ქუჩაში პირდაბჩენილი ნუ ივლით

ახლა ზამთრის ბოლოა, ანუ მალე გაზაფხული მოვა, მაგრამ ჯერჯერობით ხალხი მაინც თბება კარმითა და სხვადასხვა საშუალებით. მილი გარეთ არის გაშვერილი და გამონაბოლქვი, შესაბამისად, გარეთ იფრქვევა, მაგრამ ეს იმას არ ნიშნავს, რომ ქუჩაში ყოფნისას მივვარდეთ მილს და ჩავისუნთქოთ. ამას იმიტომ გეუბნებით, რომ გუშინ ერთი ქალი კინაღამ დაიხრჩო. ის ქუჩაში მიდიოდა, თან მობილური ტელეფონით საუბრობდა. გაუსწორდა რა ერთ–ერთი სახლის პირველ სართულს, შესვენება და ღრმად ჩასუნთქვა გადაწყვიტა. პირი ფართოდ გააღო, დაახლოებით ისე, მგელი რომ აპირებს წითელქუდას ბებიას ჩაყლაპვას და ჩაისუნთქა... როგორც მერე აღმოჩნდა, პირდაპირ კარმის მილთან ჩაუმუხლავს და მთელი გამონაბოლქვი ისე ღრმად შეისრუტა, ნებისმიერ მტვერსასრუტს რომ შეშურდებოდა. შური იქით იყოს და ქალი ცუდად გახდა, ჩამუხვლა ჩაკეცვაში გადაეზარდა; მერე, როგორც იქნა, წამოდგა და სამსახურს მიაშურა. იქ კვლავ შეუძლოდ შეიქნა, გული აერია. დაესივნენ თანამშრომლები, მიხედეს, ცივი წყალი ასვეს და ქალმაც მოიხედა. ისე, ეგ ქალი ჩვეულებრივი არ გეგონოთ, სულ რაღაც ემართება, უცნაურ ისტორიებში ეხვევა, ახლა კი კარმის ბოლში გაეხვია, ესეც მოახერხა...