სიყვარული და კოკაინი

სიყვარული _ კარგია თუ ცუდი? ალბათ, მაინც კარგი, რადგან ადამიანი მისკენ ილტვის და ცდილობს, ეიფორიულ საბურველში გაეხვიოს. მაინც რანაირია შეყვარებული ადამიანი? როგორც სპეციალისტები ამბობენ, სიყვარულის მდგომარეობაში მყოფი ინდივიდი მოუსვენარია, დაძაბული, დაბნეული, ხშირად ეჭვიანიც; გამუდმებით ფიქრობს სატრფოზე და თავისი თავი ავიწყდება. შეყვარებულობის პირველ თვეებში სასურველთან შეხება ჟრუანტელს იწვევს მთელ ტანში, ხან დენსაც ირტყმევინება, გააჩნია სიყვარულის ხარისხს. რაც ყველაზე მთავარია, როცა ვინმე გიყვარს, შენს ტვინში მთელი "რევოლუციაა" და ის ორგანიზმში კოკაინისმაგვარ ნივთიერებას გამოყოფს. სიყვარული ხან მოდის, ხან მიდის. ადამიანი სხვადასხვა ეტაპზე სხვადასხვანაირად არის შეყვარებული ხან ერთ პარტნიორზე, ხანაც იცვლის მას. როცა არ ხარ შეყვარებული, თავისუფლად ცხოვრობ, მაგრამ რაღაც გაკლია. ეს მძაფრი შეგრძნება და ერთგვარი მუხტია, რომელიც სტიმულს გაძლევს. ასე რომ, აირჩიეთ, რა გინდათ _ იყოთ შეყვარებული, თუ იცხოვროთ თქვენს ნებაზე. რეცეპტი, ალბათ, ძნელი გამოსაწერია, რადგან გულს ვერ უბრძანებ, ის თავისი კანონებით მუშაობს და არავის და არაფერს ემორჩილება, მათ შორის არც გონებას.