სოფო გელოვანი: "დიდი სურვილი არ მაქვს, რომ ჩემმა შვილმა მომღერლობა გადაწყვიტოს"

მომღერლები - სოფო გელოვანი და ნოდიკო ტატიშვილი "ევროვიზიის" კონკურსისთვის ემზადებიან. ისინი დუეტში იმღერებენ შვედი კომპოზიტორის მიერ შექმნილ სიმღერას. ისევე, როგორც ნოდიკო, კონკურსისთვის სოფოც მთელი შემართებით ემზადება. თუმცა სოფოს სხვა საფიქრალიც აქვს - დატვირთული დღის რეჟიმის გამო, პატარა დათა დედიკოს ისე ხშირად ვეღარ ნახულობს და ამაზე ძალზე წუხს; დედიკოც ნერვიულობს, შვილს სითბოს რომ აკლებს, თუმცა თავს იმით იმშვიდებს, რომ ბებიები მასზე განსაკუთრებულად ზრუნავენ და ცდილობენ, არაფერი მოაკლონ.

- დათა სამი წლის არის და ბაღში დადის. ძალიან აქტიური ბავშვია. უყვარს ცეკვა, სიმღერა, გართობა. განსაკუთრებით ბედნიერია მაშინ, როცა ჩვენს ოჯახში სტუმარი მოდის.

- ხომ არ ამბობს, - როცა გავიზრდები, მომღერალი უნდა გავხდეო?
- დათას მამა, ბაბუა, დიდი ბაბუა - ყველანი ექიმები არიან. რა თქმა უნდა, მოხარული ვიქნები, თუ დათაც ექიმი გახდება. როცა ეკითხებიან: დათა, პროფესიით ვინ უნდა გამოხვიდეო? პასუხობს: მეც იმას გავაკეთებ, რასაც დედა აკეთებსო. როგორც ჩანს, სცენის, ეკრანზე გამოჩენის ხიბლშია. სიმართლე გითხრათ, დიდი სურვილი არ მაქვს, რომ ჩემმა შვილმა მომღერლობა გადაწყვიტოს. თუ ინტერესი და ნიჭი ექნება, იმღეროს, მაგრამ მხოლოდ ამ საქმეზე არ უნდა იყოს დამოკიდებული...

- შვილთან მკაცრი თუ ხარ?
- დათა ოჯახში ერთადერთი პატარაა, ბებია-ბაბუებისგან განებივრებული. შესაბამისად, არსებობს მისი ზედმეტად გათამამების რისკი (იცინის). ოჯახში ერთადერთი ვარ, ვინც ამ თემას ყველაზე მკაცრად უდგება. ზომიერების ფარგლებში ყველაფერი კარგია, მაგრამ ვერ ვიტან, როცა პატარები უზრდელობენ. სიმკაცრე ყველა ბავშვისთვის საჭიროა, მნიშვნელობა არ აქვს, ბიჭია თუ გოგო.

- როგორ ფიქრობ, იმ ასაკში, როცა ოჯახი შექმენი, დედობისთვის მზად იყავი?
- ოჯახი 22 წლისამ შევქმენი, დედა კი 24 წლის ასაკში გავხდი. შვილი ძალიან მინდოდა და ამისთვის მზად ვიყავი, - ანუ დედობა აბსოლუტურად გაცნობიერებული მქონდა. დათა ჩემს ცხოვრებაში ღმერთის ყველაზე დიდი საჩუქარია. მართალია, თავის დროზე მქონდა გარკვეული სახის დისკომფორტი, უძილო ღამეები, რომელიც თავისთავად, ხასიათზეც მოქმედებს, თუმცა ვერ ვიტყვი, რომ იმ პერიოდში დეპრესია დამეწყო. საერთოდ, ყოველთვის იმას ვცდილობ, რომ ცხოვრების დადებით მხარეებზე უფრო მეტად გავამახვილო ყურადღება, ვიდრე უარყოფითზე.

- მიგაჩნია თუ არა, რომ ოჯახი ხელს უშლის კარიერულ წინსვლას?
- თუ დღეს კარიერაში რაიმე სახის წინსვლა მაქვს, ეს იმიტომ, რომ ჩემს ოჯახში სიმშვიდეა. როცა გყავს კარგი მეუღლე, გარშემო არიან მზრუნველი ადამიანები, რომლებიც მშვიდ გარემოს გიქმნიან, ეს უკვე მნიშვნელოვანი წინა პირობაა წარმატებისთვის. ამ მხრივ ბავშვობიდან მიმართლებდა - ჩემი მშობლები ყველაფერს აკეთებდნენ, რომ სცენაზე ვმდგარიყავი, არაფერში შემშლოდა ხელი, ახლა კი ნოდი ყველანაირად მიდგას მხარში.

- ბავშვი, საოჯახო საქმეები, სიმღერა, ზრუნვა საკუთარ თავზე - როგორ ასწრებ ამ ყველაფერს?
- ბოლო ხანებში, "ევროვიზიასთან" დაკავშირებული მზადების გამო, სახლში იშვიათად ვარ, რასაც დათა ძალიან განიცდის. საბედნიეროდ, ჩემს შვილს ჰყავს ბებიები, რომლებიც ცდილობენ, უჩემობა არ აგრძნობინონ. თავისუფალი დრო გამომიჩნდება თუ არა, მაშინვე შინ მივდივარ. სხვათა შორის, მეგობრებთან გართობაც ოჯახურ გარემოში მიყვარს.

- როგორ ფიქრობ, რა უფრო მნიშვნელოვანია შვილის მომავლისთვის: ის, რომ დედა მუდამ გვერდით ჰყავდეს თუ ის, რომ მშობელი იყოს წარმატებული და ბავშვი ამით ამაყობდეს?
- ოჯახში ოთხი დედმამიშვილი ვიყავით - უფროსი ძმა და სამი და. დედამ თავისი პირადი ცხოვრება გვერდით გადადო, კარიერა ჩვენ შემოგვწირა. ის ამბობს, რომ ამ ყველაფერს არ ნანობს, რომ უბედნიერესია და ჩვენით ხარობს. მე მისნაირი დედა ვერ ვიქნები. ძნელია იმის განსაზღვრა, თუ რა იქნება შენი შვილის მომავლისთვის უკეთესი. ალბათ, ყველაზე მაგარი მაშინ ხარ, როცა ორ საქმეს ერთმანეთს კარგად უთავსებ; უნდა შეძლო და ზუსტად გაანაწილო დრო, ენერგია. ჯერჯერობით, ამას ვახერხებ. თუმცა, აქვე გეტყვით: არანაირი პროფესიული წარმატება არ ღირს იმის ფასად, თუ ამ ყველაფრის გამო შენი შვილის ფსიქიკას ცუდი კვალი დაემჩნევა.

- როგორი რეაქცია აქვს დათას, როცა ეკრანზე გხედავს?
- ყველანაირად გამოხატავს სიხარულს, ემოციებს. საერთოდ, თავისებური იუმორის გრძნობა აქვს. მაგალითად, ამას წინათ გვითხრა: კარგი, რა, დავიღალე, აღარ მინდა ეს სოფიკო და ნოდიკო, "ჩემი ცოლის დაქალები" მაყურებინეთო. საერთოდ, სოფიკოს არ მეძახის, მაგრამ ამ შემთხვევაში, ჩემი სახელი ნოდიკოსთან გარითმა (იცინის). აი, ასე მაშაყირებს ხოლმე...

- რა უფრო კარგად გამოგდის - დედობა თუ მომღერლობა?
- ჩამჭრელი კითხვაა... ვიცი, რომ სიმღერის გარეშე სიცოცხლე არ შემიძლია, მაგრამ შვილის გარეშე ყოფნა უფრო მეტად არ შემიძლია... თუკი დედაშვილობის გრძნობას სასწორზე დადებ, ის აუცილებლად, ნებისმიერ სიმძიმეს გადაწონის...

- შემოთავაზების შემთხვევაში, ხელს მოაწერ თუ არა ისეთ კონტრაქტს, რომლის მიხედვითაც მეორე შვილის გაჩენა გარკვეული დროის მანძილზე აგეკრძალება?
- არა! როგორი მომხიბვლელი პირობებიც უნდა შემომთავაზონ, ამჟამად ასეთ კონტრაქტს ხელს არ მოვაწერ. ადრე შეიძლება, ამაზე დავფიქრებულიყავი, მაგრამ ახლა ჩემთვის სხვა რაღაცებია მეტად ღირებული. თანაც, მეორე შვილის გაჩენა უკვე დაგეგმილი გვაქვს...

- დაბოლოს, ახალბედა დედებთან ხომ არ გაქვს რაიმე სათქმელი?
- ახალბედა დედებს, პირველ რიგში, სიმშვიდის შენარჩუნებას ვურჩევ. დედობა ქალის ცხოვრებაში სრულიად სხვა ეტაპია და შეიძლება, ბევრი რამ სანერვიულოდ მოგეჩვენოთ, მაგრამ გირჩევთ, ამ ყველაფერზე არ იფიქროთ და დატკბით თქვენი მდგომარეობით. ისე კი, ყველა ქალმა ბევრი შვილი უნდა გააჩინოს. ისევე, როგორც სხვებს, საკუთარ თავსაც მრავალშვილიან დედობას ვუსურვებ!

შორენა ლაბაძე
ჟურნალი ”გზა”