რატომ მალავს ლიკა ყაზბეგი ქმრის პატიმრობის მიზეზს

ვალენტინობის დღესასწაულზე დიზაინერმა ლიკა ყაზბეგმა უჩვეულო გარემოში, რუსთავში, სასჯელაღსრულების სისტემის მეთექვსმეტე დაწესებულებაში მოაწერა ხელი. მისი რჩეული, გიორგი ჯელაძე, სწორედ ზემოთ აღნიშნულ საპყრობილეში იხდის სასჯელს. ლიკა და გიორგი ერთმანეთს წლების წინ იცნობდნენ. სანამ მათი ურთიერთობა სერიოზულ სახეს მიიღებდა, გიორგი დაიჭირეს. მან უკვე ექვსი წელი მოიხადა.

-  მე და გიორგიმ ერთმანეთი წლების წინ გავიცანით, მაგრამ ამ ურთიერთობას სიყვარული არ ერქვა. იყო მცირე სიმპათიები. მერე მე ჩემს საქმეზე გადავერთე. ასე რომ, რომანი არ გვქონია. შემდეგ ლალისგან გავიგე, რომ ამ ციხეში იჯდა. გიორგიმაც გამოთქვა ურთიერთობის აღდგენის სურვილი. ლალიმაც შეგვიწყო ხელი, გვგულშემატკივრობდა. საოცრად მტკიცე ხასიათი აქვს გიორგის, რაც ძალიან დავაფასე. ქართველ მამაკაცებში, სამწუხაროდ, მტკიცე ხასიათის დეფიციტია. მას არ აქვს პრეტენზია იმაზე, რომ მე შოუბიზნესის ერთ-ერთი სახე ვარ, მიწევს მუშაობა ბომონდთან. ამან ძალიან მომხიბლა. გიორგიმ ფიქრის საშუალება არ მომცა. მით უმეტეს, რომ დაწყებული მაქვს ახალი პროექტი, ბიზნესჩვენება, რომელიც ერთ თვეში უნდა განვახორციელო, 200 კაცი უნდა გამოვიყვანო პოდიუმზე. დილიდან საღამომდე ამ საქმეზე ვფიქრობდი და უცბად სხვა რელსებზე გადამიყვანა ამ ორმა ადამიანმა: გიორგიმ და ლალიმ. ორმხრივ შეტევას ვეღარ გავუძელი (იღიმება) და გადავდგი ეს ნაბიჯი. არიან წყვილები, რომლებიც წლების განმავლობაში ერთად დადიან, ერთად ცხოვრობენ, მერე ქორწინდებიან და მაინც ინგრევა მათი ოჯახები. ამდენად, სასიყვარულო ურთიერთობა ლატარიაა, მე კი, ვფიქრობ, ამ ლატარიაში ჯეკპოტი მოვიგე.

-  ასაკობრივი სხვაობა არის თქვენ შორის?
-  აქაც მოდის ტენდენციებს ავყევი და პატარა ბიჭი ავირჩიე ცხოვრების თანამგზავრად (იცინის).

-  შეიძლება გკითხოთ, რამდენი წლით არის გიორგი თქვენზე უმცროსი?
-  რამდენიმე წლით.

-  თქვით, რომ გიორგის პრეტენზია არ აქვს თქვენს საქმიანობასთან დაკავშირებით. თქვენ თუ დაფიქრებულხართ იმაზე, პატიმარს რომ გაჰყევით ცოლად, იმაზე, რას იტყვიან თქვენი ახლობლები, მეგობრები, ოჯახის წევრები?
-  წინა მთავრობამ ისეთი რანგის ადამიანები დაიჭირა და ჩასვა ციხეში, ეს სტატუსი დღეს სირცხვილი ნამდვილად არ არის. ბევრი მათგანი გაუგებრობის, უსამართლობის მსხვერპლი აღმოჩნდა, ბევრი პოლიტპატიმრის სტატუსით უკვე გათავისუფლებულია. დღეს სიყვარულის დღეა და აქ სწორედ სიყვარულმა იზეიმა. ვფიქრობ, სამართალიც მალე იზეიმებს. გიორგი სრულიად უსამართლოდ ზის ციხეში.

-  შეიძლება, მიზეზი გკითხოთ?
-  ეს დიდი ისტორიაა, რომელსაც მისი ნებართვის გარეშე არ მოვყვები, მაგრამ როცა გათავისუფლდება, ამის შესახებ მთელი საქართველო გაიგებს.

-  თქვენი ოჯახის წევრები როგორ შეხვდნენ ამ ამბავს?
-  ისინი ჩემზე უფრო დაბნეულები არიან. მგონი, ბოლომდე არც სჯერათ, რა ხდება ჩემს თავს. დღეს აქ ჩემმა დამ მომიყვანა მანქანით და დამტოვა. სხვას რომ მოეყოლა ჩემთვის ამბავი, რომელიც მე გადამხდა თავს, არ დავიჯერებდი. მიუხედავად ყველაფრისა, ვფიქრობ, კარგი რამ გადამხდა თავს. ამ ამბავს წლების შემდეგ დიდი ინტერესით მოუსმენენ ჩემი შვილიშვილები.

-  ლიკა, როგორ ახერხებდით ურთიერთობას თქვენ და გიორგი, სანამ საქმე ხელისმოწერამდე მოვიდოდა?
-  სატელეფონო კავშირი გვქონდა. მოგეხსენებათ, ციხიდან არის ამისი საშუალება. საათობით ვიყავით ტელეფონზე ჩამოკიდებული. ერთნაირი მსოფლმხედველობა, შეხედულებები აღ­მოგვაჩნდა. გიორგი ძალიან რელიგიურია, ჰყავს არაჩვეულებრივი ოჯახი. არაჩვეულებრივი დედამთილი მყავს, საუცხოო ადამიანი, ულამაზესი მული, სოფო მაისურაძე. სამოდელო სააგენტოს ხელმძღვანელი ვარ და მოგეხსენებათ, რამხელა მნიშვნელობას ვანიჭებ სილამაზეს. გიორგის პირველი ქორწინებიდან ჰყავს არაჩვეულებრივი გოგონა, ანა-მარია. მე ბავშვთა სამოდელო სააგენტოც მაქვს და რასაკვირველია, ანა-მარია ჩემი მოდელი გახდება. ვფიქრობ, კარგ დედობას გავუწევ მას.

ნინო მჭედლიშვილი
ჟურნალი "რეიტინგი"