეთესო მეგობრად ვქცეულიყავი. ვუკითხავდი ელექტრონულ ფოსტას და მისი ყველა კონტაქტის კურსში ვიყავი".

საერთო ჯამში, ორივე ადამიანი ამტკიცებს, რომ ვარსკვლავებთან ცხოვრება ჯოჯოხეთს უფრო ჰგავს, ვიდრე სამოთხეს.

"თითქოს ამ ადამიანებს ყველაფერი აქვთ, რისი წარმოდგენაც კი შეიძლება: ფული, პოპულარობა, მეგობრები, მაგრამ ბედნიერები არ არიან. პოპულარობა ადამიანს ძალიან მარტოსულსა და იზოლირებულს ხდის", - ამბობს ჯენიფერ უაიტი.

ჟურნალი ”რეიტინგი”